Choose Language
Old Testament Books
New Testament Books
view with a second Bible
1 Сабат-хōтал хунь минас ос сāт ōвыл хōталэ нэ̄гылттахтумēт, Мария Магдалина ос мōт Мария āхвтас курсип сунсуӈкве ёхтысы̄г.2 Ос мā яныг тōргил ēмтыс: Кӯсяй Ангел, тōрмыл ёл-вāглым, курсип пōхан ёхтым, āхвтас пōхан-лаквтыстэ ос та āхвтас тармыл ӯнтыс.3 Тав сяхыл сāлыл хурипаг ōлыс, ос маснутэ тӯйт хурипаг я̄ӈкыг ōлыс.4 Тавēныл рохтым, кāрвальтан утыт хот-торгатахтасыт ос аквтупыл сорум патум уты̄г ēмтапасыт.5 Ангел ос, э̄кваг ля̄льт лāвыс: ”Нэ̄н ул пилэ̄н, ам вāглум, нэ̄н пēрнан рāтым Ӣсус кинсэ̄гын.6 Тав тыт āтим: Тав нōх-ялтыс, хумус лāвыглāлыс; ляпан-йиēн, та мāтэ сунсэлы̄н, хōт Кӯсяй хуяс.7 Ос молях минэ̄н, Тав ханисьтахтын хумиянэ̄н лāвēн, Тав сорумныл нōх-ялтыс. Тав нāнанныл моляхнуве Галилея мāн мины: тот Таве кāсалылын; тыи ам нэ̄нанн ты лāвсум”.8 Ос āхвтас курсипыл молях кон-квāлым, тэ̄н пилым ос яныг ся̄гтальпиӈ номтыл Тав ханисьтахтын хумиянэ̄н лāтыӈ тотнэ мāгыс та хайтсы̄г.9 Хунь тэ̄н Тав ханисьтахтын хумиянэ̄н лāтыӈ тотуӈкве ё̄мсы̄г, илттыг Ӣсус тэ̄натэ̄н ля̄льт-хōнтсаге ос лāвыс: ”Пася ōлэ̄н!” Ос тэ̄н, Тав пōхатэн рōвсыг, Тав лāглаген сынумтахтасыг ос Тавēн пуӈк пинсы̄г.10 Тōнт Ӣсус тэ̄натэ̄н лāвыс: ”Ул пилэ̄н; минэ̄н, Ам āпсиянумн лāвен, Галилея мāн вос минэ̄гыт, тот Āнум кāсалыяныл тах”.
11 Хунь тэ̄н минасы̄г, тōва кāрвальтам хумит ӯсын минасыт, пӯп-ōйкат кӯсяитн пуссын потыртасыт мāныр тыт ōлыс.12 Ос тāн, периим яныг хумит ёт потыртахтасыт, сāв олн сыраиӈ утытн мисыт13 ос лāвсыт: ”Тасир лāвēн: хунь мāн хуясув, Тав ханисьтахтын хумиянэ̄н э̄ти ёхтувес ос хот-тулмантавес.14 Ос ты урыл губернатор хӯлытэ ке, мāн тах таве потыртылув, ос тōнт нāн мāгсылын нэ̄матыр лю̄ль тах ат ēмты”.15 Тāн, олн висыт, тасир та вāрсыт, хумус ханисьтавесыт. Ос та лāтӈыт еврей мир халт ты хōтал мус иӈ та суйтэ̄гыт.
16 Аквхуйплов ханисьтахтын хумиянэ Галилеян, урын минасыт, хоталь Ӣсусын лāввесыт.17 Ос Таве кāсаламанылт, пуӈк ёл-хӯтыглāлсыт; ос тōват тай ат агтсыт.18 Тāн пōханылн ёхтым, Ӣсус тāнанылн лāвыс: ”Āнумн пуссын ё̄р тōрумт ос мāт мāим ōлы.19 Ос минэ̄н, пуссын мир Ам ханисьтан хумиянумыг вāрēн: Āсь, Пы̄г ос Ялпыӈ Лылы нам мāгыс тāнаныл витн тӯлыглэ̄н.20 Тāнаныл э̄рнэ сир вāруӈкве ханисьтэ̄н, мāныр Ам нāнанн лāвсум; ос вāēн, Ам нāн ётын кāсыӈ хōтал йис холнэтэ мус та ōлэ̄гум тах. Аминь”.
Глава 28
