Выбрать язык
Книги Ветхого Завета
Книги Нового Завета
с русским текстом1Моравтомань ветицянтень. Кореень буенть*а тонавтомазо.
2Пазом, минь маринек эсенек пилесэ,
минек тетянок ёвтнесть тенек тевтнеде,
конатнень Тон теить сынст эрямо шкасто,
кезэрень пингева.
3Тон Эсеть кедьсэ пансить-сравтнить лия раськетнень,
изнить-правтыть ды панить сынст.
Тон тарказост озавтыть эрямо минек тетятнень.
4Сынь аволь эсь торосост саизь те моданть,
аволь эсест виесь идинзе сынст.
Те Тонь вить кедесь ды кедьвиесь идинзе
ды Тонь чачо валдось,
эдь Тон вечкилить сынст.
5Пазом, Тон монь Инязором!
Казть Иаковнень*б идема.
6Тонь марто сюросонок кечкересынек
минек душмантнэнь,
Тонь лементь вийсэ пильгенек алов чалгсесынек
каршонок стякшныцятнень.
7Аволь налчирькем лангс кеман-нежедян мон,
ды аволь тором идесамам монь.
8Ансяк Тон ятонок эйстэ идесамизь
ды совавтсыть визьксчамас минек авечкицятнень.
9Пазом, Тонь эйсэ минь шнатано прянок апак лотксе,
Тонь лементь карматано инелгавтнеме пингеде пингес.
10А вана ней Тон кадымизь,
совавтымизь минек визьксчамас
ды а молят минек ушмотнень марто.
11Тон кармавтымизь оргодеме минек душмантнэнь эйстэ,
ды минек авечкицятне салыть-габордыть эйсэнек.
12Тон максымизь минек реветнень ладсо печксемс
ды сравтнимизь лия раськетнень юткова.
13Aволь покш питнеде Тон миик Эсеть раськеть,
Тон эзить сае кисэнзэ малав кодамояк питне.
14Тон максымизь минек покордамс шабранок туртов,
раксемс-пеедькшнемс – перьканок эрицятнень туртов.
15Тон теимизь минек нарьгамо таркакс
лия раськетнень ютксо,
сынь, лангозонок ванозь, яхоить прясост.
16Эрьва чистэ икелень ашти монь покордамось,
ды визьксэсь вельти монь чамам,
17зярдо монь сёвныть ды лангсон пеедькшнить,
зярдо душмантнэ ды кежень пандыцятне
кайсить вановтост монь лангс.
18Те весе прась минек лангс.
Ансяк минь эзидизь стувто Тонь
ды ванстынек Тонь максовт вейсэньлувонть.
19Минек седеенек эзть саеве Тонь эйстэ,
пильгенек эзть пурда Тонь кинть лангсто,
20кадык Тон минек тапсимизь-яжимизь
шакалтнэнь эрямо таркасост
ды вельтимизь куломань сулейсэ.
21Бути минь стувтовлинек Пазонок лемензэ
ды озномсто кепедевлинек кеденек лия пазнэнь,
22арази Пазось аволь сода теде?
Эдь Сон содасынзе седеень весе салавачитнень.
23А вана Тонь кисэ минек куловтыть-чавныть эрьва чистэ,
ловить эйсэнек ревекс, конатнень ветить пеель алов.
24Азоро! Мекс удат? Сыргозть!
Стяк, илямизь кадо минек свалшкас.
25Мекс Тон кекшнят чачот,
стувтнят минек стакачитнеде ды минек лепштямодонть?
26Минек ойменек ваясть пуль потс,
минь прынек пильге лангсто.
27Стяк миненек лездамо
ды идемизь минек Эсеть седеймарямот кувалт.
*а 43:1 буе – племя, род
*б 43:5 Тесэ Иаков лементь ало чарькодеви Израилень раськесь.
Глава 43