Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 61
Пазось монь кекшема таркам
1Моравтомань ветицянтень, Идифумнень. Давидэнь псалмась.
2Ансяк Пазонть эйсэ сэтьмелгады монь оймем.
Сонзэ пельде сы монень идема.
3Ансяк Сон монь кемекстазь кудом ды идицям,
монь кекшема таркам, секс а чатазеван.
4Зярс тынь карматадо кайсевеме вейке ломань лангс?
Весе тынь ультядо пильге лангсто правтозь,
теке чиремезь ошпирявт, теке чатыця пирявкс.△
5Сынь арсить ёртомс сонзэ сэрей таркастонзо
ды вечкить кенгелема.
Валсост сынь чанстить,
седейсэст сюдыть.
6Ансяк Пазонть эйсэ оймак-сэтьмелгадт, монь оймем!
Сонзэ лангс монь кемемам.
7Ансяк Сон монь кемекстазь кудом ды идицям,
монь кекшема таркам, секс а чатазеван.
8Пазонть пельде сы монень идема ды шнамо.
Сон монь кеме кевпандом ды нежедьксэм.
9Раськем! Кемть Сонзэ лангс эрьва кодамо шкасто,
панжт Сонзэ икеле эсь седееть.
Пазось минек кекшема тарканок.
10Ломантне – те ансяк варма ялтке,
содавикстнэяк ды асодавикстнэяк – те стяконь тев.
Бути сынст онкстамс,
весе сынь варма ялткеде седе шождынеть.
11Илядо кеме вийсэ саеманть лангс
ды илядо нежеде саламонть лангс.
Зярдо сюпавчись ламолгады,
илядо сюлмаво сонензэ седейсэнк.
12Пазось весть мерсь,
ды кавксть мон мария тень:
виесь – Пазонть.
13Седеймарямоськак, Азоро, Тонь,
ды Тон эрьвантень максат сонзэ тевензэ коряс.
Глава 61
