Выбрать язык
Книги Ветхого Завета
Книги Нового Завета
с русским текстом1Пленэ шедем Иерусалим калык, Вавилонэ нуэм иудейёс пӧлысь мугор возьмасьёслэн кузёйырзы Навузардан Иеремияез жильыен думылэм дыръяз басьтӥз но сое Рама карысь кошкыны лэзиз. Собере Кузё-Инмар дорысь Иеремиялы верамын вал.
2Мугорез возьмасьёслэн кузёйырзы Иеремияез басьтӥз но солы шуиз: «Инмаред Кузё-Инмар та интылы та шугадӟонэз вераз.3Сое Кузё-Инмар лэзиз но мар вераз, сое лэсьтӥз, малы ке шуоно тӥ Кузё-Инмар азьын сьӧлыкады, Солэсь верамзэ ӧд кылзӥське, со понна тӥ вылэ та вуиз.4Тани, озьы, туннэ мон тонэ ки вылысьтыд жильы улысь мозмытӥсько: тыныд монэн ӵош Вавилонэ мыныны тупа ке, мын, мон тон сярысь сюлмасько, нош тынад монэн ӵош Вавилонэ мынэмед уг ке поты, кыль. Тани, быдэс музъем выл тынад син азяд: кытчы мынэмед потэ, кытын тыныд кельше, отчы ик мын».
5Со кошкыса ӧз на вуы вал, Навузардан солы шуиз: «Мын Вавилон эксэйлэн Иудей городъёслы кузёйыр карыса пуктэм Сафанлэн Ахикам пиезлэн Годолия пиез доры, калык пӧлы соин валче кыль, яке мын отчы, кытчы тыныд кельше мыныны». Мугор возьмасьёслэн кузёйырзы солы сиён-юон, кузьымъёс сётыса келяз.6Иеремия Массифае, Ахикамлэн ас шаераз кылем Годолия пиез доры, лыктӥз но соин валче калык пӧлын улӥз.
7Бусые учырам ожен кивалтӥсь вань кузёйыръёс, соослэн адямиоссы но кылӥзы, Вавилон эксэй Ахикамлэсь Годолия пизэ быдэс шаерлы кузёйыр карыса пуктӥз но со киулэ сётӥз пиосмуртъёсты но, кышномуртъёсты но, нылпиосты но, та шаерысь Вавилонэ улыны нуытэк кельтэм куанер улӥсьёсты но, –8соку Годолия доры Массифае лыктӥзы Нафаниялэн пиез Исмаил, Карейлэн пиосыз Иоананэн Ионафан, Фанаемефлэн пиез Сераия, Нетофаф карысь Офалэн пиосыз, Махалэн Иезония пиез, ваньзы ас адямиосынызы.9Годолия, Сафанлэн Ахикам пиезлэн пиез, соослы но соослэн адямиоссылы кыл сётыса вераз: «Халдейёслы служить карыны эн кышкалэ, ас музъем вылады кыле но Вавилон эксэйлы служить каре, – тӥледлы умой луоз;10нош мон Массифае кылё тӥ понна ми доры лыктылӥсь халдейёс азьын дурбасьтыны; нош тӥ вина, гужем емышъёс, вӧй люкалэ, посудаосады тырелэ но асьтэлэн басьтэм городъёсады улэ».
11Нош озьы ик Моав музъеме, Аммон пиос пӧлы, Идумеяе но мукет шаеръёсы кылем вань иудейёс кылӥллям, Вавилон эксэй иудейёслэсь оглюкетсэ кельтӥз но соослы Годолияез, Сафанлэсь Ахикам пиезлэсь пизэ, кузёе пуктӥз шуыса;12вань та иудейёс, вань интыосы уллямъёс, берытскизы но Иудей музъеме, Массифае, Годолия доры лыктӥзы; туж трос вина но гужем емышъёс бичазы.
13Со дыре ик Карейлэн пиез Иоанан но бусые учырам вань ож кузёйыръёс Массифае, Годолия доры лыктӥзы но14солы шуизы: «Тодӥськод-а тон, Ваалис, Аммон пиослэн эксэйзы, тонэ виыны Нафаниялэсь Исмаил пизэ ыстӥз шуыса?» Нош Годолия, Ахикамлэн пиез, соослы ӧз оскы.15Соку Карейлэн пиез Иоанан Массифаысен лушкемен Годолиялы вераз: «Лэзь монэ, мон мыно но Нафаниялэсь Исмаил пизэ виё, нокин но уз тоды. Малы тонэ виыны лэзьыны кулэ, тон доры люкаськем вань иудейёс мед пазьгиськозы но Иудеялэн кылем люкетэз мед быроз шуыса-а?»16Нош Годолия, Ахикамлэн пиез, Иоананлы, Карейлэн пиезлы шуиз: «Озьы эн лэсьты, Исмаил сярысь тон шонертэм вераськод».
Глава 40