Выбрать язык
Книги Ветхого Завета
Книги Нового Завета
с русским текстом1Пайстомонть озномазо, зярдо сон лавшо ёжосо панжи Азоронть икеле эсензэ ризксэнзэ-мелявксонзо.
2Азоро! Марик монь озномам,
пачкодезэ Тонеть монь рангомам-лайшемам.
3Иля кекше чачот монь эйстэ,
чиремтик пилеть монь ёнов стака чистэнь.
Седе курок марямак монь се чистэнть,
зярдо тердтян Тонь.
4Монь читне ёмить, кода качамо,
ды монь ловажан палыть, тонолкс теевить.
5Монь седеем коськсь, теке ледезь тикше,
ды мон стувтнян эсень кшидеяк ярсамо.
6Покш ризкстэ-рангомадо кадовсть ансяк ловажан.
7Мон молян корш ёнов чаво модасо,
мон теке покш пря корш кадозь таркасо.
8А удан, мон ськамон,
теке лато лангсо вейкине нармунь.
9Чистэ чис монь душмантнэ сёвныть эйсэнь.
Сынь покордыть монь ды сюдыть монь лемсэнь.
10Монь кшим – куловось,
монь ведем сельведень марто човор
11Тонь кеждеть ды ацирьгалемадот.
Тон кепедимик ды правтымик монь.
12Монь читне – теке таргавиця сулей.
Мон коськинь, теке тикше.
13Тон жо, Азоро, улят пингеде пингес.
Тон а стувтоват буестэ буес.
14Тон стят ды невтьсак Сиононтень Эсеть седеймарямот.
Шка нолдамс сонзэ чумонзо. Те шкась сась.
15Тонь уретне вечксызь кевензэяк,
сонзэ челькезэяк-пулезэяк калавтсынзе седеест.
16Раськетне пелезевить-сорнозевить Азоронь лементь икеле,
ды модань весе инязортнэ – Тонь инексчинть икеле.
17Азорось стявтсы Сиононть тарказонзо
ды сы Эсензэ инексчисэнзэ.
18Азорось марясынзе пайстомотнень озномаст
ды а кадсынзе мельтеме энялдомаст.
19Те ули сёрмадозь сы шкань ломантненень,
ды Азоронть кармить шнамо сетнеяк,
кить мейле чачить.
20Сон ваны верде, Эсензэ иневанькс таркастонзо.
Азорось моданть лангс ваны менельстэ.
21Сон марясынзе пекстазтнень кувсемаст
ды олякстомтсынзе куломас судязтнень.
22Азоронть лемензэ кармить яволявтомо Сионсо
ды Сонзэ шнамонзо – Иерусалимсэ,
23зярдо пурнавить вейс весе раськетне ды мастортнэ
Азоронтень важодеме-сюконямо.
24Сон маштовтызе моцем эрямо ким куншкасто,
киртинзе монь читнень.
25Мон меринь: Пазом!
Иля мере тень куломс эрямонь куншкасто.
Тон жо эрят буестэ буес.
26Васняяк Тон, [Азоро], путыть юр модантень,
ды менельтнеяк теезь Тонь кедьсэ.
27Нетне весе ёмить, ансяк Тон кадоват.
Весе сынь, кода оршамотне, нулыить,
ды оршамопель ладсо Тон полавтсыть сынст.
Ды сынь полавтовить.
28Ансяк Тон зярдояк а полавтоват,
ды Тонь иетненень а ули пе.
29Тонь уретнень цёраст кармить эрямо икелевгак,
ды сынст раськест-буест свал улить Тонь икеле.
Глава 101