Выбрать язык
Книги Ветхого Завета
Книги Нового Завета
с русским текстом1Кузё-Инмар мыным тазьы шуиз: «Мын, аслыд етӥн кускерттон басьты, кускад сое дум, но сое вуэ эн поны».2Кузё-Инмарлэн верамезъя мон кускерттон басьтӥ но аслам кускам сое думи.3Мукетъят Кузё-Инмар дорысь мыным верамын вал:4«Султы, басьтэм, кускад думем кускерттондэ кут но Евфрат шур дуре мын, сое отчы, изгурезьлэн вайяськем висказ, ват».5Кузё-Инмарлэн косэмезъя мон мынӥ но Евфрат дуре сое ватӥ.6Трос нуналъёс ортчем бере Кузё-Инмар мыным шуиз: «Султы, Евфрат дуре мын, отысь кускерттондэ басьты, кудзэ Мон тыныд ватыны косӥ».7Мон Евфрат дуре лыктӥ но со ватэм интыысь кускерттонме гудӟыса поттӥ, но тани, кускерттон сисьмемын, номырлы ярантэм луэмын.
8Кузё-Инмар дорысь мыным верамын вал:9«Тазьы шуэ Кузё-Инмар: тазьы ик Мон куашкато Иудалэсь вылтӥяськонзэ, Иерусалимлэсь туж зол вылтӥяськонзэ.10Мынэсьтым верамме кылзӥськемез потӥсьтэм, та лэсянтэм-ярантэм калык улэ аслаз вогъяськись сюлмыныз, мукет инмаръёслэн пытьы кузязы соослы ужаны-тыршыны, йыбыртъяны ветлэ, со понна со, тани, номырлы но ярантэм та кускерттон кадь ик луоз.11Уго, кызьы кускерттон адямилэн кускызлы матын кылле, озьы ик Мон аслым матэ кари быдэс Израиль юртэз, быдэс Иуда юртэз, – шуэ Кузё-Инмар, – соос мынам калыке, Мынам данэ, ушъяськонэ, чеберлыке мед луозы вал шуыса, нош соос ӧз кылзӥське;12со понна ик соослы тон та кылэз вера: ”Тазьы шуэ Кузё-Инмар Израильлэн Инмарез: котькудӥз вина возён сепыс винаен тырмытӥське”. Соос тыныд шуозы: ”Ми ум тодӥське шат, котькудӥз но вина возён сепыс винаен тырмытӥське шуыса?”
13Нош тон соослы шу: ”Тазьы шуэ Кузё-Инмар: тани, Мон та музъемысь вань улӥсьёсты, Давидлэн престол вылаз пукись эксэйёсты но, священникъёсты но, пророкъёсты но, Иерусалимысь вань улӥсьёсты но кудӟытозязы винаен сектало.14Огзы борды огзэс йыгаса, соосты сузмыто, атайёсты пиосынызы ваче тышкало, – шуэ Кузё-Инмар, – уг жаля, вожпотонме уг небӟыты, соосты быдтыны киы пыроз”».
15Кылзӥське, валатске, вылӥ мылкыдоесь эн луэ, –
Кузё-Инмар тае вера.
16Инмардэс Кузё-Инмарез данъялэ,
пеймытлыкез лэземезлэсь азьло,
пеймыт азьлэн гурезьёсыз борды
пыдъёсты канжаськылымтэ на дыръя:
соку тӥ югытэз витёды,
нош Со кулон вужерлы сое пӧрмытоз, пеймыт кароз.
17Нош тӥ тае ӧд ке кылзэ,
соку мынам лулы лушкем интыын
тӥляд вылӥ мылкыдды пумысен бӧрдоз,
туж куректыса бӧрдоз, синъёсысьтым шур кадь синву кисьтӥськоз,
малы ке шуоно Кузё-Инмарлэн уллёез пленэ нуэмын луоз.
18Эксэйлы, эксэйлэн анаезлы тазьы шу:
«Зӥбыт кариське, улэгес пуксе,
уго тӥляд йырысьтыды данлыктылэн венец изьыез усиз.
19Лымшор палась городъёс пытсамын,
соосты усьтӥсь нокин но ӧвӧл;
Иудей музъемысь калыкез ваньзэ пленэ нуо,
одӥгтэм, ваньзэс пленэ нуо».
20Синъёстэс ӝутыса учкелэ уйпалась лыктӥсьёс шоры:
кытын тыныд сётэм уллё, кытын чебер-йӧно уллёед?
21Сӥон ныл, Со тон доры лыктӥз ке, мар шуод?
Тон ачид соосты асэныд кузёяськыны дышетӥд.
Нуны вайись кышномуртэз кадь вӧсь луонъёс тонэ уз шымыртэ-а?
22Ас сюлмад шуид ке: «Мар понна таос мон доры вуизы?»
– Пумтэм трос сьӧлыкъёсыд понна
дэрем сӧзыед усьтэмын, пыдтышъёсыд кыре поттэмын.
23Эфиоп пи быгатэ-а кузэ воштыны,
барс пӧйшур быгатэ-а виштыоссэ воштыны?
Тӥ но, уродэз-лекез лэсьтыны дышыса,
быгатӥськоды-а ӟечлык лэсьтыны?
24Кызьы луоё кырысь тӧл пельтыса тузонэз-сюез нуэ,
озьы Мон соосты пазьго.
25Тани тынад адӟон люкетэд, Мынам тыныд мертаса сётэм люкетэ, –
шуэ Кузё-Инмар, – малы ке шуоно тон Монэ вунэтӥд,
алдаськыса улон вылэ оскиськыса улыны кутскид.
26Со понна тынад дэрем сӧзыед ымныр вылад ӝутэмын луоз,
юрӟым макеед кыре мед потоз шуыса.
27Бусыысь мувыр йылысь адӟи Мон
тынэсьтыд азыса, ӝуатскем мылкыдын улэмдэ,
тынэсьтыд азыса кырсь улонъёстэ, юрӟым ужъёстэ.
Куректон-кайгу тыныд, Иерусалим!
Та ужъёс бере но тынад уг поты чылкытатӥськемед.
Кема-а тазьы улыны малпаськод на?
Глава 13