Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
93-тӥ ПСАЛОМ
[Давидлэн крезьгурез, арнялэн ньылетӥ нуналаз.]
1Пунэмзэ берыктӥсь Инмаре Кузё-Инмаре,
пунэмзэ берыктӥсь Инмаре, кужымдэ возьматы!
2Музъемлэн судить карисез, султы,
вылтӥяськисьёслы пунэмзэ берыкты.
3Кузё-Инмаре, кудкемозь сьӧлыклэсь кышкасьтэмъёс,
кудкемозь сьӧлыклэсь кышкасьтэмъёс
шумпотыса-шулдыръяськыса улозы на?
4Соос лек кылъёс верало,
законлы пумит улӥсьёс ваньзы быдӟымъясько.
5Калыктэ лёгало, Кузё-Инмаре, выжыдэ ултӥяло.
6Палкышноез, сьӧр муртэз виыло,
анайтэм-атайтэм нылпиосты виыло но шуо:
7«Кузё-Инмар уз адӟы, Иаковлэн Инмарез уз но шӧды».
8Визьмаське ук, укылтэм адямиос!
Ку тӥледлы визь пыроз, чурытомем сюлэмъёс?
9Пель пуктӥсь уг кылы шат? Син кылдытӥсь уг адӟы шат?
10Калыкъёсты Визьмась, адямиез валаны Дышетӥсь
тӥледыз шарае уз потты шат?
11Кузё-Инмар адямиослэсь малпанъёссэс тодэ,
соос юнме алекъяськон луо шуыса, Со тодэ.
12Шудо адями, кудзэ Тон, Кузё-Инмаре, визьмаськод,
Аслад законэдлы дышетӥськод.
13Курадӟон нуналъёсы сьӧлыклэсь кышкасьтэмъёслы гу гудӟытозь,
Тон солы каньыллык сётӥськод!
14Кузё-Инмар Аслэсьтыз калыксэ уз кушты,
выжы люкетсэ кулэтэм уз кары.
15Шонерлыко судить карыны кутскизы ке,
соку со сьӧры вань чылкыт сюлэмоос мынозы.
16Мон понна сьӧсьёслы пумит кин ӝутскоз?
Мон понна законэз сӧрисьёслы пумит кин султоз?
17Кузё-Инмар мыным ӧй ке юрттысал,
ӝоген мынам лулы шайгуэ пырысал ини.
18«Пыдъёсы куалекъяло» шуыкум,
Тынад гажан-жалянэд, Кузё-Инмаре, монэ юнматэ вал.
19Кӧтӝожъёс сюлэмам аляку, Тынад буйгатэмед лулме каньыл каре.
20Тынад матад луоз-а сьӧлыклэсь кышкасьтэмъёслэн улэмзы,
законлэн саюлаз сьӧсь уж малпасьёслэн пукон интызы?
21Шонер улӥсьлэн лулыз вылэ соос уллёен урдскыло,
дун-шектэм муртэз судить каро.
22Нош Кузё-Инмар – мынам изкаре,
мынам Инмаре – мынам утиськон изгурезе.
23Законлы пумит улэмзэс ас вылазы берыктоз,
сьӧсь ужъёссы понна соосты быдтоз,
соосты Инмармы Кузё-Инмар быдтоз.
Глава 93
