Выбрать язык
Книги Ветхого Завета
Книги Нового Завета
с русским текстом1Кузё-Инмарлэн вожпотонэзлэн корт бодыезлэсьLam01куректон-кайгузэ чидам мурт мон.
2Со монэ валтӥз но пеймыт азе пыртӥз, югыт азе ӧз пырты.
3Озьы, Со мон шоры берытскиз,
быдэс нунал ӵоже Аслэсьтыз кизэ мыным пумит берыктыса улӥз;
4кынартэм-ӟигартэм кельтӥз лулмугорме, куме сурыкмытӥз,
лыосме пыргытӥз;
5кенерен котыртӥз монэ, куректон-кайгуэн, секытлыкен ӝикатӥз;
6кемалась кулэмъёсты музэн монэ пеймыт азе пуктӥз;
7медам поты шуыса, борддорен монэ котыртӥз,
сьӧлтэтъёсме секытомытӥз.
8Нош мон сюлворыса, тэльмырыса вазиськылыку,
Со мынэсьтым вӧсяськемме санэ ӧз поны;
9сюрес вылъёсам излэсь могӟетъёс лэсьтылӥз,
мыдланьтӥз сюресъёсме.
10Мон понна со ватӥськонын пукись гондыр мактал луиз,
ышыг интыысь лев кадь;
11сюресъёсме мыдланьтӥз, монэ кесяз, номыртэк монэ кельтӥз;
12Аслэсьтыз пукыӵсэ золтӥз,
ньӧлъёсты лэзьылыны бельгы-мишень нергелы монэ пуктӥз;
13ньӧл возён сепысысьтыз мынам пекляям ньӧлзэ лэзиз.
14Вань калыке понна мон серекъянлы-веранлы кыли,
нуналлы быдэ кырӟан-веранзылы пӧрми.
15Курыт сиёнэн кӧтме тыриз, курыт юонэн монэ сектаз;
16изъёсын пиньме пыргытӥз, пенен монэ шобыртӥз.
17Мынам лулы дорысь каньыллык кошкиз;
шудбур сярысь мон вунэтӥ,
18но мон шуи: «Быриз мынам кужыме,
Кузё-Инмар вылэ оскиськонэ ышиз».
19Малпа ай курадӟонэ, шугадӟонэ сярысь, курытпот, сэп сярысь,
20мынам лулы тае ялан тодаз возе, мылкыды куашка.
21Тани, оскиськонме юнматыса, мар мон сюлмылы шуисько:
22Кузё-Инмарлэн гажан-жалянэз ванен асьмеос ӧм ыше-быре,
уго Солэн гажан-жалянэз ӧз на быры:
23ӵукналы быдэ со выльдӥське; Тон туж но туж оскиськымон!
24«Кузё-Инмар мынам ӟеч адӟонэ, – шуэ мынам лулы, –
озьыен, Со вылэ оскиськыса уло».
25Кузё-Инмар ӟечлыко Со вылэ оскиськыса улӥсьёс понна,
Сое утчась лул понна.
26Кузё-Инмар дорысь утиськонэз кин чидаса возьма, ӟечлык солы.
27Ӟечлык адямилы, зӥбетэз егит дырысеныз нуэ ке;
28лушкемак кариськыса, чус пуке, улэ ке,
уго Кузё-Инмар со зӥбетэз со вылэ понӥз;
29ымнырыныз сюй вылэ выдыса, со малпа ке:
«Оло нош оскиськон вань на»;
30сое чабкылӥсь пала бамзэ пуктэ ке, ултӥянэз-саптанэз чида ке,
31уго быдэс даур ӵожелы Кузё-Инмар сое уг кельты.
32Куректон-кайгу лэзиз но Ачиз ик Аслаз бадӟым ӟечлыкеныз
сое жалялоз.
33Уго Со Ас сюлэмызлэн куремезъя вӧсь уг кары,
ӝоже уг уськыты адями пиосты.
