Choose Language
Old Testament Books
New Testament Books
view with a second Bible
1 Ты юи-пāлт Ӣсус ханисьтахтын хумиянэ э̄лы-пāлн ос нэ̄глыс. Тай Тивериадский нампа ся̄рысьт ōлыс. Тав тох ты нэ̄глыс:2 Симон Пēтыр, Юртыӈ пы̄грисӣг лāвнэ Фома, Кана Галилейский нампа мāныл ōлнэ Нафанаил, Зеведей пы̄ганэ ос Тав ханисьтахтын кит хумияге, тāн пуссын аквъёт ōлсыт.3 Симон Пēтыр тāнанылн лāвыс: ”Хӯлпъяӈкве минэ̄гум”. Тāн тавēн лāвēгыт: ”Мāн ōс наӈ ётын минэ̄в”. Минāсыт ос тāра хāпн тāлсыт ос ань та э̄т нэ̄матыр ат āлāсыт.4 Ос āлпылы̄г ēмтум порат Ӣсус нāлми вāтат лю̄лис. Ханисьтахтын хумиянэ̄н Ӣсус ат хасьвес.5 Ӣсус тāнаны̄лн лāвыс: ”Ня̄враманум! Нāн матыр тāйм ōньсегы̄н-а?” Тāн ювле-лāвыглāсыт: ”Āти”.6 Тав ос тāнанылн лāвыс: ”Хӯлпын хāп ёмаспāлэ̄ныл тāратэ̄лы̄н, пувегы̄н тах”. Тāн таратасаныл, ос хӯлпаныл нōх-хартуӈкве ат вēрмысаныл, такем сāв хӯл тот та ōлыс.7 Тōнт Ӣсусын э̄руптым ханисьтахтын хум Пēтыр нупыл лāвыс: ”Тыи Кӯсяюв Тав!” Симон Пēтыр Кӯсяяныл урыл хӯлмēт, маснутанэ̄т тāра лап-пēрумтахтас, – тав ня̄р лōмтыл хӯлупъяс, тӯвыл витн порыгмас.8 Мōт ханисьтахтын хумит хӯлын тāгиньтыл хӯлпаныл хāртым, пāг-товсыт, ся̄рсь вāта ля̄пат ōлыс, тув мус китсāткем конылōвыл*а палытэ тӯп ōлыс.9 Пāг-пӯхтуманылт, кāсалāсаныл пāлтым āрась тармыл хӯл ос ня̄нь тослувēсыг.10 Ӣсус тāнанылн лāвыс: ”Ань алам хӯланы̄н ты̄г-тотэ̄н”.11 Симон Пēтыр минас ос яныг хӯлытыл тāгиньтым хӯлп пāг-хāрттыстэ. Яныгсāт ос хōтпан нупыл хӯрум хӯл тот ōлыс; ос тасāвит хӯл та хōям, хӯлпаныл тай атпыл тōллум.12 Ӣсус тāнанылн лāвыс: ”Йиēн, тэ̄пъялэ̄н”. Ханисьтахтын хумитныл нэ̄мхотъютаныл Таве кӣтыглаӈкве ат вēрмыс: ”Наӈ хотъют?” Тāн пуссын вāсаныл, тыи Кӯсяяныл Тав.13 Ӣсус ля̄пан-йис, ня̄нь вистэ ос тāнанылн мистэ, ос ахвтох хӯлыл мисанэ.14 Ӣсус сорум патме юи-пāлт Такви ханисьтахтын хумиянэ палт хурмиттыг ты нэ̄глāлас.
15 Тāн хōталъя̄тт тэ̄пьяламанылт Ӣсус Симон Пēтыр китыгластэ: ”Ионан пы̄г, Симон! Наӈ Āнум тāнанылныл тāкысьнув э̄рупты̄лын?” Пēтыр Тавēн лāвыс: ”Кӯсяй! Ам наӈын э̄руптанэм, Наӈ вāглын”. Ӣсус тавēн лāыс: ”Ам пāля-пы̄грисянум ӯргалэ̄н”.16 Мōтсёс тавēн ōс ахвтох лāвыс: ”Ионан пы̄г, Симон! Наӈ Āнум э̄рупты̄лын?” Пēтыр Тавēн лāвыс: ”Кӯсяй! Ам наӈын э̄руптанэм, Наӈ вāглын”. Ӣсус тавēн лāвыс: ”Ам пāлянум ӯргалэ̄н”.17 Хӯрмитты̄г тавēн лāвыс: ”Ионан пы̄г, Симон! Наӈ Āнум э̄рупты̄лын?” Пēтыр сяр рӯталиг ēмтыс, хӯрмитты̄г ты китыглаве: ”Наӈ Āнум э̄рупты̄лын?” Ос Тавēн лāвыс: ”Кӯсяй! Наӈ пуссын вāглын; Ам наӈын э̄руптанэм, Наӈ вāглын”. Ӣсус тавēн лāвыс: ”Ам пāлянум ӯргалэ̄н.18 Мāк, сяр мāк наӈы̄н ты лāвēгум: наӈ мāньлат хумы̄г ōлмынт, наӈти э̄нтаптахтыглāлсын ос хоталь номтын патыс, тувле та миныглāлсын; ос тах мāтнэн юи-пāлт кāтагын нōӈхаль тактыя̄гын, ос мōт хōтпан э̄нтаптāвен, ос тувле та вāнттавен, хоталь номтын ат паты”.19 Тав тавēн тох хӯлтхатнэ мāгыс лāвыс, манхурип сормыл тах Пēтыр Тōрумт янытлаве. Ос тох лāвме юи-пāлт, Пēтырн лāвыс: ”Ам юи-пāлумт йиен”.
20 Пēтыр ювле-āӈкватамет, Ӣсусын э̄руптан ханисьтахтын хум тав юи-пāлэ̄т йинэ̄тэ кāсаластэ. Тōнт, э̄типалаг тэ̄пъяламаныл порат ты ханисьтахтын хум май Ӣсус сым-пōрхатэ̄н хӯтым китыглахтыглас: ”Кӯсяй! Хотъютын тах Наӈ тыналāвен?”21 Таве кāсаламēт, Пēтыр Ӣсус китыгластэ: ”Кӯсяй! Ос тав ётэ мāныр ēмты тах?”22 Ӣсус тавēн лāвыс: ”Тав Ам ёхтынэм мус ōлнэ̄тэ урыл Ам тах тахмаегум ке, наӈ ман тэ̄лан ōлы? Наӈ Ам юи-пāлумт йӣен”.23 Ты лāтыӈ ягпыгыт халанылт тох торгамтасаныл, э̄рттам та ханисьтахтын хум нэ̄мхуньт сорумн ат паты. Ос Ӣсус, тав соруме урыл ат лāвыглас. Тав топ лāвыс: ”Тав Ам ёхтынэм мус ōлнэтэ урыл Ам тахмаēгум ке, наӈ ман тэ̄лан ōлы?”24 Та ханисьтахтын хум ты ля̄ххалыт урыл ты потыртас, ты ля̄ххалыт тав ты хансысанэ; ос мāн вāглув, тав ля̄ххаланэ мāкыг ōлэ̄гыт.25 Ӣсус сāв мōт вāрмалит вāрыглас, та вāрмалянэ урыл пуссын ке хансуӈкве, ам номсэ̄гум, ты мирыӈ тōрумн тасāвит хансым нэ̄пакыт ат лāпнувыт. Аминь.
*а 8 21:8 китсāткем конылōвыл – ты яныг сāт мēтра
Глава 21
