Выбрать язык
Книги Ветхого Завета
Книги Нового Завета
с русским текстомАллилуия.
1Кузё-Инмарлы тау каре, Со ӟеч,
Солэн гажан-жалянэз пумтэм вапумъёс улэ.
2Кузё-Инмарлэсь быдӟым ужъёссэ кин быгатоз вераны,
Солэсь вань данлыксэ кин быгатоз ивортыны?
3Шудоесь Инмар законэз утисьёс,
котькыӵе но дыре шонер уж лэсьтӥсьёс.
4Ас калыкедлы ӟеч эриктэ возьматыкуд, Кузё-Инмаре,
тодад вай монэ, утёндэ вайыса лыкты мон доры.
5Мон мед быгатысал Тынад быръем муртъёсыдлэсь
майбыр улэмзэс адӟыны,
калыкедлэн шулдыръяськонэныз шулдыръяськыны,
быръем калыкедлэн данъяськонэныз данъяськыны.
6Атайёсмы кадь ик ми но сьӧлыкамы,
законлы пумит улӥмы, шонертэм уж лэсьтӥмы.
7Египетысен паймымон ужъёстэ атайёсмы ӧз валалэ,
Тынэсьтыд пумтэм гажан-жаляндэ тодазы ӧз возе,
зарезь дурын, Горд Кам зарезь дурын,
мыдланьяськыса-вогъяськыса улӥзы.
8Но Со Аслаз нимыз понна соосты утиз,
Аслэсьтыз быдӟымлыксэ возьматон понна.
9Горд Кам зарезьлы чурыт куараен вазиз но – со куасьмиз,
соосты кӧс му вылтӥ кадь, пыдэстэм гутӥ поттӥз.
10Адӟонтэм карисьлэн киызлэсь утиз,
тушмонлэн киызлэсь соосты мозмытӥз.
11Тушмонъёссэс вуос ӝокатӥзы, соос пӧлысь огез но улэп ӧз кыльы.
12Солэн кылъёсызлы соос оскизы, Солы ушъян гуръёс кырӟазы.
13Но ӝоген Солэсь ужъёссэ вунэтӥзы,
визь-кенеш сётэмзэ витьыны ӧз чидалэ.
14Кыр дуннеысен ас мугорзылэн куронъёсызлы сётскыса
улыны кутскизы,
куштос интыын Инмарлэсь визьзэ сыназы.
15Соослэсь куронзэс Со быдэстӥз,
нош лулзы вылэ куасьтӥсь чер лэзиз.
16Люкаськон интыысенызы Моисейлы кӧт пӧсен улӥзы,
Кузё-Инмарлэн быръем муртэзлы Ааронлы вожъяськизы.
17Музъем ваяк усьтӥськиз но, Дафанэз му ньылӥз,
Авиронэз эшъёсыныз валче ӝокатӥз.
18Та уллё пушкы тыл ӝуатскиз,
сьӧлыклэсь кышкасьтэмъёсты гомась тыл ӵушказ.
19Хорив дорысен зарни ошпи лэсьтӥзы но
ӵыжатыса кисьтэм сульдэрзылы йыбырттӥзы.
20Асьсэлэсь данзэс турын сиись ошлэн сульдэреныз воштӥзы.
21-22Египетын быдӟым уж возьматӥсез,
Хам музъемын паймымон ужъёс лэсьтӥсез,
кӧшкемытъёссэ Горд Кам зарезь дурын возьматӥсез –
асьсэлэсь Утисьсэс, Инмарез, вунэтӥзы.
23Инмар соосты быдтыны турттэ вал,
но Моисей, Солэн быръем муртэз,
Израиль калыкез медаз быдты шуыса,
Солэсь лек йыркурзэ палэнтон понна
Солэн азяз чигиськем-пилиськем шоры султӥз.
24Паймымон чебер музъемзэс кулэтэм каризы,
Инмарлэн кылызлы ӧз оске.
