Выбрать язык
Книги Ветхого Завета
Книги Нового Завета
с русским текстом1Иов ответ сётыса шуиз:
2«Зэм ик, тӥ гинэ калык, тӥледын валче кулоз визьлык!
3Мынам но тӥляд кадь ик сюлмы вань;
мон тӥлесьтыд улынгес ӧвӧл; сое кин уг тоды?
4Мон аслам эше азьын серекъян-веранлы пӧрми,
мон – Инмарлы вазиськылӥсь, Со мыным ответ сётылӥз,
мон, шонер улӥсь, дун-шектэм адями,
серекъян-веранлы пӧрми.
5Пыдынызы канжаськисьёслы дасям факелэз
каньыллыкын пукись сыӵе синазькыль каре.
6Адями таласьёслэн улон интыоссы каньыл азьын сыло,
Инмарлэсь вожзэ поттӥсьёс но кышкантэм интыын сыло,
сульдэръёссэс Инмар интыын ки йылазы нулло.
7Но зэм ик: пудолэсь юа, со тонэ дышетоз,
ин тылобурдолэсь юа, со тыныд ивортоз;
8яке музъемен вераськы, со тыныд визь-нод сётоз,
зарезь чорыгъёс но тыныд вералозы.
9Тае Кузё-Инмарлэн киыз кылдытӥз шуыса,
кин ваньзэ тае уз тоды?
10Солэн кияз вань улэп макеослэн лулзы возиське,
котькуд адями лулмугорлэн но духез Со киын возиське.
11Пель-а кылъёсты уг кылы, кыл-а сиёнлэсь шӧмзэ уг шӧды?
12Пересь визьнодчиос бордын визьлык улэ,
кема улӥсьёс бордын визь-нод возиське.
13Со дорын бадӟым визьлык но кужым;
кенеш, визь-нод сётон но Со киын.
14Мае Со куашкатоз, со уз пуктӥськы;
кинэ Со пытсалоз, со уз мозмытскы.
15Вуосты дугдытӥз ке, ваньмыз куасьмоз;
вуосты лэзиз ке, музъемез гылтоз.
16Со киын туж бадӟым кужым, бадӟым визьлык,
Солэн киулаз йыромись но, йыромонэ пыртӥсь но.
17Кенеш сётӥсьёсты малпамтэ уже вуттэ,
судить карисьёсты номыр валасьтэм каре.
18Эксэйёсты Со думеттэк кельтэ, кусъёссэс еэн думылэ;
19кивалтӥсьёсты сӥтэк-сантэк кельтэ, кышкасьтэмъёсты погыръя;
20трос вераськисьёсты кылтэм каре,
пересь визьнодчиосты визьтэк кельтэ;
21тодмо-дано адямиосты возьытлыкен шобыртэ,
туж бадӟым кужымоослэсь кынарзэс лябӟытэ;
22пеймытлык пӧлысь мурдалаез усьтэ но
кулонлэсь вужерзэ югытэ поттэ;
23калыкъёсты йылэтэ но, соосты быдтылэ но;
калыкъёсты пазьгылэ но, соосты огазе люка но;
24музъем вылысь калыклэн йыръёсызлэсь визьзэс тала но
кыр дуннеетӥ йыромыса, сюрестэм азьёстӥ
соосты ветлыны кельтэ:
25тылтэк-югыттэк пеймыт азьтӥ киынызы кырмиськылыса ветло,
кудӟем муртъёс выллем азьлань-берлань ветло».
Глава 12