Выбрать язык
Книги Ветхого Завета
Книги Нового Завета
с русским текстом2-тӥ книга
1Иосафат атайёсыз кадь ик кулӥз, атайёсыныз огазе Давидлэн городаз со ватэмын. Со интые Иорам пиез эксэе пуксиз.2Солэн агай-вынъёсыз вал – Иосафатлэн пиосыз: Азария, Иехиил, Захария, Азария, Михаил но Сафатия – ваньзы соос Израильлэн Иосафат эксэезлэн пиосыз вал.3Атайзы соослы азвесен, зарниен, дуно макеосын кузьымъёс сётъяз, Иудеяысь юнматэм городъёсын ӵош; нош эксэйлыкез Иорамлы сётӥз, уго со нырысь вордскем пи вал.4Иорам атаезлэн эксэйлыказ кивалтӥсе пуксиз, юнматскиз, аслэсьтыз вань вынъёссэ, нош озьы ик Израильлэсь куд-ог кивалтӥсьёссэ мечен бышкаса вииз.
5Эксэе пуксьыкуз, Иорамлы куамын кык арес вал, тямыс ар ӵоже Иерусалимын эксэй пуконын пукиз;6Израиль эксэйёслэн сюрестӥзы ветлӥз, Ахав семья музэн улӥз, уго Ахавлэн нылыз солэн кышноез вал, – Кузё-Инмар азьын ярантэм ужъёс лэсьтыса улӥз.7Нош Кузё-Инмарлэн уг поты вал Давидлэн эксэй выжыез быдтэмез Давидэн сӥзён-косон пыр кусып кылдытэмез понна, солы но, солэн пиосызлы но вань дауръёс ӵожелы югдытон сётыны сӥземез понна.
8Со эксэйын улон дыръя Иудеялэн киулысьтыз Едом потӥз но асьсэлы эксэй пуктӥзы.9Аслаз ожен кивалтӥсь йыръёсыныз ӵош Иорам потӥз, соин ӵош вань ожмаськон уробоос но; уйин султыса, идумей ожгарчиосты погыртӥз, кинъёс сое но, ожмаськон уробоосын кивалтӥсь йыръёсты но котыртӥзы, [калык улон юртъёсаз пегӟыса кошкиз].10Нош Едом туннэ нуналын но Иудеялэн киулысьтыз потыса улэ. Со виын ик Ливна но Иорамлэн киулысьтыз потӥз, малы ке шуоно со аслаз атайёсызлэн Инмарзылэсь Кузё-Инмарлэсь палэнскиз.11Иудеяысь гурезьёсы со гурезь йылын вӧсяськонъёс усьтылыны кутскиз, Иерусалимын улӥсьёсты азон уже кыскиз, Иудеялэсь визьзэ тугаз.
12Солы Илия пророклэсь гожтэт вуиз, отын шуэмын вал: «Тынад атаедлэн, Давидлэн, Инмарез Кузё-Инмар тазьы шуэ: Атаедлэн, Иосафатлэн, Асалэн, Иудей эксэйлэн, сюрестӥзы мынымтэед понна,13Израиль эксэйёслэн сюрестӥзы мынэмед понна но Иудеяез, Иерусалимын улӥсьёсты азон сьӧлыке пыртэмед понна, кызьы Ахав семья азон сьӧлыке пыртӥз, эшшо тынэсьтыд агай-вынъёстэ, атаедлэсь выжы-кумыоссэ, кинъёс тынэсьтыд умоесьгес вал, нош тон соосты но виылӥд.14Та понна тани Кузё-Инмар туж бадӟым кужымен тынэсьтыд калыктэ но, пиостэ но, кышноостэ, вань узырлыктэ но быдтоз.15Нош тонэ астэ но Кузё-Инмар туж секыт висёнэн виёз, нуналысь нуналэ пушкысьтыд сюлъёсыд ик, висёнлы чидатэк, усьылыны кутскозы».
16Кузё-Инмар Иорамлы пумит филистим, араб калыкъёслэсь, эфиоп калыкен артэ улӥсь калыклэсь но духсэс ӝутӥз.17Соос Иудеяе ожен мынӥзы, со пушкы пыризы, эксэйлэн юртысьтыз вань узырлыксэ киултӥзы, нош озьы ик пиоссэ, кышноссэ; вань пиосыз пӧлысь Охозия нимо самой пичи пиез гинэ кылиз.18Нош таос бере Кузё-Инмар солэн пушказ-ераз эмъяны луонтэм висён лэзиз.19Нуналысь нуналэ озьы вал, нош кыкетӥ арлэн пумаз, висёнэзлы чидатэк, пушкыз-ерыз усьылыны кутскиз но туж курадӟыса кулӥз; со понна калык ческыт зыно ӵындытонъёс ӧз ортчыты, кызьы солэн атайёсызлы лэсьтэ вал.
20Куамын кык арес вал эксэе пуксьыкуз, тямыс ар ӵоже Иерусалимын эксэй луыса кивалтӥз; но бӧрдытэк сое ватӥзы, Давидлэн городаз ватӥзы, но эксэйёсты ватон шайгуэ ӧз понэ.
Глава 21