Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
ОЗНОМАМОРОТ
Глава 45
Пазось – минек виенек ды лездыцянок
1Моравтомань ветицянтень. Кореень буенть морозо. Аламоф*a седямопель марто.
2Пазось – минек кекшема тарканок ды виенек,
кажосо свал шкастонзо лезды.
3Секскак минь а пелезевтяно,
куш модаськак кармаволь чатамо-сорномо,
ды пандотнеяк айгевельть-ваявольть иневедтнень отьмас.
4Кадык шалныть-увныть ды кепсевить сынст ведест,
кадык сынст лажномадонть сорныть пандотне.
5Леень чудикерькстнэ кенярдовтыть Пазонь ошонть,
Верепазонть иневанькс эрямо тарканзо.
6Пазось те ошсонть, секс сон а чатазеви.
Уш валске, ашолгадома шкасто, Сон карми лездамо тензэ.
7Шалнозевсть-бизмолгадсть раськетне,
кармасть лыкамо лия инязоронь мастортнэ,
[Верепазось] максызе Эсь вайгелензэ – ды модась солась.
8Менелень вийтнень Азорось мартонок,
Иаковонь Пазось – минек лездыцянок.
9Азёдо ванынк Азоронть тевензэ,
кодат дивавтыця-тандавтыця тевть Сон тейсь масторлангсонть.
10Сон лоткавтынзе тюрематнень масторонть келес,
яжинзе налчирькетнень ды синдтринзе сялготнень*б,
пултынзе толсо ушмонь.
11Сон корты: «Оймадо ды содадо:
Мон – Паз, весе раськетнень лангсо сехте покшан,
моданть лангсо инекс улян».
12Менелень вийтнень Азорось мартонок,
Иаковонь Пазось – минек лездыцянок.
Шнамо
*а 45:1 Аламоф – те седямопель эли морамолув эли авань верев таргавиця вайгель.
*б 45:10 сялго – копьё
Глава 45