34Нош музъемлэсь вань жильыетэ шедемъёссэ пыдынызы лёгало ке,
35Ваньмызлэсь Быдӟымлэн син азяз адямиез
шонертэм судить каро ке,
36судын ужзэ сэрттыку-пертчыку, адямиез ӝикатыса возё ке,
Кузё-Инмар уг адӟы шат?
37Кин тае вера: «Луыны кулэ шат сыӵе ужъёс но,
кудъёссэ Кузё-Инмар лэсьтыны ӧз косы»?
38Ваньмызлэсь Быдӟымлэн эрикезъя уг поты-а шугадӟон но,
ӟеч улон но?
39Малы улэп адями ӝожъяське?
Ӝожъяськы аслад сьӧлыкъёсыд вылэ.
40Чаклалом, эскерыса утчалом асьмелэсь сюресъёсмес но
Кузё-Инмар пала берытскоме.
41Сюлэммес но, киосмес но ӝутоме Инмын улӥсь Инмар пала.
42Ми усимы, вогъяськыса-пумитъяськыса улыны кутскимы,
соку Тон милемыз ӧд жаля:
43Тынад вожпотонэд ӝуатскиз но,
Тон милемыз уйылӥд, виылӥд, ӧд жаля;
44Тон пилемен шобырскид,
милям вӧсяськеммы дорад медаз вуы шуыса;
45калыкъёс пӧлын милемды жуг-жаглы, юрӟым макелы пӧрмытӥд.
46Вань тушмонъёсмы ми шоры ымзэс усьтӥзы.
47Шимес улон но гу, куашкам,
пазяськем-таркаськем улон – милям адӟонмы.
48Ӧръяськыса кошкись вуос кадь синвуэ бызе
ас калыкелэн пограмез пумысен.
49Синвуэ кисьтӥське, уг дугды, уго каньыллык уг лыкты, –
50Инмысен Кузё-Инмар учкытозь, Со адӟытозь озьы луоз.
51Городысьтым вань нылъёс понна синмыным адӟеме
лулылы ӝоже усён вае.
52Мынам тушмонъёсы чик нокыӵе но мугтэк,
пичи тылобурдоез кадь,
котькызьы ке но выризы монэ кутыны;
53монэ улэпкын гуэ куштӥзы, изэн монэ лэзьязы.
54Йыр йылозям вуос тубизы; мон шуи: «Мон быри».
55Кузё-Инмаре, мур гуысен мон Тынад нимыдлы вазиськылӥ.
56Тон мынэсьтым куараме кылӥд;
мынам викышъям-вузэмелэсь,
лулӟиськемелэсь Аслэсьтыд пельдэ эн ворса!
57Мон Тыныд вазиськылыку,
Тон матам лыктыса шуылӥд: «Эн кышка!»
58Кузё-Инмаре, лулылэн ужезлы дурбасьтылӥд;
улонме быронлэсь мозмытылӥд.
59Кузё-Инмаре, Тон адӟиськод мынэсьтым кӧтӝожме;
мынэсьтым ужме эскеры!
60Тон адӟиськод соослэсь вань пунэм берыктонъёссэс,
мыным пумит вань малпанъёссэс;
61Кузё-Инмаре, Тон кылӥськод соослэсь тышкаськонзэс,
мыным пумит вань малпанъёссэс тодӥськод,
62мыным пумит урдскисьёслэсь вераськемъёссэс,
котькудаз нуналэ мыным пумит кескич ужъёссэс адӟиськод.
63Учкы, пуко-а соос, султо-а,
мон соос понна серекъян-веранлы пӧрмемын.
64Кузё-Инмаре, кизылэн ужъёсызъя соослы пунэмзэ берыкты;
65сюлэмзэс пеймытомыты, Аслэсьтыд каргандэ соос вылэ лэзь;
66Кузё-Инмаре, соосты йыркурен уйыса мын,
инлэн улӥысьтыз соосты быдты!
Глава 3