Выбрать язык
Книги Ветхого Завета
Книги Нового Завета
с русским текстом1Израильын Илалэн Осия пиез эксэйын куинетӥ арзэ пукыку, Иудеяын Ахазлэн Езекия пиез эксэе пуксиз.2Эксэе пуксьыкуз, солы кызь вить арес вал. Иерусалимын со кызь укмыс ар ӵоже эксэйын пукиз; солэн анаезлэн нимыз Ави, Захариялэн нылыз вал со.3Кузё-Инмарлэн азяз со ярамон ужъёс лэсьтыса улӥз, ваньзэ лэсьтӥз Давид атаез музэн.4Гурезь йылъёсын вӧсяськонъёсыз со дугдытӥз, сульдэръёсты пыргытъяз, вӧсяськон тыпы сурдъёсты кораз, Моисейлэсь лэсьтэм ыргон кыйзэ быдтӥз, уго израиль пиос со дырысен со азьын ӵындытыса улӥзы но сое Нехуштан шуыса нимазы.5Израильлэн Инмарез Кузё-Инмар вылэ оскиськыса со улӥз; Иудей эксэйёс пӧлын со кадез солэн азяз но, со бере но ӧй вал.6Кузё-Инмар борды со думиськыса улӥз, Со бордысь ӧз усьылы, Кузё-Инмарлэсь Моисейлы сӥзьыса сётэм курон-косонъёссэ быдэсъяса улӥз.7Кузё-Инмар соин огазьын вал: кытчы гинэ со ӧз ветлы, котькытын но визьмын улӥз. Ассириялэн эксэез бордысь со палэнскиз но солы ужаса-тыршыса улэмысь дугдӥз.8Газаозь, солэн котыраз но, возьмаськон каланча дорысен юнматэм городзы дорозь, филистим калыкез погыртӥз.
9Езекия ньылетӥ арзэ эксэйын пукыку, нош Израильын Илалэн Осия пиез сизьыметӥ арзэ эксэйын пукыку, Ассириялэн Салманассар эксэез Самария вылэ урдскиз, сое котыртӥз.10Куинь ар ортчыса, сое киултӥз, – Езекиялэн куатетӥ араз, Израильын Осия укмысэтӥ арзэ эксэйын пукыку, Самария киултэмын вал.11Израильысь калыкез Ассириялэн эксэез Ассирияе улыны нуиз, соосты Гозан шур дурысь Халахе, Хавор шур дуре, Мидияысь городъёсы улыны интыяз,12Инмарзылэсь Кузё-Инмарлэсь верамзэ санэ понымтэзы, сӥзён-косонзэ сӧрыса улэмзы понна вал со: Кузё-Инмарлэн ляльчиез Моисей кыӵе курон-косонъёс сётӥз, соос кылэм но ӧз каре, ӧз но быдэсъялэ.
13Езекия дас ньылетӥ арзэ эксэйын пукыку, Ассириялэн Сеннахирим эксэез Иудеялэн вань юнматэм городъёсыз вылэ урдскиз но соосты киултӥз.14Иудеялэн Езекия эксэез Лахисэ Ассириялэн эксэезлы вераны ыстӥз: «Янгышо мон; мон дорысь кошкы; кыӵе тырон тырыны косод, мон тыро». Соку Ассириялэн эксэез Иудеялэн Езекия эксэез вылэ куинь сю талант азвесь но куамын талант зарни тыриськон понӥз.15Кузё-Инмарлэн коркасьтыз, эксэй юртысь ваньбур тырон шыкысъёсысь шедьтэм вань азвесез Езекия солы сётӥз.16Со виын Езекия Кузё-Инмарлэн коркаезлэн ӧс бордысьтыз, Иудеялэн Езекия эксэезлэсь ӧс юбоос борды чеберъяны тырем зарнизэ ваньзэ Ассириялэн эксэезлы сётӥз.
17Ассириялэн эксэез Тартанэз, Рабсарисэз, Рабсакез Лахисысь Иерусалиме Езекия эксэйлы пумит бадӟым войскоен ыстӥз. Мынӥзы соос, Иерусалиме вуизы; мынӥзы но вуизы вылӥысь ӵыпетлэн ву бызён дырдыосыз доры, дэра гужатӥсьлэн бусыысьтыз сюрес вылэ.18Эксэез ӧтьыны кутскизы. Соос доры потӥзы эксэй юртэн кивалтӥсь, Хелкиялэн пиез Елиаким, Севна подъясь но эксэй ужъёсты гожъясь Асафлэн Иоах пиез.
