Выбрать язык
Книги Ветхого Завета
Книги Нового Завета
с русским текстомМоравтомань ветицянтень. Давидэнь псалмась.
1Азоро! Тон терявтнимик-варчавтнимик монь
ды содасамак.
2Тон содат, зярдо озан ды зярдо стян.
Тон васолдо чарькодьсыть мелень-превень.
3Якан мон эли оймсян, Тон перькан,
ды весе монь китнень Тон содасыть.
4Валось эзь кенере ливтямо кургостон –
Тон, Азоро, уш сонзэ парсте содасак.
5Удалдо ды икельде Тон пиримик монь
ды путык Эсь кедеть лангозон.
6[Тонь] содамочись маряви монень дивакс
ды а саеви тень, а кельги пряпотмозон.
7Ков туеван Тонь Оймеялтонть*а эйстэ
ды ков оргодеван Тонь чачот икельде?
8Кузян менельс – Тон тосо,
валган тоначив – тосояк Тон.
9Сайсынь зорянь сёлмотнень
ды ливтян эрямо иневедень чирес –
10тосояк Тон кармат ветямо монь,
ды кирдьсамам монь Тонь виев вить кедесь.
11Бути ёвтангак: «Кадык чоподась кекшсамам монь,
ды кадык валдось тееви монь перька векс»,
12сестэяк чоподась а кекши Тонь эйстэ,
ды веськак валдо, теке чи,
чоподаськак Теть кода валдо.
13Тон теик монь потмом
ды кодымик-пурнымик авань пекесэ.
14Шнан Тонь сень кисэ,
мекс мон дивань лувсо-ладсо теезян.
Тонь теветь дивань,
ды монь оймем вадрясто чарькодьсы тень.
15Зярдо мон ульнинь теезь салавачисэ,
пеке потсо парсте кодазелинь,
ве ловажамгак арасель кекшезь Тондеть.
16Тонь сельметне несть монь сюлмавоманть.
Тонь книгасонть сёрмадозельть
монень явозь весе читне уш сестэ,
зярдо вейкеяк эйстэст арасель.
17Пазом, кодат питнейть монь туртов Тонь мелеть-преветь,
ды кода ламо сындест!
18Бути лововлиньгак –
сындест чувардо ламо.
Сыргозянгак – мон ялатеке Тонь марто.
19Вай, бути Тон, Пазом, маштневлить зыяновтнень!
Туеде монь эйстэ, верень потицят!
20Сынст мелест-валост Тонь каршо пек кежейть.
Стяко ды апарсте ёвтыть Тонь леметь душмантнэ.
21Азоро, арази монень вечкемс Тонь авечкицятнень
ды а нулгодемс Тонь лангс кепсевицятнеде?
22Вельть покш авечкемасо а вечксынь сынст.
Душмант сынь монень.
23Терявтнемак монь, Пазом,
ды содык седеем.
Варчавтнемак монь
ды содыть талновтыця мелень-арсеман.
24Вант, бути мон аштян зыянов килангсо,
ветямак монь пингеде пингень килангс.
*а 138:7 Оймеялт – Божий Дух
Глава 138