Выбрать язык
Книги Ветхого Завета
Книги Нового Завета
с русским текстом1Кузё-Инмар дорысь мыным верамын вал:2«Тон, адямилэн пиез, Тир понна кыласа-бураса бӧрдыны кутскы,3Тирлы, зарезе пырон доры интыяськемлы, трос шормуӵъёсысь калыкъёсын вузкарисьлы вера:
”Тазьы шуэ Инмар Кузё-Инмар: Тир! Тон шуиськод:
”Мон – вань чеберъёс пӧлысь самой чеберез!”
4Тон зарезь шоры интыяськемын;
тынад лэсьтӥськисьёсыд тонэ чеберлэсь но чебер каризы;
5тынэсьтыд палубаостэ Сенирысь ваем кипарис пулъёслэсь
лэсьтылӥзы;
мачтаостэ лэсьтыны Ливанысь кедырпуосты октӥзы;
6полысъёстэ Васанысь ваем тыпыослэсь лэсьтӥзы;
пуконъёстэ букпулэсь лэсьтӥзы,
Киттим шормуӵъёсысь ваем слон лыэн дуръёссэ шобыртӥзы;
7тӧлпоостэ Египетысь ваем чибориё дэралэсь вуризы,
флаг интыын вал соос;
Елиса шормуӵъёсысь ваем чагыр, нап-горд басмаослэсь
вуремын тынад шобретъёсыд.
8Сӥдонын но Арвадын улӥсьёс тон дорын полысаса улӥзы;
Тир, тынад аслад усточиосыд вал,
соос тон дорын пыж валтӥсьёс вал.
9Гевалысь тӧроос, солэн усточиосыз,
пыжедлэсь пасьёссэ тупатъяса, тон дорын улӥзы.
Вань зарезь пыжъёс но соосты валтӥсьёс
вузкарон уждэ нуон понна тон дорын улӥзы.
10Персияысь, Лидияысь, Ливияысь пиос тынад армияд
служить каризы, соос тынад ожгарчиосыд вал,
тон вылэ щит, корт изьы ошылӥзы;
тонэ данлыко карылӥзы.
11Арвад пиос тынад ожгарчиосыныд ӵош котыр борддор кузяд сылӥзы, Гамадимъёс каланча йылъёсад сылӥзы; быдэсак борддор кузяд колчанъёссэс ошылӥзы; озьы соос тонэ чеберлэсь но эшшо чебергес каризы.
12Фарсис, тонэн вузкарись, трос узырлыкез ванен тынэсьтыд вуздэ азвесь, корт, узвесь, тӧдьы узвесь тырыса октылӥз.13Иаван, Фувал, Мешех тонэн вузкаризы, тынэсьтыд вуздэ басьтон понна ляльчиоссэс, ыргон тӥрлыксэс тыныд ӵектылӥзы.14Фогарма юртысь тынад вузъёсыд понна ужан валъёссэс, оже мыныны ярамон валъёссэс, мулъёссэс вайылӥзы.15Дедан пиос тонэн вузкаризы; трос шормуӵъёсысь калыкъёс тонэн вузъёсын вошъяськыса улӥзы, коньдон интые слон лы, сьӧд пу тыныд вайылӥзы.16Трос вузэд вань бере, Арамеяын улӥсьёс тонэн вузкарыса улӥзы; вузэд понна дунзэс соос дуно изъёсын, нап-горд басмаосын, пужыё дэраен, виссонэн, марӟан, рубин изъёсын тыризы.
17Иудея но Израиль музъем тонэн вузкаризы; вузъёсыд понна дунзэс Минниф котырын будэтэм чабеен, ческыт сиён-юонъёсын, чечыен, пу вӧйын, бальзамен тыризы.18Тынад туж трос вузэд, пумтэм трос узырлыкед вань бере, Дамаск тонэн Хелбонын поттэм винаен но тӧдьы ыжгонэн вузкариз.19Дан но Узалаысь Иаван вузъёсыд понна дунзэс дурем кортэн тыризы; кассияен, ческыт зын поттӥсь шашыен вуззэс воштыны тон доры ветлӥзы.20Дедан тонэн дуноесь вал шобретъёсын вузкариз.21Аравия но вань Кидар эксэйёс тонэн вузкарыса улӥзы, ыжпиоссэс, такаоссэс, кечъёссэс вузъёсыныд воштылӥзы.22Саваысь но Раемаысь вузчиос самой умой ческыт зын поттӥсь макеосын, олокыӵе но дуно изъёсын тонэн вузкаризы, вузъёсыд понна дунзэс зарниен тыризы.23Харран, Хане, Еден, Сава музъемысь вузчиос, Ассурен Хилмад тонэн вузкаризы.24Соос тонэн дуно дӥськутэн, буртчин басмаосын, пужыё шобретъёсын вузкаризы, соосты, кедырпулэсь лэсьтэм дуно шыкысъёсы лач-лач тырыса, базаръёсад вайылӥзы.
25Фарсисысь зарезь пыжъёс-караванъёс вузъёстэ нуллӥзы;
узырмид, зарезьёс котырысь шаеръёсын данолэсь но дано луид.
26Пыжъёсын полысасьёсыд тонэ бадӟым вуос пушкы вайизы;
шундыӝужанысь пельтӥсь тӧл тонэ зарезьёслэн шоразы куашкатӥз.
27Узырлыкед но, вузъёсыд но, вуз возён кеносъёсыд но, пыжъёсад ужась-тыршисьёсыд, соосын валтӥсьёсыд но, пыжъёсыдлэсь пасьёссэ кышъясьёсыд но, вузкаронэн кивалтӥсьёсыд но, дорад улӥсь вань ожгарчиосыд но, тынад киулад улӥсь вань калык но тынад погран нуналад зарезьёслэн пыдэсазы усёзы.
28Пыж валтӥсьёсыдлэсь куаразэс кылыса, котыр ёрос зуркалоз.
29Ваньзы пыж полысасьёс, пыжын ужась-тыршисьёс,
зарезь вылъёстӥ вань пыж валтӥсьёс,
пыжъёсысьтызы потыса, музъем вылэ султозы;
30тон понна соос шуш куараен кесяськыса бӧрдозы,
мур лулӟиськылозы,
йыр вылазы пень пызьнаса, сюй вылтӥ погылляськыса гыж ветлозы.
31Тонэ жаляса, йырзэс гольык ӵышкозы,
чурыт бышкись дӥськутэн дӥсяськозы;
тонэ жаляса, кӧтӝожлы чидатэк, куараен зар бӧрдозы.
32Ӝожомыса улыкузы, тон пумысен бӧрдыса кырӟаны кутскозы,
тазьы бӧрдыса вералозы:
”Кин Тир кадь зарезь шорын куашкатэмын!?
33Зарезьёс сьӧрысь вуэм вузъёсыныд
трос калыкъёсты тон тыр карид;
аслад уно узырлыкеныд, вузкаронэныд
музъем вылысь эксэйёсты узырмытылӥд.
34Нош табере тон зарезь пыдсы уськытэмын,
вузъёсыд но, пушкысьтыд вань калыкед но ву пыдсы выйизы.
35Тон пумысен шормуӵъёсын вань улӥсьёс куалектӥзы,
соослэн эксэйёссы шӧйӟектӥзы, ымныр тусбуйзы ик воштӥськиз.
36Мукет калыкъёслэн вузчиоссы тонэн мар луэмез тодэм беразы
шултыса лэзизы;
тон кышкатон макелы пӧрмид, –
пумтэм вапумъёс ӵожелы тон ышид-бырид”».
Глава 27