Выбрать язык
Книги Ветхого Завета
Книги Нового Завета
с русским текстомМирэнть-масторонть теемадо Давидэнь псалмась.
1Шнык Азоронть, монь оймем!
Азоро, монь Пазом! Тон инедеяк ине,
Тон вельтязь инексчисэ ды сияждомасо.
2Тон оршазь валдосо, кода ризасо.
Тон сравтат менеленть, теке коцткудо.
3Тон теят ведтнень лангсо, менеленть тёкшсо*а
Эстеть эрямо таркат,
теят пельтнень Эсеть шожда крандазокс,
яксят-ливтнят вармань сёлмотнень лангсо.
4Тон теят оймеялтнэнь*б Эсеть ангелэкс,
гувныця толонть – Эсеть важодицякс.
5Тон путык моданть кеме юр лангс,
сон а чатазеви пингеде пингес.
6Тон, теке оршамосо, вельтик сонзэ домка ведьсэ.
Ведтне натой пандотненьгак кекшизь эсест алов.
7Тон ансяк аламодо тандавтыть – ведтне тусть чудеме.
Тонь пурьгинень зэрнемадот ведтне капшазь оргодсть.
8Кузсть-кепететсть сынь пандотнень пряс,
валгсть лайметнес, се таркантень,
конань Тон аравтык сыненст.
9Тон путыть ведтненень пень тешкс, конась сыненст а ютави,
ды мекев сынь а велявтыть моданть вельтямо.
10Тон теить лайметнес лисьмапрят,
[ведест] пандотнень юткова чудить алов.
11Сынь симдить весе идем ракшатнень.
Идем ишемтнеяк*в тосо явавтыть симемаст.
12Чиреваст эрить менелень нармунтне.
Сынь ливтнить-чоледить тусто тарадтнэнь потсо.
13Тон симдят пандотнень вере эрямо таркастот.
Тонь теевть паро тевтнесэ симдеви-андови модась.
14Тон кастат тикше кудоракшатнень туртов,
тикшеть-лопат – ломаненть лезэс.
Весенень кастовтат ярсамопель модастонть.
15Кастовтат вина, кона кецявты-элякавты ломанень седей,
ой, кона цитневти сонзэ чаманзо,
ды кши, кона виевгавты оймензэ-рунгонзо.
16Симдевить ведте Азоронть чувтонзо,
Ливанонь кедратне, конатнень Сон озавтынзе.
17Сынст лангс теить пизэть нармунтне.
Кузтнэ – аисттнэнень эрямо тарка,
18сэрей пандотне – идем сеятненень.
Кевень пандо чиретне – кекшема тарка нумолотненень.
19Тон теик ковонть шкатнень невтемаст кисэ.
Чипаесь содасы валгома шканзо.
20Тон сравтат чопода – ды эрсекшны ве.
Те шкастонть лиснить азгондеме вирень весе идем ракшатне.
21Од левтне ирнэзь ардтнить ракша мельга
ды вешнить Пазонть пельде кучозь ярсамопеленть.
22Лиси чипаесь – ды сынь велявтыть мекев
ды маднить пизэваст.
23Ломанесь жо лиси эсь тевензэ тееме
ды важоди чокшненть самс.
24Кода ламо Тонь теветь, Азоро!
Весементь Тон теик покш превейчисэть.
Модась пешксе Тонь теевкстнэде.
25Иневедеськак ине ды аонкставиця.
Тосо бизмолдозь бизмолдыть эрьва мезть.
Вишкине ды покш эрийтненень арась пе.
26Тосо уйнить венчть.
Тосо левиафанось – инегуесь,
конань Тон теик тозонь налксеме.
27Весе сынь учить Тонь пельде эсест ярсамопелест,
конань Тон максат тенст шкастонзо.
28Максат сыненст – сайсызь сонзэ.
Венстят кедеть – пешкедить парочисэнть.
29Тон кекшсак чачот – сынь талныть.
Сайсак оймекоштост – сынь кулыть
ды велявтыть модачелькекс.
30Тон кучсак оймеялтот – чачи од,
истя Тон одкстомтат моданть чачонзо.
31Улезэ Азоронть инексчизэ пингеде пингес!
Эрьгелезэ Азорось Эсензэ тевензэ кувалт!
32Сон варшты моданть лангс – тона сорны.
Токасынзе пандотнень – сынь нолдыть качамо.
33Карман морамо Азоронтень весе эрямом перть.
Карман шнамо монь Пазонть, зярс лексян.
34Улезэ мельспарокс Сонензэ монь мором.
Карман эрьгелеме Азоронть кувалт.
35Ёмаст пежетевтне моданть лангсто,
ды икелепелев иляст уле зыянонь теицятне.
Шнык Азоронть, монь оймем!
Аллилуя*г!
Шнамо
*а 103:3 Вант: Чачома 1:6-8
*б 103:4 Тесэ евреень кельсэ ашти ”руах” валось, конань смустезэ: оймеялт (дух) ды варма.
*в 103:11 ишем – осёл
*г 103:35 аллилуя – евреень келень вал, смустезэ: ”Шнадо Азоронть!”
Глава 103