Выбрать язык
Книги Ветхого Завета
Книги Нового Завета
с русским текстом[Аллилуия.]
1Шудоесь Кузё-Инмарлэн законэзъя
дун-шектэмъёслэн сюрестӥзы ветлӥсьёс.
2Шудоесь Солэсь курон-косонъёссэ утисьёс,
вань сюлмынызы Сое утчасьёс.
3Законлы пумит ужъёс соос уг лэсьто,
Инмарлэн сётэм сюрес вылтӥз соос ветло.
4Косонъёстэ юн утьыны Тон курид.
5Сюресъёсы Тынэсьтыд законъёстэ быдэсъян пала нуысалзы ке?!
6Вань курон-косонъёстэ чакласал ке,
соку мон возьытэ вуттэмын ӧй луысал.
7Шонерлыкедлэн законъёсызлы дышетскыса,
чылкыт сюлмыным мон Тонэ данъясал.
8Тынэсьтыд законъёстэ утьыса уло, монэ чылкак эн кушты.
9Егит пи аслэсьтыз сюрессэ кызьы чылкытэн возёз?
– Верам кылдэ санэ поныса, ассэ кутыса улӥз ке.
10Вань сюлмыным Тонэ утчасько,
курон-косонъёсыдлэсь палэнэ кожыны монэ эн лэзьы.
11Тон азьын медам сьӧлыка шуыса, Тынэсьтыд кылдэ сюлмам понӥ.
12Данлыко Тон, Кузё-Инмаре! Аслад законъёсыдлы монэ дышеты.
13Тынэсьтыд сётэм вань законъёстэ ас кылыным шара верасько!
14Курон-косонъёсыдлэн сюрессы вылын
пыдэстэм ваньбурлы кадь шумпотыса улӥсько.
15Курон-косонъёсыд сярысь малпаськисько но
сюресъёсыд шоры учкисько.
16Законъёсыдлы шумпотӥсько;
Тынэсьтыд кылдэ, Инмаре, уг вунэтӥськы.
17Мыным, ляльчиедлы, ӟеч кар,
Тынэсьтыд кылдэ утьыса мон мед улысал.
18Синъёсме усьты, соку мон законэдлэсь паймымон ужъёссэ адӟо.
19Музъем вылын пыдйылчи мон,
курон-косонъёстэ мынэсьтым эн ваты.
20Шонер суддэ сюлмысьтым витьыса катьтэммиз ни мынам лулы.
21Вылтӥяськисьёсты зӥбломытӥськод,
курон-косонъёсыдлэсь палэнскисьёсты судить кариськод.
22Ултӥянлэсь, сантэманлэсь монэ мозмыты,
курон-косонъёстэ мон сюлмам возисько ук.
23Кузёяськисьёс пуко но мыным пумит султыны куспазы верасько,
нош мон, Тынад ляльчиед, законъёсыд сярысь малпаськисько.
24Тынад курон-косонъёсыд – мынам буйгатскон интые,
визь-нод сётӥсьёсы.
25Сюй борды лулы лякиськиз, сётэм кылыдъя монэ улӟыты.
26Улон сюресъёсы сярысь Тыныд верай, Тон сое санэ понӥд.
Аслад законъёсыдлы дышеты монэ.
27Косонъёсыдлэсь сюрессэс валаны дышеты монэ,
паймымон ужъёсыд сярысь малпаськыса уло.
28Куректыса-кайгырыса лулы катьтэмме,
сётэм кылыдъя монэ юнматы.
29Ӧрекчаськон сюресэз мон бордысь палэнты,
Тынад законэдъя улон сёт мыным.
30Зэмлык сюресэз мон аслым бырйи, законъёстэ уг вунэтӥськы.
31Курон-косонъёсыд борды мон лякиськи,
Кузё-Инмаре, возьытэ эн вутты монэ.
32Сюлмылы эркын шокчон сётӥд ке,
курон-косонъёсыдлэн сюрес вылтӥзы вамышто.
33Кузё-Инмаре, законъёсыдлэсь сюрессэс возьматы,
со кузя кожылытэк пумозяз мыно.
34Визьма монэ, закондэ быдэсъяса мед улысал,
вань сюлмыным сое мон мед утьысал.
35Курон-косонъёсыдлэн сюрес вылаз монэ султыты,
мон соосты яратӥ.
36Сюлэмме узырлык люкан пала ӧвӧл,
курон-косонъёсыд пала берыкты.
37Синъёсме палэнты – алекъяськонэз медам адӟы,
Тынад сюрес вылтӥд ветлыны улон сёт мыным.
