Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
ДАВИД И ГОЛИАФ
Филистияннетне тага кочказь ушмовийснон израилень ломаньтналть каршес. Давидонь колма альняканза тусть Саулонь ушмовиенц мархта. Аф ламос ащезь аляц кучезе Давидонь альняканзонды кшинь кандома, сияк содамс шумбрашиснон и кодамот ашсна.
Мзярда Давид сась израилень ушмовийхненди и ётась альняканзонды, апак учт няйсь филистиянь кабаконашка ушман, лемоц Голиаф. Сон щафоль серень щамса, прясонза серень такия*а, фкя кядьсонза кирдсь кабаконашка сялгом, омбоцеса – ваксар*б. Голиаф рахсесь Шкаень ломаньтналть лангса, сялдозе эрек Шкайть. Сон корхтась: кда израиленнетнень ёткста кивок сяськсы сонь, эста филистияннетне арайхть тейст урекс. Израилень ломаттнень ёткста киньге ашезь сата отькорьшиц лисемс мархтонза тюрема, сяшкава эвфтезень и таяскофтозень сятнень Голиаф эсь калопсонза*в.
Давид нажядсь Саулонди и эняльдсь нолдамс сонь Голиафонь мархта тюрема. Саул мярьгсь тейнза: "Тон нинге цёрокшат, а сон одстокиге ушман". Давид азондозе Саулонди, кода ракшань ваномста Шкайсь лезнесь тейнза сяськондемс лефнень и офттнень. Эста Саул щафтозе цёрокшть серень щамса и такияса. Аньцек Давид ашезь тонада тяфтама адерлямати и каязень лангстонза ня щапнень. Сяльде сявозе кядезонза байдеконц, кочкась вадяв вете кефт шудерьксста, путозень ваныень кяскавнязонза и лиссь филистияннеть каршес.
Голиаф, кодак няезе тейнза моли Давидонь, ушедсь рахсемонза, корхтась: "Мес молят лангозон байдекса? Кали мон пинян?" Давид тейнза: "Тон молят каршезон торса и сялгомса, а мон молян каршезт Саваоф Азорть, израилень ушмовийть Шкаенц лемса, конань тон сялдыть". Сяльде Давид сатсь кяскавнястонза кев, ёрдазе сонь шнапеса и вачкодезе Голиафонь видеста коняти. Ся кулофста эзк прась модать лангс. Филистияннетне няезь, кода шавовсь вии ушманцна, кармасть ворьготькшнема. Израилень ушмовийсь сяськозень синь.
ОЦЯЗОРХТ 1-ЦЕСЬ 17:1-53
*а Такия – кшнинь вазь; шлем.
*б Ваксар – щит.
*в Калоп – ланга ванозь ронгсь-пондсь.
160 
