Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ШКАЕНЬ СОТКСОНЬ АРЗЯСЬ ЕРУСАЛИМСА
Мзярда Давид арась марнек Израилень оцязоркс, сон тиезе оцязоронь озама вастонц Ерусалимса. Сонь мялецоль кирдемс Шкаень сотксонь иняру арзять маласонза, эсь ошсонза. Тя арзять фкя тюремаса нельгозь и ворьфтезь филистияннетне. Меле синь меки мрдафтозь арзять израилень ломаттненди и сон ванфтовсь Кириат-Яримса Амидавонь кудса.
Весть Давид кочкась пяк лама ломань и тусь арзять инкса. Сон аф азомшка павазуволь, мзярда арзять сувафтозь Ерусалиму и куцьфтезь Сион панда пряв. Сон шназе ляпе вайме Шкайть арфаса седязь и кенярдемада кштись Азорть инголе. Марнек ломаньтналське, вярьгак вайгяльхть юватькшнезь и турамаса туразь, шназе Шкайть. Арзясь ладяфоль котфонь кошу, кона тифоль тейнза. Сямольде Давид макссь Азорти плхтамань и лия озказнет. Озказнень максомада меле сон бславазе ломаньтналть Саваоф Азорть лемса, явондсь ломаттненди кши, цюкорнят и рястаф сиволь.
Тяда меле Азорсь макссь вал Давидонди – кемокстамс сонь кудъюрхтонцты оцязорксшить. Сон кучезе Нафан шкаймаряенц азомонза Давидонди: "Тонь цёраце стяфты монь лемозон шкайкуд, и мон сембе пингс кемокстаса сонь оцязоронь вастонц. Тонь юрце и тонь азорксшице фалу улихть кемот."
Тянь кулемста Давид арась Азорть инголи и ушедсь озондома: «Киян мон, Азорозе, Азорозе, мезе тяфтамсь кудъюрхтозе, мес тяшкава кеподемайть!... Семботь коряс инь оцюват, Азорозе, Азорсь! Аш тонь кодямот лия, и аш Шкай тондедот башка... Тяни, Шкай Азорозе, кемокстак сембе пингс валцень, конань азыть урецень и сонь кудъюрхтонц колга, пяшкотьк сянь, мезе азоть».
ОЦЯЗОРХТ 2-ЦЕСЬ 6:2-19; 7:14-16, 18-29
168 
