Choose Language
Old Testament Books
New Testament Books
view with a second Bible
1 Тōнт Ӣсус палт Иерусалимныл фарисейт ос Сāккон ханисьтан хумит ёхтысыт ос лāвсыт:2 ”Манрыг Наӈ ханистахтын хумиянын пēс-йис мāхманув потыр сирыл ат ōлэ̄гыт? Кāтаныл ат ловтэ̄гыт, хунь тэ̄ӈкве ōвылтахтэ̄гыт”.3 Тав тāнанылн ювле-лāвыс: ”Нāн ос манрыг нāнти пēс-йис потрын мāгыс Тōрум сāккон сирыл ат ōлэгы̄н?4 Тōрум май ты лāвыс: ‘Āсин ос ся̄нин янытлэ̄лын’, ос: ‘Āсе ман ся̄не ля̄выльттан хōтпа сōрумн вос паты’.5 Ос нāн май лāвēгын: ‘Хотъют āсен ман ся̄нен лāви: Мāныр наӈынн āнумныл виӈкве э̄рыс, таи ам Тōрумн мӯйлуптаслум,6 таи вēрми такви āсēн, манос такви ся̄нэ̄н ат нё̄туӈкве’. Пēс-йис потрыт мāгыс нāн Тōрум лāтыӈ мōт сирыл та вāрыслын.7 Китвильтуп мāхум! Ёмсякв Тōрум лāтыӈ тотнэ хумн Исаян нāн ты намтвесы̄н:8 ‘Ты мир Āнум сӯпыл-нēлмыл янытлыяныл. Тāн сыманыл ос Āнумныл э̄лн ōлэ̄гыт.9 Тāн наскассыг Āнум янытлан вāрмалит ōньсияныл, туп э̄лумхōлас ханисьтан лāтӈыт тāн ханисьтыяныл’”.
10 Мир ляпан-вōвим Ӣсус тāнанылн лāвыс: ”Хунтлэ̄н ос торгамтэ̄н:11 Таин хунь э̄лумхōлас иксямы̄г вāраве, мāныр сӯп кӣврен сялты, иксямыг таин вāраве, мāнырсыр лāтӈыт тав сӯп кӣвреныл кōналь-ю̄выт”.12 Тōнт Тав ханисьтахтын хумиянэ Тав пōхатэн йисыт ос лāвсыт: ”Наӈ вāглын ман āти, фарисейт ты лāтӈыт хунь хӯлсыт, хот-кантмувēсыт?”13 Тав ос ювле-лāвыс: ”Кāсыӈ яныгман йӣв, Ам Тōрум Āсюмн ке ат ӯнталавес, тах тāрыӈ тāгыл нох-манувтаве.14 Фарисейт хультуптэ̄н! Тыи сампыльттāл мāхум вāнттавет сампыльттāл хōтпатн. Ос хунь сампыльттāл хōтпа сампыльттāл утын вāнттаве, тōнт сас тах вōӈхан та рагатэ̄г”.15 Пēтыр Тавēн лāвыс: ”Ты лāтӈын мāнавн толмасьлэ̄лын”.
16 Ӣсус лāвыс: ”Нāн ман ань мус иӈ ат торгамтыяны̄н?17 Таи ман ос ат торгамтылы̄н, пуссын сӯп кӣвырн сялтнэ тэ̄п нāн пуки тāран кональ та паты тах?18 Ос сӯп кӣвырныл йинэ ут – таи сым кӣвырныл юв, таин ты э̄лумхōлас иксямы̄г вāраве.19 Ос кантыӈ номтыт, э̄лумхōлас алнэ ос мōт хум нэ̄ ёт ōлнэ вāрмалит, лю̄ль карек вāрмалит, тӯлмантан, урккыӈ ос Тōрум лю̄камтан вāрмалит сымныл та нэ̄глэ̄гыт.20 Тыи ты э̄лумхōлас иксямы̄г вāри, ос хōт ат ловтым кāтыл тэ̄нэ вāрмаль – таи э̄лумхōлас иксямы̄г ат вāритэ”.