25Балаганъёсазы ӟургетыса пукизы,
Кузё-Инмарлэсь куаразэ ӧз кылзӥське.
26Соос вылэ кизэ ӝутӥз, кыр дуннеысен соосты уськытыны,
27калыкъёс пӧлысь соослэсь выжызэс погыртыса,
быдэс дунне вылэ пазьгыны.
28Ваал-Фегор*а борды соос лякиськизы,
лултэмъёслы сётэм курбонъёсты сиизы.
29Ужъёсынызы Инмарлэсь вожзэ поттылэмзы понна
соос доры чер пыриз.
30Нош Финеес*б султӥз, Инмарлы ярамон уж лэсьтӥз – чер дугдӥз.
31Выжыысь выжые, пумтэм вапумъёслы та уж шонерлык луэ шуыса,
солы гожтэмын.
32Мериваысь ву дурын Инмарлэсь вожзэ поттӥзы,
соос понна Моисейлы чидан адӟоно луиз.
33Мыдланьяськыса-вогъяськыса улэменызы,
соос Моисейлэсь мылкыдзэ сӧрылӥзы –
соку со аслаз ымыныз сьӧлыкано луиз.
34Со калыкъёсты,
кудъёсыз сярысь соослы Кузё-Инмар косон сётӥз вал,
соос ӧз быдтэ.
35Израиль пиос язычникъёсын сураськизы но
соослэн ужъёссылы дышизы.
36Соослэн вӧлыса лэсьтэм сульдэръёссылы,
Израиль калык понна сьӧлтэт луисьёссылы йыбыртъязы.
37Асьсэлэсь пиоссэс, нылъёссэс периослы курбон сётылӥзы.
38Сьӧлыктэм вирез кисьтылӥзы –
асьсэлэн пиоссылэсь, нылъёссылэсь вирзэс
ханаан калыклэн вӧлыса лэсьтэм сульдэръёсызлы
курбон карыса сётылӥзы – озьы музъем вирен саптаськиз.
39Асьсэлэн ужъёсынызы асьсэды саптазы,
асьсэлэн ужъёсынызы азон сьӧлык лэсьтылӥзы.
40Кузё-Инмарлэн вожпотонэз Ас калыкез вылэ ӝуатскиз,
бырйыса басьтэм люкетсэ синазькыль кариз.
41Соосты язычникъёс кие сётӥз,
адӟемпотостэм карисьёс соосты киулазы басьтӥзы.
42Тушмонъёссы соосты ӝикатыса возизы,
соослэн киулазы соос тэрытскыса улоно луизы.
43Трос пол соосты Кузё-Инмар мозмытылӥз,
нош соос асьсэлэн вогъяськон сямынызы [Солэсь] вожзэ поттылӥзы,
законлы пумит улэмзы понна соос ултӥян киулэ сюрылӥзы.
44Соослэсь тэльмырыса вӧсяськемзэс кылыкуз,
Кузё-Инмар учкиз соослэн куректон-кайгузы шоры.
45Соослы сётэм сӥзён-косонзэ тодаз вайыку,
туж быдӟым гажан-жалянэз ванен Со вожпоттонзэ небӟытылӥз.
46Вань киултыса возисьёссылэсь мылкыдзэс гажась-жалясь карылӥз.
47Кузё-Инмаре, милям Инмармы, уть милемыз,
Тынэсьтыд дун-чылкыт нимдэ данъян понна,
Тынад данэныд ушъяськон понна калыкъёс пӧлысь милемыз люка.
48Дано мед луоз Кузё-Инмар, Израильлэн Инмарез,
вапумъёсысь вапумъёсы!
Вань калык мед шуоз:
Аминь! Аллилуия!
*а 105:28 Ваал-Фегор – моав калыклэн сульдэрез-идолэз
*б 105:30 Финеес – Аарон выжыысь священник
Глава 105