38Тынэсьтыд кышканэн улон понна мыным, ляльчиедлы,
сётэм кылдэ быдэсты.
39Сӥтэм-сантэм кылёнэз палэнты, солэсь мон кышкаса улӥсько,
Тынад законъёсыд ӟечесь ук.
40Тынэсьтыд косонъёстэ мон туж кулэ карисько,
Тон шонерлыко, улэп улон сёт мыным.
41Кузё-Инмаре, гажан-жалянэд мон доры мед вуоз,
кыл сётӥд бере, Тон дорысь утиськонэ мед лыктоз.
42Соку сантэмасьлы мон ответ сёто:
Тынад кылыдлы уго мон оскиськисько.
43Верам кылъёсы зэмлыкоесь мед луозы,
шонер судэдлы оскиськыса мон улӥсько.
44Закондэ вапумысь вапумъёсы, котьку но утьыса уло.
45Эркын уло, уго мон Тынэсьтыд косонъёстэ санэ поныса улӥсько.
46Уг возьдаськы, эксэйёс азьын курон-косонъёсыд сярысь верало.
47Курон-косонъёсыныд куаныса-шумпотыса уло,
соосты мон туж яратӥ.
48Курон-косонъёсыд пала киосме мычо,
соосты мон туж яратӥ, законъёсыд сярысь малпаськыса уло.
49Мыным, ляльчиедлы, верам кылдэ тодад вай,
со вылэ оскиськыса монэ улыны косӥд уго.
50Тынад кылыд монэ улэп возе,
курадӟон дыръям со мыным буйгатскон сётэ.
51Вылӥ мылкыдоос монэ туж сантэмаса возизы,
нош мон Тынад законэдлэсь ӧй палэнскы.
52Вапумъёс кутсконысен сётэм законъёстэ тодам вайылӥ но
отысь буйгатскон шедьтылӥ, Кузё-Инмаре.
53Сьӧлыклэсь кышкасьтэмъёслэсь закондэ кулэтэм каремзэс адӟыку,
гомась тыл пушкам ӝуатске.
54Дунне вылтӥ поръян дыръям Тынад законъёсыд –
мынам кырӟанъёсы вал.
55Кузё-Инмаре, уйёсы нимдэ тодам вайылӥ, закондэ сюлмам вози.
56Тынэсьтыд косонъёстэ утьыса улон мыным сётэмын.
57«Кузё-Инмаре, – мон шуи, – мынам адӟонэ –
Тынэсьтыд кылъёстэ санэ поныса улон».
58Вань сюлмысьтым мон Тыныд вӧсяськи:
сётэм кылыдъя жаля-уть монэ.
59Улон сюресъёсы сярысь малпаськыкум,
курон-косонъёсыд пала вамыштылӥ.
60Курон-косонъёстэ утьыны дыртӥ, ӝегаса ӧй улы.
61Сьӧлыклэсь кышкасьтэмъёслэн сьӧлтэтъёссы монэ котыртӥзы,
но мон Тынэсьтыд закондэ ӧй вунэты.
62Шонерлыко судъёсыд понна Тыныд тау карыны
уйшор дыръя султылӥ.
63Тынэсьтыд кышканэн улӥсьёсын, косонъёстэ утисьёсын
мон огкылын улӥсько.
64Тынад гажан-жалянэныд, Кузё-Инмаре, музъем тырмемын,
Аслад законъёсыдлы монэ дышеты.
65Сётэм кылыдъя, Кузё-Инмаре, мыным, ляльчиедлы, ӟеч лэсьтӥд.
66Ӟечез валанлы, тодонлы монэ дышеты,
курон-косонъёсыдлы мон оскисько уго.
67Азьвыл мон курадӟонъёсы пӧлы йыромыса улӥ,
нош табере Тынэсьтыд кылдэ утьыса улӥсько.
68Ӟеч, ӟеч карись Тон, [Кузё-Инмаре,]
Аслад законъёсыдлы монэ дышеты.
69Вылӥ мылкыдоос мон сярысь ӧрекчи кылъёс верало,
нош мон вань сюлмыным косонъёстэ утьыса улӥсько.
70Соослэн зубектэм сюлэмзы кӧйын шобырскиз,
нош мон Тынад законэдлы шумпотыса улӥсько.
71Курадӟонъёсы ӟечлы луизы,
соос пыр мон законъёсыдлы дышетски.
72Тынад ымысьтыд потэм закон мон понна
трос сюрс зарнилэсь но, азвесьлэсь но умойгес луэ.
