Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
«КЕСАРЕННЕСЬ КЕСАРТИ, ШКАЕННЕСЬ ШКАЙТИ»
Кристосонь паронь канды валонза и тевонза эсьстост лихнезь фарисейхнень. Синь эсь ётковаст арьсекшнесть, кода кундамс Исусонь вал лангса. Синь кучезь тейнза эсь тонафниснон, сят мярьгсть сондейнза: «Тонафты, минь содасаськ тон видешисат, афкукс тонафтат Шкаень кити, киндинге аф паронтфтат пря и сембе инголет фкат. Ина азк тейнек: кода тон арьсят? Кесарти пандома каяфкс али аф?» (Кесарсь – тя Римонь империянь оцязор, конань кядяла ся пингоня ульсь Палестинась).
Фарисейхнень кизефкссна путфоль пяк ёжуста. Мярьгондяряль Исус – кесарти эряви каяфкс пандомс, эста сонь муворгофтолезь прянь мимаса и Римонь вятихнень ширеснон кирдеманкса. Мярьгондяряль – аф эряви пандомс, эста сонь лемделезь Римть каршес моликс.
Исус марязе синь ваймонь кичкорямаснон, мярьгсь: «Месть тяряфнесамасть, шамафкссот? Няфтеда тейне ярмак, мезьса пандови каяфкссь». Синь кандсть динария. Исус кизефтезень: «Кинне тяса шамаликсь и сёрматфсь?» Фарисейхне каршезонза: «Кесарть». Эста Азорсь мярьгсь тейст: «Тяфта макссесть кесарти кесареннеть, а Шкайти Шкаеннеть». Тянь кулемста синь дивандазевсть, кадозь сонь, тусть.
Тяда меле Исус мярьгсь ломаттненди и тонафниензонды: «Койти тонафтыхне и фарисейхне озасть Моисеень озама вастс. Семботь, мезе синь мярьгихть ванфтомс, ванфтость и тиесть. Аньцек тевснон коряс тяда тиенде, сяс мес синь синць аф пяшкотькшнесазь сянь, мезти тонафтыхть. Синь сотнекшнихть аф кандовомшка канкст и лапиесазь ломаттнень лафтус, синць сурснонга аф шерьфтьсазь; сембе тевснон тиендьсазь ломаттненди прянь няфтеманкса...»
МАТВ. 22:15-22, 23:1-5
398 
