Выбрать язык
Выбрать рассказ Ветхого Завета
Выбрать рассказ Нового Завета
Сатучо-влак Иосифым Египетыш конденыт. Тушто тудым фараонын оролжо-влакын Потифар лӱман вуйлатышышт шкаланже оксала налын.
Юмо Иосифым кудалтен огыл, эреак йӧным ыштен шоген. Иосифын кидыштыже чыла паша ушнен шогымым ужын, тудлан Юмо полшымым Потифар умылен. Садлан Потифар Иосифым чот пагален, тудлан ӱшанен, чыла озанлык пашам вуйлаташ, уло погыжым ончаш шогалтен. Иосифлан кӧра Юмо Потифарын сурт велке моткоч поро лийын.
Иосиф кап-кыл денат, шӱргывылыш денат моткочак шинчалан перныше лийын. Садлан тудым Потифарын ватыже йӧратен шынден. Юмылан ӱдырамаш ӱшанен огыл, Юмылан мо келшымым пален огыл да Иосифым яжарланыме сулыкыш пурташ тӧчен. А Юмым йӧратыше Иосиф тореш лийын да каласен: «Кузе мый Юмын ончылно тыгай осал пашам, языкым ыштен кертам?!»
Иосифым языкыш пурташ лийдымым ужмеке, Потифарын ватыже тудлан ӱчым шукташ шонен пыштен. Марийжылан тудо тыге ондален ойлен: «Тый мемнан суртышкына кулым конденат. Тиде кулет мыйым виешлаш толын ыле». Тыгайым колмеке, Потифар Иосифлан моткоч шыдешкен. Ватыжын шоя мутшылан кӧра Иосифым кучен да кугыжан казаматышкыже петырен шынден.
26 