73Тынад киосыд кылдытӥзы, юнматӥзы монэ,
визьма монэ – курон-косонъёсыдлы дышетско.
74Тынэсьтыд кышканэн улӥсьёс монэ адӟозы но,
Тынад кылыдлы оскиськисько шуыса, шумпотозы.
75Тодӥсько, Кузё-Инмаре, Тынад судъёсыд шонересь,
Тон монэ кулэезъя вӧсь карид.
76Мыным, ляльчиедлы, сётэм кылыдъя
гажан-жалянэд монэ мед буйгатоз.
77Тынад дэлетэд мон доры мед вуоз, мон уло,
Тынад законэд мыным шумпотон вае.
78Вылӥ мылкыдоос возьытэ вуттэмын мед луозы,
юнме шорысь монэ ултӥяло,
нош мон Тынад косонъёсыд сярысь малпаськыса улӥсько.
79Тынэсьтыд кышканэн улӥсьёс, курон-косонъёстэ тодӥсьёс
мон пала мед берытскозы.
80Возьытэ усёнтэм понна
законъёстэ утьыса улонын сюлэмы дун-шектэм мед луоз.
81Тон дорысь утиськонэз витьыса, лулы катьтэмме;
верам кылыдлы оскиськыса улӥсько.
82Тынэсьтыд кылдэ витьыса, синъёсы катьтэммо,
мон шуисько: «Ку Тон монэ буйгатод?»
83Ӵын пӧлысь сепыс кадь мон луи ке но,
Тынэсьтыд законъёстэ мон ӧй вунэты.
84Мынам, ляльчиедлэн, кӧня улон нуналэ вань на?
Монэ уллясьёслы ку суд лэсьтод?
85Законэдлы пумит мыныса, вылӥ мылкыдоос мыным гу гудӟизы.
86Тынад вань курон-косонъёсыд зэмлыкоесь;
нокыӵе мугтэк монэ улляло: юртты мыным.
87Музъем вылын монэ ӧжыт гинэ ӧз быдтэ,
нош мон Тынад косонъёсыдлэсь ӧй куштӥськы.
88Ас гажан-жалянэныд улон даурме кузяты,
Тынэсьтыд сётэм курон-косонъёстэ мон утьыса уло.
89Кузё-Инмаре, Тынад кылыд пумтэм вапумъёс ӵоже инмын улэ;
90Тынад зэмлыкед выжыысь выжые возиське.
Музъемез пуктӥд но, со сылэ.
91Тынад тупатэм радъянэныд ваньмыз соос туннэ нуналозь сыло,
ваньмыз соос Тыныд ужало.
92Законэд бордын буйгатсконэ ӧй ке луысал,
курадӟыса улон дыръям мон кулысал ини.
93Тынэсьтыд косонъёстэ даурам уг вунэты,
соос пыр Тон мыным улэп улон сётӥськод.
94Мон Тынад – уть монэ,
Тынэсьтыд косонъёстэ санэ поныса улӥсько.
95Сьӧлыклэсь кышкасьтэмъёс монэ быдтон вылысь
возьмаськыса уло,
нош мон курон-косонъёстэ валаны тыршыса улӥсько.
96Котькыӵе ӟечлыко ӟечлыклэн пумыз вань шуыса, мон адӟи,
нош Тынад курон-косонэд мертаны луонтэм, мур.
97Макем мон Тынэсьтыд закондэ яратӥсько!
Нунал лумбыт со сярысь малпаськисько.
98Аслад курон-косонъёсыныд Тон монэ
тушмонъёсы сярысь визьмогес карид,
Тынад курон-косонъёсыд котьку но мынам сюлмам уло.
99Вань дышетӥсьёсылэсь мон визьмогес луи,
уго курон-косонъёсыд бордысь аслым визь-нод басьтӥсько.
100Пересьёслэсь тросгес валаны кутски,
уго Тынэсьтыд косонъёстэ сюлмам возисько.
101Тынэсьтыд кылдэ утён понна
котькыӵе но урод сюреслэсь пыдъёсме кутыса возисько.
102Законъёсыдлэсь уг палэнскиськы, Тон монэ дышетӥськод уго.
103Макем ческытэсь мон понна Тынад кылъёсыд!
Чечылэсь но ческытгес мынам ымылы.
104Тынад косонъёсыд пыр мон визьмаськи,
котькыӵе ӧрекчаськон сюресэз синазькыль карисько.
105Тынад кылыд пыд азьме югдытэ, улон сюресэлы югыт сётэ.
106Шонерлыко законъёстэ утьыны кыл сётӥ бере, сое быдэстоно.
