Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
СОЛОМОН И САВАНЬ ОЦЯЗОРАВАСЬ
Библиянь тя азкссь ёфни, кода Савань оцязоравась якась инжикс Соломононди. Лувондови, сонь мастороц ащесь Аравиять лямбе-шинь мадомань ширеса, афоли тяниень Ементь модаса.
Савань оцязоравась кулендсь Соломононь колга и сянь, мезе сон тиендсь Азорть лемонц кеподеманкса. И вов оцязоравась арьсесь молемс Соломононди содамонза: видекс али аф сон тяшкава смузю. Сон сась Ерусалиму пяк оцю козяши мархта. Верблюттнень лангс повфнефтольхть канкст, эсост танцти шине вай, пяк лама зрня, питни кевнят. Оцязоравась сась Соломононди, корхнесь мархтонза семботь колга, мезе кирдсь седисонза. Соломон панжезень тейнза валонзон мяльёжеснон; оцязорти мезевок ашель стама, мезе сон афоль орада. Савань оцязоравась няезе Соломононь марнек смузенц. Сон няезе, кода эряйхть ломаттне Соломононь кудса, кода синь сафнесазь тевса, мезьда синь ярхцайхть-симихть. Сон няезе сяньге, кода Соломон макссесь Шкайти плхтамань озказне. Оцязоравась ашезь кирде сяда тов, мярьгсь Соломононди: "Сембось виде, мезе кулень масторсон тефнень и смузцень колга. Аньцек ашень кема ня валхненди, мзярс ашень са и ашине няе тянь эсь сельмосон. Вов, тейне пялецка апак астоль. Смузьшидот и козяшидот сяда лама кульфть коряс. Вельф павазуфт тонь ломаттне, вельф павазуфт покодихневок, конат най инголет и марясазь смузьшицень! Улеза шнаф Азорсь, Шкайце, кона макссь пара мяль путомс тонь Израилень оцязоркс! Мес Азорсь кельгсы Израильть, сяс путонзе оцязоркс, судендамань и видешинь тиема".
Оцязоравась казсь Соломононди лама зрня, пяк лама танцти шине вай и питни кевнят. Соломон оцязорське, ся казнеда башка, конатнень сон казезень Савань оцязоравати эсь кятть, максозе тейнза семботь, мезе ся ёрась и мезе анась. Тусь оцязоравась меки эсь масторозонза, сонць и сембе покодиензовок.
ОЦЯЗОРХТ 3-ЦЕСЬ 10:1-13
182 
