Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ОЗИЯ ОЦЯЗОРТЬ ПРЯНЬ НЯЕМАЦ И ШУМОНЬ ПАНТФТОМАЦ
Иудань масторса Озия*а ульсь кемонце оцязоркс. Тейнза кемготува кизоль, мзярда озась оцязор вастти, и оцязорондась Ерусалимса ведьгемонь кафтува киза. Тиендсь сон Шкайть мяльс тушенды тефт. Озия покодсь Шкайти Захария озксвятить пингста, ся тонафнезе Шкайда пелема. Мзярда пшкятькшнесь Азорти, Шкайсь лездсь тевсонза, и сонь лемоц пачкодсь мянь Египету.
Озия стяфтсь башнят Ерусалимса, шувсь веденди оцю лоткт, сяс мес ламоль ракшадонза. Сонь ламоль и сокайдонза-видидонза, имож шуфтонь касфнидонза, сяс мес кельгозе сокаеньвидиень тевть. Ульсь Озиянь оцю ушмовиецка. Озия аноклась марнек ушмовиенцты ваксарщапт и тюрембяльхть – семботь, мезе эрявсь. Сон тись Ерусалимса ёнюста арьсеф машинат, конат ляцендсть оцю кевса и налса.
Виикс арамстонза сон кармась няемонза прянц, и тя вятезе аф парс. Сон арась зиянонь тиикс Шкайть инголе, сяс мес сувась шкайкуду ладанонь качакафтома. Азария озксвятись и мархтонза кафксогемонь озксвятихне стясть Озия оцязорть каршес, мярьгсть тейнза: "Аф тейть, Озия, качакафнемс Азорти; тя тевсь озксвятихнень. Листь озондома кудста, сяс мес тон тиеть койхнень каршес, и аф лувови тя тейть цебяренди Азороньконь Шкайть инголе". Лаказевсь Озиянь кяжец озксвятихнень лангс качакафтомань кядьготь кирдемста и пелькс тазурмась эзк эвондась конязонза.
Варжакстсь лангозонза Азария озксонь прявятись, сембе озксвятихне; вов, пелькс тазурмась сонь конясонза. Куроконе панезь сонь тоста, сонцьке ни эряскодсь тумс, сяс мес Азорсь апалязе сонь. Озия оцязорсь мянь куломозонза сярятькшнесь тя пелькс урмаса, эрясь башка кудса, аерфтафоль Азорть кудстовок. Иоафам цёрац вятезень оцязоронь тефнень.
2 КИЗОДА КИЗОНЬ 26
*а Лия лемоц Азария.
208 
