Выбрать язык
Книги Ветхого Завета
Книги Нового Завета
с русским текстом1«Нош тон, адямилэн пиез, Гоглы пумит азьпалзэ тодытыса вера, солы шу: ”Тазьы шуэ Инмар Кузё-Инмар: тани, Мон, Гог, Рошлэн, Мешехлэн, Фуваллэн эксэез, тыныд пумит султӥсько!2Тонэ берыкто, тонэ нуо, тонэ уйпал шаерлэн пумысьтыз потто но Израиль гурезьёсы ваё.3Паллян киысьтыд пукыӵтэ шуккыса уськыто, бур киысьтыд пукыӵ ньӧлъёстэ ыргыто.4Израиль гурезьёсы тон погралод, тон но, тынад вань ожгарчиосыд но, тонэн ӵош улӥсь калыкъёс но; тонэ пӧртэм пумо сьӧсь тылобурдоослы, луд пӧйшуръёслы сиыны сёто.5Кыр бусые погралод; уго тае Мон верай, – шуэ Инмар Кузё-Инмар.6Магог музъем вылэ, шормуӵъёсын сюлмаськытэк улӥсьёс вылэ тыл лэзё, соку тодозы, Мон – Кузё-Инмар.7Аслам Израиль калыке пӧлын Аслэсьтым дун-сьӧлыктэм нимме тодмо каро, Аслэсьтым дун-сьӧлыктэм нимме сантэманы азьланяз эрик уг ни сёты, соку калыкъёс тодозы, Мон Кузё-Инмар, Израильлэн Святоез шуыса.
8Тани, та лыктоз, та быдэсмоз, – шуэ Инмар Кузё-Инмар, – та со нунал, кудӥз сярысь Мон верай.9Соку Израиль городъёсысь улӥсьёс потозы но тыл ӝуатозы, ожмаськон тӥрлыкез, щитъёсты, корт дэремъёсты, пукыӵъёсты, пукыӵ ньӧлъёсты, ожмаськон дыбечъёсты, шибодыосты сутозы, сизьым ар ӵоже соосты сутыса улозы.10Бусыысь пу уз вае, нюлэскысь писпуэз уз коралэ, ожмаськон тӥрлыкъёсты гинэ сутыса улозы; таласьёссэс – талалозы, качасьёссэс – качалозы, – шуэ Инмар Кузё-Инмар.11Со нуналэ тазьы луоз: Израиль музъеме, зарезь дурысен шундыӝужан пала кыстӥськись, мынӥсь-ветлӥсьёслэн нёжалазы Гоглы шайгулы инты сёто, со шайвыл мынӥсь-ветлӥсьёсты ӝегатыса возёз; Гогез, солэсь вань кулэм мурт уллёзэ отчы ватозы, соку со интыез ”Гоглэн уллёезлэн нёжалэз” шуыса нималозы.12Музъемез дун-чылкыт карон понна израиль калык соосты сизьым толэзь ӵоже ватоз.13Та музъемын улӥсь вань калык соосты ватоз, Асме данэ поттон нуналы соос дорын данъямын луоз, – шуэ Инмар Кузё-Инмар.14Адямиосты та понна висъяны кулэ: соос музъем вылтӥ, пыр потаса, мед ветлысалзы но музъем вылэз чылкыт карон понна музъем вылэ ватытэк кылемъёсыз мынӥсь-ветлӥсьёсын ӵош мед ватысалзы; сизьым толэзь ортчем бере озьы утчаса ужаны кутскозы.15Музъем вылтӥ пыр потаса ветлӥсьёсыз пӧлысь кин ке адями лыэз адӟиз ке, кулэм ватӥсьёс сое Гоглэн уллёезлэн нёжалаз ватытозязылы со вӧзы пус пуктоз.16Городлэн нимыз но луоз: Гамона [уллё]. Озьы соос музъем вылэз чылкытатозы”.
17Нош тон, адямилэн пиез, – тазьы шуэ Инмар Кузё-Инмар, – вань тылобурдоослы, вань луд пӧйшуръёслы тазьы шу: ”Вань палъёсысь потыса, Мынам тӥ понна курбон сётонэ доры лыктэ, люкаське, Израиль гурезьёсысь туж бадӟым курбон доры лыктэ, курбонме тӥледлы дасяло – сӥль сиёды, вир юоды.18Кужмоослэсь сӥльзэс сиёды, музъем выл эксэйёслэсь, такаослэсь, ыжпиослэсь, кечъёслэсь, ошпиослэсь, Васанысь вань куайытэмъёслэсь вирзэс юоды.19Тӥ понна курбонлы вандэмелэсь кӧйзэ кӧтты тырытозь сиёды, вирзэ кудӟытозяды юоды.20Ӝӧк сьӧрам пуксьыса, кӧттэс тыроды валъёсын, вал вылын пукисьёсын, кужмо воргоронъёсын, пӧртэм ожгарчи муртъёсын, – шуэ Инмар Кузё-Инмар”.
21Калыкъёс пушкын Аслэсьтым данме возьмато, вань калыкъёс суд лэсьтэмме адӟозы, соос вылэ понэм киме адӟозы.22Израиль калык соку тодоз: туннэ нуналысен кутскыса пумтэм нуналозь Мон – Кузё-Инмар, соослы Инмар луисько.23Соку калыкъёс тодозы, израиль калык шонертэм улэмез понна мукет интые улыны интыямын вал шуыса; Мон азьын кескичъяськыса улэмзы понна Аслэсьтым ымнырме соослэсь ватӥ, соосты тушмонъёссылэн киулазы сётӥ, – ваньзы соос меч улын быризы.24Юрӟым-кырсь, законлы пумит улэмзы понна соослы озьы лэсьтӥ, ымнырме соослэсь ватӥ.
25Соин тазьы шуэ Инмар Кузё-Инмар: табере Иаковез пленысь берыкто, быдэс израиль калыклэсь сьӧлыксэ кушто, Аслэсьтым дун-сьӧлыктэм нимме данэ поттон понна туж но туж тыршисько.26Ас музъемазы кышкатэк улыны кутскизы ке, асьсэлэсь сӥтэм-сантэм луэмзэс шӧдозы, Мон азьын законлы пумит лэсьтэм вань ужъёссылэсь возьдаськозы, соку нокин но соосты уз ни курдаты,27соосты калыкъёс пӧлысь берен ваем берам, тушмонъёссылэн музъемъёсысьтызы поттыса огазе люкам берам, трос калыкъёслэн син азязы Аслэсьтым дун-сьӧлыктэм луэмме соос пыр возьмато.28Калыкъёс пӧлы пазьгем берам нош ик соосты, одӥгзэ но отчы кельтытэк, ас музъемазы люкай ке, соос тодозы: Мон – Кузё-Инмар, соослэн Инмарзы.29Соку Аслэсьтым ымнырме соослэсь уг ни ваты, малы ке шуоно Израиль калык вылэ Аслэсьтым Духме кисьто», – шуэ Инмар Кузё-Инмар.
Глава 39