107Зол ӝиптэмын мон, Кузё-Инмаре,
сётэм кылыдъя улэп улон вай мыным.
108Кылыным-ымыным верам тау карон кылъёсме
кабыл басьты, Кузё-Инмаре,
Аслад законъёсыдлы монэ дышеты.
109Лулы ялан Тынад киулад, закондэ уг вунэтӥськы.
110Сьӧлыклэсь кышкасьтэмъёс сьӧлтэт пуктӥзы,
нош мон косонъёсыдлэсь ӧй палэнскы.
111Курон-косонъёстэ пумтэм вапумъёс ӵожелы люкетлы мон басьтӥ –
соос сюлэмме шумпотто.
112Пумозяз, пумтэм вапумъёс ӵоже
законъёстэ быдэсъян пала сюлэмме берыктӥ.
113Азьлань-берлань вераськонъёсты адӟонтэм карисько,
нош Тынэсьтыд закондэ – яратӥсько.
114Тон – мынам шобретэ, мынам – щитэ;
сётэм кылыдлы оскиськыса улӥсько.
115Законлы пумит улӥсьёс, мон дорысь палэнске, –
Инмарелэсь курон-косонъёссэ утьыса мон уло.
116Сётэм кылыдъя монэ юнматы, мон уло;
оскиськыса улэм поннам возьытэ эн вутты.
117Мед утиськысал, юртты мыным!
Тынэсьтыд законъёстэ пырак ӵоже валаны тыршыса мед улысал.
118Ваньзэс законъёсыдлэсь куштӥськисьёсты погыртӥськод,
уго соос кескич, ӧрекчи ужъёс лэсьтыса уло.
119Музъем вылысь ваньзэс сьӧлыклэсь кышкасьтэмъёсты,
ӝуам сэрегпумез кадь, Тон сэрпалляськод,
соин ик мон Тынэсьтыд курон-косонъёстэ яратӥ.
120Тынэсьтыд кышкаса, лулмугоры куалекъя,
судъёсыдлэсь но мон курдасько.
121Законъя, шонерлыко мон лэсьтӥ,
ёртыса возисьёс кие монэ эн сёты.
122Вылтӥяськисьёс монэ медаз ултӥялэ шуыса,
мыным, ляльчиедлы, ӟеч кар, дурбасьты.
123Юрттэттэ утчаса, шонерлыкедлэсь кылзэ витьыса,
синъёсы катьтэммо.
124Мыным, ляльчиедлы, гажан-жаляндэ возьматы,
законъёсыдлы монэ дышеты.
125Мон – Тынад ляльчиед, монэ визьма,
курон-косонъёстэ тодыны-валаны мед быгатысал.
126Кузё-Инмаре, суд лэсьтон дырыд вуиз: закондэ тарказы-быдтӥзы.
127Мон нош курон-косонъёстэ зарнилэсь,
чылкыт зарнилэсь но тросгес яратӥсько.
128Вань косонъёстэ, ваньзэ шонересь шуыса лыдъясько,
котькыӵе ӧрекчаськон сюресэз адӟонтэм карисько.
129Паймымонэсь курон-косонъёсыд, соос мынам сюлмам уло.
130Кылъёсыдлэсь пуштроссэс валан
огшоры муртъёсты визьма, югдытэ.
131Ымме усьтӥсько но лулӟисько,
курон-косонъёстэ мылкыды чидатэк вите уго.
132Учкы мон шоры, жаля монэ,
кызьы Тон котьку кариськод нимдэ яратӥсьёслы.
133Сётэм кылыдъя вамышъёсме юнматы,
законлы пумит нокыӵе но уж монэ вормыса медаз улы.
134Адямиослэн ултӥянзылэсь монэ мозмыты,
соку мон косонъёстэ утьыса уло.
135Ымнырыдлэн югытэныз монэ, ляльчидэ, югдыты,
законъёсыдлы дышеты.
136Тынэсьтыд закондэ утьымтэзы понна
синъёсысьтым шур кадь ву вия.
137Шонерлыко Тон, Кузё-Инмаре, Тынад судъёсыд котьку шонересь.
138Курон-косонъёсыд шонересь, зэмлыкоесь.
139Тушмонъёсы Тынэсьтыд кылъёстэ вунэтэм понна
сюлмаськон-тыршон сюлэмме сюпсе.
140Тынад кылыд туж чылкыт, ляльчиед сое яратэ.
141Покчи мон, синазькыль,
нош Тынэсьтыд косонъёстэ уг вунэтӥськы.
