Выбрать язык
Книги Ветхого Завета
Книги Нового Завета
с русским текстом1-тӥ книга
1Израильлэн нырысь вордскемезлэн, Рувимлэн, пиосыз, – со нырысь вордскем пи, нош куке со атаезлэсь валессэ саптаз, нырысь пи луонэз сётэмын вал Израильлэн Иосиф пиезлэн пиосызлы, но сыӵе амалэн-куронэн: соослы нырысь вордскемъёс шуыса гожтӥськыны уг яра,2Иуда агай-вынъёсыз пӧлысь кужмоез вал, азьвалтӥсь но со бордысь потэмын, нош нырысь пи луон Иосифлы сётэмын.3Израильлэн нырысь вордскемезлэн, Рувимлэн, пиосыз: Ханох, Фаллу, Хецрон но Харми.
4Иоильлэн пиосыз: Шемая, солэн пиез; солэн пиез Гог, солэн пиез Шимей,5солэн пиез Миха, солэн пиез Реаия, солэн пиез Ваал,6солэн пиез Беера, сое Ассириялэн Феглафелласар эксэез пленэ нуиз. Со Рувим выжылэн кивалтӥсь йырыз вал.7Солэн агай-вынъёсыз, улы-выжызыя, выжы-кумызэс гожъян книгаын тазьы интыямын вал: самой вылӥез Иеиель, собере – Захария,8собере, Иоильлэн Шема пиезлэн, Азаз пиезлэн, Бела пиез. Соос улӥзы-вылӥзы Ароерын, Невоысен Ваал-Меонозь;9нош шундыӝужан ласяньын – Ефрат шур дорысь лыктӥсь луоё кыр дуннее пырон инты дорозь улӥзы, уго соослэн Галаад музъемын трос пудо уллёоссы вал.10Саул эксэй луон вакытэ Рувим выжы Агарьлэн выжыысьтыз потэм калыкен ожмаськыса улӥзы, соосты виылӥзы но соослэн балаганъёсазы, Галаадлэн быдэс шундыӝужанпал люкетаз, улыны кутскизы.
11Гадлэн пиосыз таослэн ваче бериназы Васан музъемын Салхаозь улӥзы:12Васанын Иоиль йырзы вал, Шафан – кыкетӥез адями, со бере – Иаанай но Шафат.13Соослэн сизьым агай-вынъёссы семьяосынызы валче вал: Михаил, Мешуллам, Шева, Иорай, Иаакан, Зӥя но Евер.14Тани Бузлэн Иахдо пиезлэн, Иешишай пиезлэн, Михаиллэн Галаад пиезлэн, Иароахлэн Хурий пиезлэн Авихаиллэн пиосыз:15Гунийлэн Авдиил пиезлэн Ахи пиез, со выжылэн йырыз вал.16Соос Галаадын, Васанын, соослы тэрытскись городъёсын улӥзы, Саронлэн котыраз, солэн пумысеныз пумозяз.17Ваньзы соос лыдъяса-ӵотаса выжы-кумыез гожъян книгае пыртэмын Иудеяын Иоафам эксэй кивалтон дыръя, Израильын Иеровоам эксэйын пукон дыръя.
18Рувимлэн но Гадлэн выжыязы, Манассиялэн ӝыныё выжыяз оже потыны, ожмаськыны ярась, щит но меч нуллӥсь воргоронъёс, пукыӵен ыбылӥськыны, ожмаськыны дышетэм ньыльдон ньыль сюрс сизьым сю куатьтон мурт вал.19Соос ожмаськизы агарянъёсын, иетур, нафиш, надав калыкъёсын.20Таослы пумит ожмаськыны кужым сётэмын вал, соослэн киулазы агарянъёс но марзы соослэн вал, ваньзы сётэмын вал, малы ке шуоно ожмаськон дыръя Инмарлы вазиськизы но, Со соосты кылӥз – соослэн Солы оскиськыса улэмзы понна.21Соослэсь пудо уллёоссэс басьтӥзы: витьтон сюрс верблюдъёссэс, кык сю витьтон сюрс ыжъёссэс-кечъёссэс, кык сюрс ишакъёссэс, сю сюрс адямизэс.22Трос мурт бырыны сюриз, уго та ожмаськон Инмар дорысь сётэмын вал. Мукет интые улыны нуытозязы, соос татын улӥзы.
23Манассия выжылэн ӝыны люкетэз та музъемын улӥз, – Васанысен Ваал-Ермонозь, Сенирозь, Ермон гурезёзь; трос кузя вал соос.24Тани та выжыослэн кивалтӥсь йыръёссы: Ефер, Ишьи, Елиил, Азриил, Иеремия, Годавия но Иагдиил, кужмоесь воргоронъёс, нимо-дано адямиос, ас выжыоссылэн йыръёссы.
25Атайёссылэн Инмарзылы пумит сьӧлыказы, Инмарлэн со музъемысь уллям выжыосызлэн инмаръёссы азьын йыбыртъяны кутскизы,26соку Израильлэн Инмарез Ассириялэн Фул эксэезлэсь духсэ, Ассириялэн Феглафелласар эксэезлэсь духсэ ӝутӥз но Рувимен Гад выжыосты, Манассия выжылэсь ӝыны люкетсэ асьсэлэн улон интыысьтызы Халахе, Хаворе, Арае, Гозан шур дуре нуиз, – отын соос туннэ нуналозь но уло.
Глава 5