Выбрать язык
Книги Ветхого Завета
Книги Нового Завета
с русским текстом1-тӥ книга
1Давид Иерусалиме израиль калыклэсь вань азьвалтӥсьёссэ, выжыослэсь тӧрооссэс, отрядъёслэсь кивалтӥсьёссэс, эксэйлы ужась-тыршисьёсты, сюрс ожгарчиосын, сю ожгарчиосын кивалтӥсьёсты, быдэс эксэй юртэз утись-чакласьёсты, эксэйлэсь пудооссэ возьмасьёсты, эксэйлэсь нылпиоссэ утись-чаклась евнухъёсты, ож ужен кивалтӥсьёсты, вань кышкасьтэм пиосмуртъёсты люказ.2Давид эксэй пыд йылаз султыса шуиз: «Агай-вынъёсы, калыке, кылзэ монэ! Мынам сюлмам вал Инмармылэн пыд выжыяз Кузё-Инмарлэн сӥзён-косонэныз ковчегез возён корка пуктыны, мар кулэ пуктӥськыку, мон сое дасяй.3Нош Инмар мыным шуиз: ”Мынам нимылы сӥзем корка эн пукты, малы ке шуоно тон ожмаськись, вир кисьтӥсь адями”.4Озьы ке но Израильлэн Инмарез Кузё-Инмар мынам атаелэн быдэс выжыысьтыз монэ бырйиз, пумтэм вапумъёс ӵоже Израильлы эксэй мед луом шуыса, малы ке шуоно Иудаез Со кивалтӥсьлы бырйиз, нош Иудалэн выжыысьтыз, мынам атаелэсь выжызэ бырйиз, нош мынам атаелэн пиосыз пӧлысь быдэс Израильлы эксэе пуктыны мыным ӟеч эриксэ возьматӥз,5нош мынам вань пиосы пӧлысь, – трос пиос сётӥз мыным Кузё-Инмар, – Со бырйиз Соломонэз, мынэсьтым пиме, Кузё-Инмарлэн Израильлы сётэм эксэйлыкезлэн пукон вылаз пукыны,6собере мыным шуиз: ”Соломон, тынад пиед, Мынэсьтым коркаме пуктоз, азбаръёсме но, уго Мон сое Аслым пилы бырйи, Мон солы атай луо,7туннэ нуналозь кадь Мынэсьтым курон-косонъёсме, пуктон-косонъёсме юн утьыса возиз ке, солэсь эксэйлыксэ пумтэм вапумъёслы юнмато”.
8Нош али быдэс Израильлэн, Кузё-Инмарлэн люкам калыкезлэн, син азяз, Инмармылэн пеляз кылӥськымон верасько: уте, быдэсъялэ Инмардылэсь, Кузё-Инмарлэсь вань курон-косонъёссэ та ӟеч музъемез киулады возьыны мед быгатоды, асьтэ бере сое пумтэм вапумъёс ӵожелы асьтэлэн нылпиостылы люкетлы кельтыны мед быгатоды.9Тон но, Соломон, мынам пие, тод атаедлэсь Инмарзэ, вань сюлмыныд, мылкыдыныд солы ужаса-тыршыса ул, уго Кузё-Инмар вань сюлэмъёсты эскере, вань малпанъёсмылэсь бергамзэс тодэ. Утчад ке Сое, шедьтод Сое, нош Со дорысь палэнскид ке, Со вань вапумъёс ӵожелы тонэ палэнтоз.10Учкы ук, вӧсяськонлы корка пуктыны тонэ Кузё-Инмар бырйиз бере, юн лу, ужа».
11Давид Соломон пиезлы храм бӧльмылэсь, коркаосызлэсь, тыриськон интыосызлэсь, коркалэн бадӟым палъёсызлэсь, пушкысьтыз шутэтскон интыосызлэсь, ковчег возён коркалэсь чертёжзэс сётӥз.12Мар вал солэн сюлмаз, Кузё-Инмарлэн коркаезлэн азбаръёсызлэсь, котыр ласянь комнатаослэсь, Инмар коркалэн ваньбур возён интыосызлэсь, вӧсяськонлы сӥзем арбериосты возён интыослэсь вань чертёжъёссэс сётӥз,13со валэктӥз священникъёслэсь, левитъёслэсь служить карон черодъёссэс, Кузё-Инмарлэн корказ службаен герӟаськем пӧртэм ужъёсты, Кузё-Инмарлэн коркасьтыз службаын кутӥськись сосудъёсты,14со вераз, кӧня зарни но кӧня азвесь кулэ луоз служить карон сосудъёсты лэсьтыны.15Югдытон арбериос, зарни лампадаос лэсьтон понна зарни сётӥз, вань югдытон арбериослэсь, лампадаослэсь секталазэс мертаса гожтӥз, озьы ик азвесь югдытон арбериос лэсьтыны вань югдытон арбериослэсь, лампадаослэсь секталазэс мертаса гожтӥз, котькуд югдытон арберилэсь малы кулэ луэмзэс лыдэ басьтыса;16вӧсям нянь тырон ӝӧкъёслы зарни, котькуд зарни ӝӧклы но, азвесь ӝӧкъёслы азвесь сётӥз,17вилкаос, тэркыос, ву пазянъёс чылкыт зарнилэсь лэсьтэмын, зарни тэркыос: котькуд зарни тэркылэсь секталазэ гожтыса; азвесь тэркыос но: котькуд тэркылэсь секталазэ гожтыса сётӥз,18ӵындытон курбон сётон ӝӧклы но ӵыжатэм зарнилэсь секталазэ гожтыса сётӥз, ожмаськон уробо лэсьтонэз но, бурдъёссэс вӧлъяса, Кузё-Инмарлэсь сӥзён-косонэныз ковчегзэ шобыртыса улӥсь зарни херувимъёсты лэсьтонэз валэктӥз.19Ваньмыз та Кузё-Инмарлэн гожтэмаз, – вераз Давид, – Со мыным вань пуктӥськон ужъёслы визь-нод сётӥз.
20Давид Соломон пиезлы шуиз: «Кужмо лу, кышкасьтэм лу, уж борды басьтӥськы, эн кышка, эн куалекъя, уго Инмар Кузё-Инмар мынам Инмаре Со тонэн, Со тон дорысь уз палэнскы, тонэ уз кушты, Кузё-Инмарлэн коркаезлы кулэ вань ужъёстэ быдэстытозяд.21Тани Инмарлэн корказ ужаны-тыршыны священникъёслы, левийёслы служить карон черодъёссы. Котькыӵе ужез быдэстыны тынад но сюлмо адямиосыд вань, вань ужъёсты быдэсъяны кибашлы адямиосыд вань, кивалтӥсьёс но, вань калык но тынэсьтыд вань косонъёстэ быдэсъяны дасесь».
Глава 28