Библейские рассказы
Выбрать язык
Выбрать рассказ Ветхого Завета
Выбрать рассказ Нового Завета
КОРЕЕНЬ, ДАФАНОНЬ И АВИРОНОНЬ ШУМОНЬ ПАНТФТОМАСНА
Азорсь кошардозе израилень ломаньтналть кулхцондомс Моисеень, сяс мес Сонць Шкайсь путозе тейст смузю вятикс. Аньцек весть ащема вастсост кеподсь таколдома. Кафта сятт ведьгемонь ломань, конатнень кеподезь Корей, Дафан и Авирон, арасть Моисеень каршес. Синь сяда тов ашель мяльсна кулхцондомс Моисеень и апряказь сянкса, мес сон путнесы прянц лиятнень ваксста сембода оцюкс.
Тянь кулезь, Моисей серьгядезе Израилень марнек ломаньтналть. Азорть кошардоманц коряс сон мярьгсь тейст аердомс Кореень, Дафанонь, Авирононь кошснон ваксста, киндивок аф токафнемс кядьснон сятнень паршиснонды. Тяда меле Моисей мярьгсь: «Тянь эзда содасасть, Азорсь кучемань сембе ня тефнень тиема, аф эсь мяльсон тиендьса тянь. Кда синь кулыхть лия ломаттнень лаца, эста аф Шкайсь кучемань. Но тиендяряй Азорсь мезевок сельмоса аф няентьф, кда модась афтсы эсь кургонц и нильсыне синь, эста содасть, ня ломаттне мезькскаашезь лува Азорть».
Аньцек кенерсь Моисей азомс ня валхнень, модась сятнень ала озась. Афтозе модась кургонц, нилезень Кореень, Дафанонь, Авирононь синцень, кошснонга, сембе ломаньцнонга, сембе паршиснонга. Тусть эрекста модаварять пачк сембоснон мархта, мезьсна ульсь, модась вельхтязень синь, юмасть синь ломаньтналть ёткста. Израилень сембе ломаттне, конат перьфкастольхть, тусть ласькозь сятнень пижеста пешкодомаснон эзда, синць корхтасть: миньге афолемазь ниле модась. Ляды кафта сятт ведьгемонь ломанть, каршек кеподихнень, плхтазень менелень толсь, синьге кулость.
Тяфта Шкайсь няфтезе сембонди, конашкава пелькс кепсемс сонь мяленц каршес.
ЛУВКСТ 16:1-3; 23-25
114 
