Выбрать язык
Книги Ветхого Завета
Книги Нового Завета
с русским текстом1«Мон – Саронысь нарцисс сяська, нёжалъёсысь лилия сяська!»
2«Бышкись жаг турын пӧлы ӝужам лилия сяська кадь,
нылъёс пӧлын сыӵе ик адӟиське мынам яратонэ».
3«Нюлэскысь писпуос пӧлын кыӵе адӟиське улмопу,
егит пиос пӧлын сыӵе ик адӟиське мынам яратонэ.
Улмопулэн саюлаз яратӥсько пукыны,
солэн емышъёсыз но ымме ческыт каро.
4Юон-сиён корка со монэ пыртӥз,
солэн мон вылысь знамяез – яратон.
5Винаен кужымме юнматэ, улмоен сюдыса сэзёмытэ монэ,
уго, яратыса улэменым, мон катьтэмми ни.
6Паллян киыз солэн мынам йыр улам, нош бур киыз монэ ӟыгыртэ».
7«Иерусалим нылъёс, мон тӥледыз кыркечъёсын,
бусыысь пужейёсын ӵош тэльмырыса курисько:
эн сайкатэ, эн ёртэ гажанме, уммез тырытозь, со мед кӧлоз».
8«Яратонэлэн куараез кылӥське ни! Тани, со лыктэ ни,
гурезьёстӥ ворттыса лыктэ, мувыръёстӥ тэтчаса лыктэ.
9Мынам эше кыркечлы яке пинал пужейпилы укша.
Тани, со милям борддормы сьӧрын сылэ,
укное учкылэ, решётка пыр утчаськыса сылэ.
10Яратонэ мыным тазьы вераны кутскиз:
”Султы, яратоно нылы, чеберлэсь но чебере мынам, пот!
11Тани, тол но ортчиз ни; зор кошкиз, зоремысь дугдӥз;
12музъем вылэ сяськаос ӝужазы;
тылобурдоослэн кырӟан дырзы вуиз,
кырдыдыклэн гурлам куараез милям шаерамы кылӥське;
13смоквапуос пучыоссэс поттӥзы ни,
виноград вайёс сяськаяськыса ческыт зынзэс потто ини.
Султы, яратонэ, чебере-мусое тон мынам, поты!
14Кырдыдыке мынам изгурезьлэн висказ
излюклэн шобрет улаз пуке!
Возьматы тон мыным аслэсьтыд ымнырдэ,
лэзь монэ куарадэ кылзыны,
тынад куараед ческыт, ымнырыд мусо.
15Милемлы юрттӥське,
виноград бакчамес изъянтӥсь ӟичыосты, ӟичыпиосты кутылэ,
милям виноград бакчаосмы сяськаосын шобырскемын уго”.
16Яратонэ мынам киулам сётэмын, мон – солэн киулаз;
со лилиос пӧлын пудо возьма.
17Нунал салкымен шокаку, вужеръёс кошкыку,
кыркеч кадь, пинал пужей кадь лу, –
гурезьлэн вайяськем интыосаз берытскы».
Глава 2