19Рабсак соослы шуиз: «Езекиялы тазьы шуэ: тазьы шуэ Ассириялэн эксэез, быдӟым эксэй: мар со сыӵе оскиськон, кудӥз вылэ тон оскиськыса улӥськод?20Тон юнме кылъёс гинэ верад: ожмаськонлы кенеш но кужым гинэ кулэ. Нош али кин вылэ оскиськиськод, мон бордысь куштӥськид бере?21Тани, тон Египет вылэ пыкъяськыны малпаськод, тӥяськем боды вылэ, кин со вылэ пыкъяськоз, со солэн кияз мертчиськоз но пась кароз. Сыӵе со Египетлэн эксэез, фараон, кин со вылэ оскиськыса улэ.22Тӥ мыным тазьы шуиды ке: ”Инмармы Кузё-Инмар вылэ оскиськиськомы”, но со вылэ-а, кинлэсь гурезь йылъёсын вӧсяськонъёссэ, курбон сётон интыоссэ воштӥз Езекия, Иудеялы но, Иерусалимлы но шуиз: ”Та курбон сётон интылэн азяз гинэ Иерусалимын йыбыртъялэ”?23Озьыен, мынам кузёеным, Ассириялэн эксэеныз, эшлыко кусып кылдыты; мон тыныд кык сюрс вал сёто, соос вылын мыныны адямиос шедьтод-а?24Кызьы тон вормод мынам кузёелэн покчи медоосыз пӧлысь одӥгзэ ке но азьвалтӥсьсэ? Ожмаськон уробоосыз но валъёсыз понна-а тон Египет вылэ оскиськиськод-а?25Эшшо ке, та интые мон Кузё-Инмарлэн эрикезтэк сое куашкатон понна лыктӥ шат? Кузё-Инмар мыным шуиз: ”Со музъем вылэ мыныса куашкаты сое”».
26Соку Хелкиялэн пиез Елиаким но Севнаен Иоах Рабсаклы шуизы: «Ляльчиосыдлы арамей кылын вера, уго ми сое валаськомы, нош борддор йылын сылӥсь калыклэн иудей кылыныз шара эн вера».27Рабсак соослы шуиз: «Тынад кузёедлы но тыныд гинэ та кылъёсты вераны монэ кузёе ыстӥз шат? Ӧвӧл, борддор йылын пукись адямиослы но, тӥледын ӵош соос сӥтьсэс мед сиёзы, кизьзэс мед юозы шуыса».
28Соку Рабсак султӥз но бадӟым куараен иудей кылын ялыса шуиз: «Кылзэлэ быдӟым эксэйлэсь, Ассириялэн эксэезлэсь, верам кылзэ!29Тазьы шуэ эксэй: Езекия тӥлесьтыд визьдэс медаз туга, уго со тӥледыз мынам киулысьтым утьыны уз быгаты;30Езекия тӥледыз Кузё-Инмар вылэ оскиськытыса медаз возьы, медаз шуы: ”Асьмеды Кузё-Инмар утёз, Ассириялэн эксэезлэн киулаз та город сётэмын уз луы”.31Езекияез эн кылзэ. Уго тазьы шуэ Ассириялэн эксэез: монэн тупатске, мон доры потэ, котькудды но виноградпудысьтыды, смоквапуысьтыды емышъёс мед сиёды, котькудды асьтэлэн гудӟемысьтыды ву мед юоды,32тӥледыз лыктыса тӥляд асьтэлэн музъемды кадь ик музъеме мон нуытозь, – нянё, винаё музъеме, емышъёслэн, виноградпудъёслэн музъемазы, вӧйпуослэн, чечылэн музъемазы, – отын улоды, отчы уд кулэ. ”Кузё-Инмар асьмеды утёз” шуыса визьдэс сынась Езекиялэсь верамзэ эн кылзӥське.33Калыкъёслэн инмаръёссы Ассирия эксэйлэн киызлэсь музъемзэс утизы-а?34Кытын Емафлэн, Арпадлэн инмаръёссы? Кытын Сепарваимлэн, Еналэн, Иввалэн инмаръёссы? Самарияез мынам киылэсь соос утизы-а?35Та музъемъёсысь вань инмаръёс пӧлысь кудзы мынам киылэсь ас музъемзэ утиз? Оло, Кузё-Инмар Иерусалимез мынам киылэсь утёз шат?»
36Калык чус улӥз, солы одӥг кыл но ӧз вера, малы ке шуоно эксэйлэн косонэз вал: «Солы ответ эн сётэ».37Соку эксэй юртлэн кивалтӥсез Хелкиялэн пиез Елиаким, Севна подъясь но эксэйлэсь ужъёссэ гожъясь Асафлэн Иоах пиез, дӥськутсэс кесяса, Езекия доры лыктӥзы но солы Рабсаклэсь кылъёссэ веразы.
Глава 18