142Тынад шонерлыкед – пырак ӵожелы шонерлык,
законэд Тынад – зэмлык.
143Куректон-кайгуос, ёрмыса улон мон доры вуизы,
нош курон-косонъёсыд мыным шумпотон ваё.
144Курон-косонъёсыд пумтэм вапумъёсы шонересь:
визьма монэ, мон уло.
145Вань сюлмыным вазиськисько: Кузё-Инмаре, кыл монэ,
соку мон законъёстэ утьыса уло.
146Тыныд вазиськисько: уть монэ, курон-косонъёстэ быдэсъяса уло.
147Ӵук ӟардонлэсь азьло султыса вазиськисько,
сётэм кылыдлы оскиськыса улӥсько.
148Тынэсьтыд кылъёстэ мургес валан понна
быдэс уй синъёсы уг кынисько.
149Гажась-жалясь Кузё-Инмаре, кыл куараме,
Тон шонерлыко, улэп улон сёт мыным.
150Кескич уж лэсьтыны малпасьёс матам лыктӥзы,
законэдлэсь соос палэнскемын.
151Кузё-Инмаре, Тон матын,
Тынад вань курон-косонъёсыд зэмлыкоесь.
152Кемаласен мон тодӥ ни курон-косонъёсыд сярысь,
Тон соосты пумтэм вапумъёслы юнматӥд шуыса.
153Учкы курадӟонэ шоры, мозмыты монэ,
Тынэсьтыд закондэ мон уг вунэтӥськы ук.
154Ёртӥсьёс азьын дурбасьты, мозмыты монэ,
сётэм кылыдъя мыным улэп улон сёт.
155Сьӧлыклэсь кышкасьтэмъёслы утиськон кыдёкын,
Тынэсьтыд законъёстэ соос санэ уг поно уго.
156Уно Тынад гажан-жалянэд, Кузё-Инмаре;
Тон шонерлыко, улэп улон сёт мыным.
157Уно мынам ёртӥсьёсы, тушмонъёсы,
нош курон-косонъёсыдлэсь мон уг палэнскиськы.
158Законэдлэсь куштӥськисьёсты адӟисько но,
сюлмы чигиське: Тынад верам кылыдъя соос уг уло уго.
159Учкы, Тынэсьтыд косонъёстэ макем мон яратӥсько;
гажась-жалясь Кузё-Инмаре, улэп улон сёт мыным.
160Тынад кылыдлэн инъетэз – зэмлык,
шонерлыкедлэн вань законъёсыз пумтэм вапумъёс уло.
161Музъем выл эксэйёс янгыштэк монэ улляса возё,
нош сюлмы кылыдлэсь кышканэн улэ.
162Туж быдӟым узырлык шедьтэм мурт кадь
Тынад кылыдлы мон шумпотӥсько.
163Адӟонтэм карисько ӧрекчаськонэз, юрдӥсько солэсь,
нош Тынэсьтыд закондэ яратӥсько.
164Шонерлыко судить карем поннад
нунал ӵоже сизьым пол Тонэ данъясько.
165Закондэ яратӥсьёслэн сюлмазы туж быдӟым каньыллык улэ,
ӧвӧл соослы канжаськон.
166Кузё-Инмаре, утён сётонэдлы оскиськисько,
курон-косонъёстэ быдэсъяса улӥсько.
167Курон-косонъёсыд лулам-сюлмам уло, мон соосты туж яратӥсько.
168Куронъёстэ, курон-косонъёстэ санэ поныса улӥсько –
мынам вань улон сюресъёсы Тон азьын.
169Вӧсяськемме кабыл басьты, Кузё-Инмаре,
Аслад сётэм кылыныд визьма монэ.
170Вӧсяськемме кабыл басьты, сётэм кылыдъя монэ мозмыты.
171Законъёсыдлы монэ дышетэмед понна
кылы-ымы дугдылытэк ушъян кылъёс мед вералоз.
172Кузё-Инмаре, Тынэсьтыд кылдэ данъяса верало,
Тынад вань курон-косонъёсыд шонерлыкоесь.
173Тынад киыд мыным утиськон мед ваёз –
Тынэсьтыд косонъёстэ мон аслым бырйи уго.
174Кузё-Инмаре, Тынэсьтыд утёндэ чидатэк витисько,
законэдлы шумпотыса улӥсько.
175Лулы Тонэ данъяса мед улоз,
Тынад законъёсыд мыным мед юрттозы.
176Ышем ыж кадь мон йыроми: монэ, ляльчидэ, утча,
Тынэсьтыд курон-косонъёстэ мон ӧй вунэты.
Глава 118