Выбрать язык
Книги Ветхого Завета
Книги Нового Завета
с русским текстом2-тӥ книга
1Эксэе пуксьыкуз, Ахазлы кызь арес вал, дас куать ар со Иерусалимын эксэй вал. Давид атаез кадь со Кузё-Инмар азьын ярамон ужъёс лэсьтыса ӧз улы.2Израиль эксэйёслэн сюрестӥзы со мынӥз, Вааллэсь сульдэръёссэ но ӵыжатыса лэсьтӥз;3Енном пиослэн нёжалазы со ӵындытъянъёс ортчытъяз, израиль пиослэн азьысьтызы Кузё-Инмарлэн уллям калыкъёсызлэсь юрӟым ужъёссэс адӟем карыса, пиоссэ со тыл вамен поттылӥз;4гурезь йылъёсын, вырйылъёсын, улваё писпуос улъёсын курбонъёс сётъяз, ӵындытъянъёс ортчытъяз.5Инмарез Кузё-Инмар сое Сириялэн эксэезлэн киулаз сётӥз, соос сое вормизы, пленэ трос калыксэ басьтӥзы, Дамаске нуизы. Озьы ик со Израильлэн эксэезлэн киулаз но сётэмын вал, соиз та дорын ваньзэ таркаса куштӥз.6Ремалиялэн Факей пиез [Израильлэн эксэез] сю кызь сюрс иудей пиосты одӥг нунал куспын погыртӥз.7Нош Зӥхрий, Ефрем выжыысь потэм батыр, эксэйлэсь Маасея пизэ, дворецын кузёяськись Азрикамез но Елканаез – эксэй бере кыкетӥ адямиез – вииз.8Израиль пиос асьсэлэн агай-вынъёссылэсь, иудей пиослэсь, кык сю сюрс кышнооссэс, пиоссэс, нылъёссэс пленэ нуизы; трос ваньбурзэс но талазы, талам ваньбурзэс Самарияе келязы.
9Отын Кузё-Инмарлэн пророкез вал, солэн нимыз Одед. Со Самарияе мынӥсь ожгарчиослэн азязы потыса шуиз: «Тани атайёстылэн Инмарзы Кузё-Инмар, иудейёсызлы вожез потэмен, соосты тӥляд киулады сётӥз, нош тӥ соосты сыӵе бадӟым йыркурен виылӥды, со Инмозь вуиз.10Табере Иудеяысь, Иерусалимысь калыкез киултыса ляльчи пиос, ляльчи нылъёс карыны медӥськоды. Нош тӥляд асьтэлэн ӧвӧл шат Инмарды Кузё-Инмар азьын янгышты?11Озьыен, монэ кылзӥське но пленэ нуэм асьтэлэсь агай-вынъёстэс берен бертыны лэзе, уго Кузё-Инмарлэн вожпотонэзлэн тылыз тӥ вылэ ӝуатскемын».12Соку Ефрем выжыысь потэм куд-ог кивалтӥсьёс – Иегохананлэн Азария пиез, Мешиллемофлэн Берехия пиез, Шаллумлэн Езекия пиез, Хадлайлэн Амаса пиез – ожысь берытскисьёслэн ваче пумитазы султӥзы но13соослы шуизы: «Пленэ шедемъёсты татчы эн пыртэ, уго Кузё-Инмар азьын милемлы сьӧлык луысал. Сьӧлыкъёсмы борды, йыружъёсмы борды тӥ эшшо ватсаны малпаськоды на-а? Туж бадӟым милям янгышмы, Кузё-Инмарлэн вожпотонэзлэн тылыз Израиль вылын улэ».14Ож тӥрлыкен адямиос пленэ сюремъёсты, талам ваньбурзэс ожен кивалтӥсьёс, вань люкаськем калык азе кельтӥзы.15Пиосмуртъёс, нимын-нимын верамъёс, султӥзы но пленэ сюремъёсты басьтӥзы, соос пӧлысь гольык кылемъёсты талам ваньбур пӧлысь дӥськутэн дӥсязы, – дӥсязы, кутчазы, сюдӥзы, сектазы, вӧйын зырӟизы, соос пӧлысь катьтэммемъёсты ишакъёс вылэ пуктылӥзы но пальмаё Иерихон каре агай-вынъёссы доры келязы, асьсэос Самарияе берытскизы.
16Со виын Ахаз эксэй Ассирияысь эксэйёс доры юрттэт курыны ыстӥз.17Уго идумей пиос эшшо татчы вуылӥзы на, Иудеяысь трос калыкез виылӥзы, пленэ нуизы.18Филистим калык Иудеялэн улыго шаерезлэн но лымшорысьтыз городъёсазы пыриськизы но Вефсамисэз, Аиалонэз, Гедерофез, Сохоез но соослэн котырысьтызы гуртъёсты киултӥзы, Фимнаез но солэн котырысьтыз гуртъёсты, Гимзоез но солэн котырысьтыз гуртъёсты киултӥзы но отчы улыны интыяськизы.19Иудеялэн Ахаз эксэез понна Кузё-Инмар Иудеяез тазьы сантэм кариз, уго со Иудеяез шонер сюрес вылысь кожытӥз, Кузё-Инмар азьын туж секыт сьӧлыкъёс лэсьтыса улӥз.20Со доры Ассириялэн Феглафелласар эксэез лыктӥз, но со солы секытлык гинэ кылдытӥз, юрттэм интые,21уго Ахаз Кузё-Инмар коркась, эксэй коркась, кивалтӥсьёслэсь ваньбурзэс басьтӥз но Ассириялэн эксэезлы сётӥз, но со уж солы иназ ӧз мыны.
22Ачиз ӝикаса улон дыръя но со Кузё-Инмар азьын законлы пумит улэмысь ӧз дугдылы, со – Ахаз эксэй.23Дамаскысь инмаръёслы курбонъёс сётылӥз, малпа вал, соос сое погыръяло шуыса, со вераз: «Сирияысь эксэйёслэн инмаръёссы соослы юрттӥсько; мон соослы курбон сёто, соос мыным юрттозы». Но ваньмыз та аслыз погранлы, быдэс Израильлы погранлы мынӥз.24Соку Ахаз Инмар коркась сосудъёсты люказ но Инмар коркась сосудъёсты пыргытӥз, Кузё-Инмар коркалэсь ӧсъёссэ тунгоназ но Иерусалимлэн вань сэрегъёсаз аслыз курбон сётонъёс лэсьтылӥз.25Иудеяысь вань городъёслэн гурезь йылъёсазы мурт инмаръёслы ӵындытон ортчытыны вӧсяськон интыос лэсьтылӥз, соин со атайёсызлэн Инмарзылэсь Кузё-Инмарлэсь вожзэ поттылӥз.
26Солэн мукет ужъёсыз, выросъёсыз, нырысетӥосыз но, берпуметӥосыз но, гожтэмын Иудеяысь, Израильысь эксэйёслэн книгаязы.27Ахаз кулӥз но, сое Иерусалиме атайёсынызы огазе ватӥзы, но Израиль эксэйёсты ватон интые ӧз пыртэ. Со интые эксэе пуксиз Езекия пиез.
Глава 28