Выбрать язык
Книги Ветхого Завета
Книги Нового Завета
с русским текстом1Котьмарлэн но аслаз дырыз вань, инбам улын котькыӵе арберилэн но аслаз дырыз вань:
2вордӥськонлэн аслаз дырыз,
кулонлэн аслаз дырыз;
мерттӥськонлэн аслаз дырыз,
мерттэмез октон-калтонлэн аслаз дырыз;
3виылонлэн аслаз дырыз,
эмъянлэн аслаз дырыз;
куашкатъянлэн аслаз дырыз,
лэсьтӥськонлэн аслаз дырыз;
4бӧрдонлэн аслаз дырыз,
серекъянлэн аслаз дырыз;
куректонлэн аслаз дырыз,
эктонлэн аслаз дырыз;
5изъёсты пазянлэн аслаз дырыз,
изъёсты бичанлэн аслаз дырыз;
ӟыгыръяськонлэн аслаз дырыз,
ӟыгыръянлэсь палэнсконлэн аслаз дырыз;
6утчанлэн аслаз дырыз,
ыштылонлэн аслаз дырыз;
утьыса возёнлэн аслаз дырыз,
куянлэн аслаз дырыз;
7ӟезьылонлэн аслаз дырыз,
вурылонлэн аслаз дырыз;
шып улонлэн аслаз дырыз,
вераськонлэн аслаз дырыз;
8яратонлэн аслаз дырыз,
адӟонтэм карыса улонлэн аслаз дырыз;
жугиськонлэн аслаз дырыз,
тупаса улонлэн аслаз дырыз.
9Ужась ужамез-тыршемез бордысь кыӵе пайда басьтэ?
10Инмарлэсь адями пиослы со бордын мед моггетозы-дышетскозы шуыса сётэм ужзэ-сюлмаськонзэ мон адӟи.
11Инмар ваньзэ ас дыраз синмаськымон лэсьтӥз-пуктӥз, дунне сярысь тодонэз но адями пиослэн сюлмазы понӥз, адями Инмарлэсь кутсконысеныз пумозяз лэсьтэм ужъёссэ тодыны-валаны уг ке но быгаты.
12Соослэн улоназы шулдыръяськон но асьсэлы маке но ӟечсэ лэсьтон гинэ соос понна самой умоез луэ шуыса, мон тодӥ.
13Адями сие, юэ но аслаз котькуд ужысьтыз ӟечсэ ке адӟе, со – Инмарлэсь кузьым.
14Мон тодӥ: Инмарлэн вань лэсьтэм ужъёсыз пумтэм вапумъёс ӵоже уло, Со мар лэсьтӥз, со борды номыр ватсаны но кулэ ӧвӧл, номырзэ кулэстыны но кулэ ӧвӧл, Инмар лэсьтэ озьы – Солэн азяз куалекъяса мед йыбыртъялозы.
15Мар вал, со али но вань, мар луоз, со вал ини, Инмар ортчемзэ-кошкемзэ ӧтьыса берен ваёз.
16Шунды улысь мон эшшо тае адӟи на: суд ортчытон интыез, нош отын – законлы пумит улон; зэмлыклэсь интызэ, нош отын – ӧрекчаськон.
17Но мон ас пушкам шуи: шонер улӥсез но, сьӧлыклэсь кышкасьтэмез но Инмар судить кароз; малы ке шуоно котькыӵе югдурлэн аслаз дырыз, котькыӵе ужлы суд лэсьтонлэн аслаз дырыз вань.
18Сюлэм пушкам адями пиос сярысь мон шуи: соосты Инмар мед чаклалоз-эскероз но, соос мед адӟозы, пудо-живот выллемесь луо шуыса;19малы ке шуоно адями пиослэн адӟонзы но, пудо-животъёслэн но адӟонзы – одӥг кадь адӟон: кызьы ке соосыз кулыло, озьы ик таосыз но кулыло, ваньзы соос одӥг кадь шокало. Адямилэн пудо-живот азьын вылӥ кариськыны кыӵе мугез вань? Нокыӵе но мугез ӧвӧл, малы ке шуоно ваньмыз – алекъяськон – юнме дыр быдтон!20Ваньмыз одӥг интые мынэ: ваньмыз сюйысь потӥз, ваньмыз нош ик, сюе берытскыса, сюйлы пӧрме.21Кин тодэ: адями пиослэн лулзы вылэ тубе-а, пудо-животъёслэн лулзы улэ, музъем пушкы, ваське-а?
22Мон адӟи: аслад ужам уженыд шумпотыса-майбыръяськыса улонлэсь умоез номыр но ӧвӧл, малы ке шуоно та – адямилэн адӟон люкетэз; уго со кулэм бере та дуннеысь улонэз возьматыны кин сое ваёз на?
Глава 3