Библия
Выбрать язык
Книги Ветхого Завета
Книги Нового Завета
с русским текстом
ПСАЛТИРЬ
37-тӥ ПСАЛОМ
1Давидлэн крезьгурез. [Субботаез] тодэ вайытон понна.
2Эй, Кузё-Инмаре! Вожед потон дыръя шекъёсме кыре эн потты,
йырыд кур луон дыръя монэ вӧсь эн кары.
3Уго Тынад ньӧлъёсыд мон борды мертчиськизы,
Тынад киыд монэ нюртыса возе.
4Вожпоттэменыд сэрен мугорам быдэс интыез ӧз кыльы ни,
сьӧлыкъёсыным сэрен лыосам ӧвӧл ни каньылэз.
5Сьӧлыкъёсы йыр йылам тубизы ни,
туж секыт ныпъет кадь монэ зӥбыса возё.
6Йӧнтэм улэмысьтым яраосы зынмыса, урӟыса уло.
7Мон купырми ни, чылкак куасалски ни,
нунал лумбыт лулӟылыса ветлӥсько.
8Вань пушкы висёнэн азэмын,
мугорам быдэс интыез ӧвӧл ини.
9Катьтэмми но ортчыт чигиськи,
сюлмылэн писыръямезлы чидатэк, куараен черекъясько.
10Эй, Кузё-Инмаре! Мар мыным кулэ – ваньмыз Тыныд тодмо,
куректон-лулӟылонэ но Тынэсьтыд ватэмын ӧвӧл.
11Сюлмы куалекъя, кужмы бордысьтым кошкиз,
синмылэн югытэз – соиз но ӧвӧл ни мынам.
12Эшъёсы мынам, оскиськоно муртъёсы,
гижло череным сэрен палэнскизы,
матысь муртъёсы но палэнын сыло.
13Мынэсьтым лулме утчасьёс сьӧлтэтъёс пуктыло,
мыным урод малпасьёс быронэ сярысь верало,
нуналлы быдэ кескич ужъёс малпало.
14Нош мон пельтэм мурт кадь – уг кылӥськы,
кылтэм мурт кадь, кудӥз ымзэ уг усьтылы.
15Луи мон сыӵе адями кадь,
кудӥз уг но кылы, ответ сётыны кылыз но ӧвӧл.
16Мон Тыныд оскиськисько, Кузё-Инмаре,
Тон монэ кылод, Кузё-Инмаре, Инмаре мынам.
17Мон шуи:
«[Тушмонъёсы] мон пумысен шумпотыса улоно медаз луэ»;
пыдъёсы куалекъян дыръя соос мон азьын вылтӥясько.
18Мон пограсько ни, куректон-кайгуэ ялан мон азьын.
19Законлы пумит улэмме ватытэк верасько,
сьӧлыке понна чигиськисько.
20Нош мынам тушмонъёсы уло но кужмо выжы лэзё,
юнме шорысь монэ синазькыль карисьёс эшшо но тросгес луо.
21Ӟечлы уродэн мыным пунэмзэ берыктӥсьёс
ӟечлык сьӧры мынэме понна монэн тушмонъяськыса уло.
22Кузё-Инмаре, Инмаре мынам, эн кельты монэ!
Мон бордысь эн палэнскы.
23Кузё-Инмаре, Утисе мынам, дырты мыным юрттыны!
Глава 37
