Выбрать язык
Книги Ветхого Завета
Книги Нового Завета
с русским текстом1Хорлэн кивалтӥсезлы. Сиё шудонъёсын. Давидлэн дышетонэз.
2Эй, Инмаре, кыл мынэсьтым вӧсяськемме,
куриськемелэсь ватӥськыса эн улы.
3Кылзӥськы, кыл монэ, куректыса викышъясько мон, лулӟылӥсько,
4тушмонлэн куараезлы чидатэк,
сьӧлыклэсь кышкасьтэмлэн ёртыса воземеныз сэрен.
Соос уго мон вылэ законлы пумит улонэз кушто,
лекомыкузы мыным пумит тушмонъяськыса уло.
5Мынам пушкам сюлмы куалекъя,
кулон сярысь шимес малпанъёс монэ ёртӥзы.
6Курдан, куалекъян мон доры лыктӥз,
шимес кышкан монэ шобыртӥз.
7Но мон шуи: «Кин меда мыным дыдыклэн кадь бурд сётоз?
Лобӟысал но буйгатскон инты мед шедьтысал.
8Кыдёке мон кошкысал, кыр дуннее улыны кыльысал.
9Тӧлпери, сильтӧл потыку, ватӥськон интыям пегӟысал».
10Люкылы, Кузё-Инмаре, сура соослэсь кылъёссэс,
уго городысь законлы пумит, керетыса улонэз адӟисько.
11Уй но, нунал но солэн борддор кузяз соос котыр ветло;
законлы пумит, лек ужъёс солэн пушказ уло.
12Солэн пушказ бырон;
ӧрекчаськон но кескич ужъёс солэн ульчаосысьтыз уг бырыло.
13Тушмон монэ сантэмасал ке, мон чидасал;
синазькыль карись мурт мон азьын быдӟымъяськысал ке,
солэсь мон пегӟысал.
14Нош тон, мон кадь ик адями, мынам эше,
мынам матысь муртэ вал,
15куспамы сюлмысьтымы, гажаса вераськылӥмы,
Инмар корка ӵош ветлӥмы.
16Соос вылэ кулон мед вуоз, улэпкын адэ мед пырозы,
уго сьӧсь ужъёс соослэн улон интыязы но, пушказы но уло.
17Нош мон Инмарлы вазисько – Кузё-Инмар монэ утёз.
18Ӝыт но, ӵукна но, лымшоре но сюлворыса,
куараен бӧрдыса куро – Со мынэсьтым куараме кылоз.
19Мыным пумит султӥсьёслэсь, каньыллык сётыса, лулме мозмытоз,
соос уго трос луэмын ни.
20Инмар кылоз, пумтэм вапумъёс ӵоже Улӥсь соосты зӥбломытоз,
соос ӟеч пала уг воштӥсько, Инмарлэсь уг кышкало уго.
21Кинъёсын тупаса улӥзы, соос вылэ кизэс урдӥзы,
сӧризы асьсэлэсь кусыпсэс;
22соослэн кылзы вӧйлэсь небыт, нош сюлмазы тушмонъяськон улэ;
соослэн ымысьтызы потэм кылъёссы
ӵыжтэм вӧйлэсь небытэсьгес кадь,
но соос шерыса дасям палаш кадесь.
23Сюлмаськонъёстэ Кузё-Инмар кие сёт, Со тонэ утёз-вордоз.
Шонер улӥсь муртлы шонаськыса улыны Со ноку но уз сёты.
24Соосты Тон, Инмаре, бырон гуэ куялод;
вир кисьтонэз яратӥсьёс, кескич муртъёс
улоно нуналъёссылэсь ӝынызэ но уз улэ.
Нош мон, [Кузё-Инмаре,] Тон вылэ оскиськисько.
Глава 54