Choose Language
Old Testament Books
New Testament Books
view with a second Bible
1 Та торыг Ирод, Галилея пуӈкхум, Ӣсус урыл потрыт хӯнтамлас.2 Ос тав палтэ лусытан утанэ̄н лāвыс: ”Тыи витн тӯлнэ хум Иоан. Тав сорум патыглас, ань ос нōх-ялтыс, таимāгыс ōлыглаттāл вāрмалит тав вāри”.3 Алам Ирод Иоан пувыстэ, таве нэ̄гсаластэ ос Филипп каӈке Иродита нампа нэ̄тэ мāгыс турман колн ӯнттыстэ,4 Иоан тавēн лāвме мāгыс: ”Наӈын ат рōви каӈкын нэ̄ ōньсюӈкве”.5 Ирод таве алуӈкве таӈхыстэ, ос мирныл пилыс, та хум Тōрум лāтыӈ тотнэ хум мāгыс ōлнэтэ, янытлавес.6 Ирод самын патум хōталт Иродита āгитэ мӯйлын мāхум э̄лы-пāлт йӣквыс. Ирод пӯмсялахтым āги нупыл сунсыс.7 Тав тōнт мир э̄лы-пāлт тāк лāтыӈ лāвыс, āги мāныр вōви, таил тах мы̄гтэ.8 Тав ос, хумус ся̄нен ханисьтавес, ля̄галас: ”Тыт, пāнт āны тармыл витн тӯлнэ хум Иоан пуӈке āнумн маēлын”.9 Хōн руталӣг ēмтыс, ос мӯйлын мāхманэ э̄лы-пāлт лāвум тāк лāтӈэ мāгыс, тавēн таи миӈкве лāвыс.10 Ос хумитэ Иоан пуӈке хот-сāграпан мāгыс кāснаколн кēтыстэ.11 Ос пуӈк пāнт āны тармыл пиным тотвес ос āгин майвес, тав ос такви ōматэ палт тотыстэ.12 Ханисьтахтын хумиянэ ёхтысыт, тав алпитэ висаныл ос ёл-сё̄питасаныл. Тувыл тāн минасыт, та вāрмаль урыл Ӣсусн лāвсыт.
13 Ты урыл хӯлым, Ӣсус тактетэ мир ōлтāл мāн хāпыл минас. Мāхум, та урыл хӯлманылт, тāнти ōлнэ ӯсанылныл Тав юй-пāлэт лāглыл ё̄мсыт.14 Хунь Ӣсус пāг-квāлыс, сāв мир кāсалас. Тав тāнаныл сāлитасанэ ос тāн āгвмыӈ хōтпаныл та пусмалтасанэ.15 Хунь э̄типалāг ēмтыс, Тав палтэ ханисьтан хумиянэ ёхтысыт ос Тавēн лāвсыт: ”Тыт мир ōлтāл мā ос э̄тиӣг та ēмты. Мāхум тāратэ̄н, лāкква вос миныглэ̄гыт, пāвлытн тāнти мāгсыланыл тэ̄нут ёвтуӈкве”.16 Ӣсус тāнанылн лāвыс: ”Тāнанылн ат э̄ри минуӈкве, нāн тāнанылн тāйм маēн”.17 Тāн ос Тавēн лāвēгыт: ”Мāн тыт туп ат ня̄нь ос кит хӯл ōньсэ̄в”.18 Ос Тав лāвыс: ”Таит Ам палтум ты̄г тотэ̄н”.19 Мāхум пумыӈ мāн ёл-ӯнтуӈкве лāвсанэ, ос ат ня̄нь ос кит хӯл кāтэ̄н вуим, тōрум нупыл сунсыс, пӯмасипа лāвыс ос ня̄нит лōмтыг сакватым ханисьтахтын хумиянэ̄н мисанэ, ос ханисьтахтын хумиянэ – мāхумн мисаныл.20 Пуссын мир пōйтнэ̄г тэ̄сыт. Ос хультум арыг тэ̄нутыт китхуйплов хусап тāгил атсыт.21 Нэ̄ хōтпат ос ня̄врамыт тāл атахкем сōтыра мāхум тэ̄сыт.
22 Тāра та Ӣсус ханисьтахтын хумиянэ хāпын тāлуӈкве ос Тав э̄лы-пāлэт та пāлн минмыгтаӈкве лāвсанэ. Тав та сыс мир юв-тāртыянэ.23 Хунь мир тāртасанэ, Тав тактетэ пōйксян мāгыс урн нōх-хāӈхыс. Э̄типалāг тот тактетэ ōлыс.24 Хāп ос ся̄рысь котильт ōлыс, тав хумпытн ратвес, ля̄льт вōт вотыс.25 Э̄ти, нилахкем сё̄с порат Ӣсус тāн палтаныл ся̄рысь хосыт ё̄мим минас.26 Ханисьтан хумиянэ Таве ся̄рысь хосыт ё̄мим кāсаласаныл, хот-рохтысыт ос лāвыглалсыт: ”Ты исхор!” Пилым, рōӈхалтахтасыт.27 Ос Ӣсус тāра тāн ётаныл потыртаӈкве патыс ос лāвыс: ”Торамлэ̄н! Ты Ам, ул пилэ̄н”.28 Пēтыр Тавēн ювле-лāвыс: ”Кӯсяй! Тыи сōль Наӈ ке, āнумн Наӈ палтын вит хосыт минуӈкве лāвен”.29 Тав ос лāвыс: ”Ё̄мен”. Хāпыл квāлым, Пēтыр вит хосыт та ё̄мыс, Ӣсус пōхан ёхтын мāгыс;30 Ос яныг вōт кāсалым хот-рохтыс ос витын сялтуӈкве патыс. Пēтыр рōӈхалтахтас: ”Кӯсяй! Āнум вēстэ̄лын”.31 Ӣсус тāра та кāтэ тактыстэ, таве пувумтастэ ос тавēн лāвыс: ”Мосься агтыл ōсьнэ хум! Манрыг наӈ ёмсякв ат агтсын?”32 Ос хунь тэ̄н хāпын тāлсыг, вōт хот та пōйтыс.33 Хāпыт ōлум хумит Тавēн пуӈк пинсыт ос лāвсыт: ”Сōль та Наӈ Тōрум Пы̄г”.
34 Ся̄рысь та палн минаманылт, Геннисарет нампа мāн пāг-пӯхтысыт.35 Хунь та мāт ōлум мāхум Таве ханьсисаныл, та урыл та мā янытыл лāтыӈ тāртасыт ос Тав палтэ пуссын āгвмыӈ мāхум тотвесыт.36 Тāн Ӣсус пōйксясаныл: Тав маснут ерн āгвмыӈ мāхум карсмахтуӈкве вос тāртыянэ. Хотъютыт карсмахтасыт, пуссын та пусмыгласыт.
Глава 14