21 Тувыл кон-квāлмет Ӣсус Тир ос Сидон мā ēр нупыл минмыгтас.22 Ос Тав палтэ та мāт ōлнэ акв хананеянка*а нэ̄глыс, Тавēн рōӈхыс: ”Āнум сāлитэн, Кӯсяй, Давид Пы̄г! Ам āгим кулил вуим ōлы”.23 Ос Тав тавēн ювле нэ̄матыр лāтыӈ ат лāвыглалыс. Ос ханисьтахтын хумиянэ Тав пōхатэн ёхтуманылт пōйксясыт: ”Таве тāратэ̄лн, мāн юй-пāлувт та рōӈхи”.24 Ӣсус ос ювле-лāвыс: ”Ам Израиль мāхум хот-тыпум пāлят палт туп кēтым ōлэ̄гум”.25 Ос нэ̄ ляпан-йим Тав э̄лы-пāлн сāнсагēн ёл-патым лāвыглалыс: ”Кӯсяй! Āнумн нё̄тэн”.26 Ос Ӣсус ювле лāвыс: ”Ня̄нь ня̄врамытныл хот-виӈкве ос кӯтювытн воськасаӈкве ат рōви”.27 Тав лāвыс: ”Тасир та кос, Кӯсяй! Кӯтюврисит ос тāнти кӯсяяныл пасанныл патыглан ня̄нь саквыт тэ̄гыт”.28 Тōнт Ӣсус тавēн ювле-лāвыс: ”О, нэ̄ хотпа! Наӈ агтылын сōль та яныг; вос паты хумус наӈ таӈхēгын”. Та сё̄с āгитэ та пусмыс.
29 Тувыл минас, Галилея ся̄рысь вāтан ёхтыс ос урын хāӈхим тув ӯнтыс.30 Тав палтэ сāв мир ёхтысыт, тāн лāглыл нōхнэ, сампыльттāл, сӯп-нēлмтāл, сакватахтум ос мōт сāвсыр āгмыӈ мāхманыл ёт-ōньсим ёхтысыт. Тāнаныл Ӣсус лāглаге тытн вāнттысаныл, ос Тав тāнаныл та пусмалтасанэ.31 Мāхум кāсаламēт, ōсятахтыглалсыт: сӯп-нēлмтāлыт потыртаӈкве патсыт, сакватахтум мāхум пусмысыт, лāглыл нōхнэ мāхум ё̄мыгтасыт ос сампыльтāлыт кāсалаӈкве патсыт. Тāн Израиль Тōрум янытласаныл.
32 Ӣсус ханисьтахтын хумиянэ ляпан-вōвсанэ, тāнанылн лāвыс: ”Āнумн ты мир сāлӣг ōлэ̄гыт. Тāн Ам ётум хӯрум хōтал ты ōлэ̄гыт, нэ̄матыр тāнанылн тэ̄ӈкве. Ам тāнаныл тэ̄тал тāратаӈкве ат тāӈхиянум, тōнт тах лё̄ӈханылт сяр вāгтāл патэ̄гыт”.33 Тав ханисьтахтын хумиянэ Тавēн лāвēгыт: ”Тасāвит мир тыттын мāгыс, хотыл мāн мир ōлтāл мāт тасāвит ня̄нь выгув?”34 Ӣсус китыглахтас: ”Мансāвит ня̄нь нāн палтын?” Тāн ос лāвсыт: ”Сāт ос матсāвит кем мāнь хӯлквет”.35 Тōнт мирын мā тармыл ёл-ӯнтуӈкве лāвыс.36 Сāт ня̄нь ос хӯлквет вуим, Тōрумн пӯмасипа лāвыс. Лōмтыг-лōмтыг сакватасанэ ос Такви ханисьтахтын хумиянэ̄н мисанэ, ханисьтахтын хумит ос – мирын.37 Ос пуссын тэ̄пьяласыт, пōйтнэ̄г тэ̄сыт. Хультум арыг тэ̄нутыт сāт корсинка тāгыл акван-атсаныл.38 Нила сōтыра сāвит хум ōлыс, нэ̄-хōтпат ос ня̄врамыт коны-пāл.39 Ӣсус мāхум та тāртсанэ, хāпын тāлыс ос Магдала мāн та минас.
*а 22 15:22 хананеянка – таи Хананея нампа мāт хананея мир ōлсыт, та мир халт ōлнэ нэ̄ тав ты.
Глава 15
