Выбрать язык
Книги Ветхого Завета
Книги Нового Завета
с русским текстомДавидэнь псалмась.
1Иля талновто седееть зыянонь теицятнеде,
иля сявадсто сельметь авидечинь теицятнень лангс.
2Эдь сынь тикше ладсо курок улить ледезь,
пужить-коськить, теке пиже тикше паксясо.
3Кемть-нежедть Азоронть лангс ды тейть паро.
Эряк масторот лангсо
ды ульть мельспаросо Пазонть видечинзэ кувалт.
4Кенярдовт прят Азоронть эйсэ,
ды Сон топавтсынзе тонь седеймелеть.
5Максык Азоронть кедьс эсь эрямо кить,
кемть-нежедть Сонзэ лангс,
ды Сон тейсы тень:
6тонь видечинть Сон тейсы неявицякс, кода валдонть,
тонь чумовтомочинть невтьсы чикуншкань валдокс.
7Сэтьмелгавтык прят Азоронть икеле
ды кемть-нежедть лангозонзо.
Иля ацирьгале ломаненть лангс, кона эрьва козонь кенери,
сень лангс, кие коды-поны зыянов тевть-валт.
8Лоткавтыть кежеть ды кадык ацирьгалемат,
иля пизякале, те вети ансяк зыянс.
9Эдь зыянонь теицятне ёмсить-маштневить,
Азоронть лангс нежедицятненень вана
максови масторось.
10Кадовсь аволь ламо шка, ды а ули зыяновось.
Варштат тов, косоль сон – тосо сон арась.
11А вана сэтьметненень максови масторось,
ды сынь мельспаросо кармить эрямо
сэтьмечисэ ды паро уцяскасо.
12Зыяновось арси видечинь ломаненть каршо апаро
ды чикорды пейсэнзэ сонзэ лангс.
13Азорось жо пеедькшни зыянонь теицянть лангсо,
эдь Сон неи: сы тензэ пе.
14Зыяновтне таргизь торост ды мендизь налчирькест*a,
арсить правтомс кажовонть ды лепштязенть,
чавномс-маштнемс виде киява молицятнень.
15Ансяк торост совить эсест седейтнес,
ды сынст налчирькетнеяк яжавить-синдтревить.
16Се аламось, мезесь ули видечинь ломаненть,
зыянов ломаненть сюпавчиденть седе паро.
17Зыяновтнень виест ули маштозь,
а вана видечисэтнень кирди-кемексты Азорось.
18Азорось мелявты эрьва чистэ ванькс ойме ломантнень кисэ,
ды сынст уличись зярдояк а ёми.
19Сынь а улить визделгавтозь стака шкасто,
вачочистэяк пекест ули пештязь.
20А вана зыяновтне кулыть, Азоронть душмантнэ ёмить,
кода солы-ёми ревень куясь аноксонь пултамсто.
21Зыяновось саи долкс ды мекев а панды,
видечисэсь путы седеймарямо ды сюпавсто максы.
22Сетненень, конатнень Азорось чанстинзе-баславинзе,
максови масторось,
а вана Сонзэ сюдовкстнэ кулсить-ёмсить.
23Азорось кемексты се ломаненть эскельксэнзэ,
конань кизэ тукшны Сонзэ мельс.
24Бути сон карми прамо, сестэяк а пры,
эдь Азорось кирди сонзэ кедте.
25Мон ульнинь од ды сырединь,
ансяк зярдояк эзинь некшне видечинь ломань,
конань кадовлизе Азорось
ды конань эйкакшонзо улевельть кшинь пурныцякс.
26Истямо ломанесь эрьва чистэ
яви седеймарямо ды максы долкс,
ды эйкакшонзояк улить чанстязь.
27Кирдевть веёно зыянонть эйстэ ды тейть паро,
сестэ кармат эрямо-аштеме те масторонть лангсо пингеде пингес.
28Азорось вечки видечи ды а кадсынзе кемевикс важонзо,
сынь ванстовить пингеде пингес.
[А вана авидетне улить панезь],
зыяновтнень эйкакшосткак улить куловтозь-ёмавтозь.
29Видечисэтненень максови масторось,
ды сынь кармить эрямо-аштеме лангсонзо пингеде пингес.
30Видечисэсь ёвты превейчи,
сонзэ келесь корты сень, мезесь виде.
31Сонзэ седейсэ Пазонзо коесь,
сонзэ пильгензэ а нолажтыть.
32Зыяновось ваны видечисэнть мельга
ды вешни, кода сонзэ куловтомс.
33Ансяк Азорось а макссы сонзэ зыянонь теицянть кедьс
ды невтьсы сонзэ чумовтомокс судсо.
34Кемть-нежедть Азоронть лангс ды кирдевть Сонзэ кинть лангсо.
Сестэ Сон тонь кепедтянзат, тонеть масторонть максомга.
Ды тень несак, зярдо кармить маштнеме-ёмавтнеме зыяновтнень.
35Мон неинь кежейде кежей зыяновонть,
кона келейгалесь,
теке домка ундокс-корён марто рацяня чувто.
36Ансяк курок сон ёмась, ды вана косояк сон арась.
Вешнян сонзэ – костояк а муеви.
37Вант ачумондовицянть мельга
ды тонавтнек видечинь ломаненть пельде,
эдь сэтьмечинь ломаненть ули икелепельксэнь эрямозо.
38Коень колсицятне кулыть-ёмить вейкень пес,
зыяновтнень сы шкаст яжави-тапави.
39А вана Азорось идесынзе видечисэтнень,
Сон сынст ванстыцяст стака шкасто.
40Азорось лезды сыненст ды менстясынзе сынст,
олякстомтсынзе зыяновтнень эйстэ ды идесынзе,
эдь сынь кемить-нежедить Сонзэ лангс.
Шнамо
*а 36:14 налчирьке – лук
Глава 36