Выбрать язык
Книги Ветхого Завета
Книги Нового Завета
с русским текстом1Пророкъёслэн пиоссы пӧлысь одӥгезлэн кышноез Елисейлы бӧрдыса вераз: «Тынад ляльчиед, мынам картэ, кулӥз; нош тон тодӥськод вал, ляльчиед Кузё-Инмарлэсь курданэн улэ вал шуыса; али пунэмен сётъясь мынэсьтым кыксэ но пиосме аслыз ляльчилы басьтыны лыктӥз».2Елисей солы шуиз: «Мар меда мон тыныд лэсьтом? Вера мыным, тынад коркад маид вань?» Кышномурт шуиз: «Вӧйын сосудэз сяна ляльчи кышноедлэн номыриз но ӧвӧл».3Елисей солы шуиз: «Мын, палэнысь аслыд сосудъёс курылы, вань бускельёсыдлэсь кур, буш сосудъёс люка; трос сосуд люка.4Собере коркад пыр но ас бӧрсяд, пиосыд бӧрсьы ӧстэ тунгона; ваньмаз сосудъёсад вӧй лэзь; тырмытэмъёссэ палэнэ пон».
5Со дорысь потӥз но, корказ пырыса, ас бӧрсяз, пиосыз бӧрсьы ӧссэ тунгоназ. Пиосыз сётъязы, нош со лэзьяз.6Сосудъёссэ тырмытъям бераз со пиезлы шуиз: «Эшшо одӥг сосуд вай на». Пиез солы шуиз: «Сосудъёсмы ӧвӧл ни». Соку вӧй виямысь дугдӥз.7Кышномурт лыктыса Инмар адямилы ваньзэ вераз. Елисей солы шуиз: «Мын, вӧйдэ вуза но пунэмъёстэ тыр; нош кӧняез кылиз, соин пиосыныд валче кӧттэс тырыса улоды».
8Одӥг нуналэ Елисей Сонаме лыктӥз. Отысен сое одӥг узыр кышномурт дораз сиськыны туж ӧтиз. Ку гинэ со уг лыкты вал, котьку отчы сиськыны пыралляз.9Кышномурт кузпалызлы шуиз: «Мон тодӥсько, асьме вӧзтӥ ветлӥсь мурт – Инмарлэн адямиез, со – святой шуыса.10Борддоръёсмы йылэ солы пичи висъет лэсьтом, отчы солы валес валём, ӝӧк, пукон, лампада пуктом. Асьме доры лыктӥз ке, отчы мед пыроз».
11Одӥгаз нуналэ со отчы лыктӥз но висъет сьӧры пырыса выдӥз.12Соку со Гиезий нимо медоезлы шуиз: «Та Сонам кышноез ӧть ай». Ӧтьыса вайиз, кышномурт Елисей азе султӥз.13Елисей Гиезийлы шуиз: «Вера та кышномуртлы: ”Тон сокем ми сярысь сюлмаськиськод, мар меда ми тыныд лэсьтыны быгатомы? Эксэен яке ожгарчиослэн кивалтӥсенызы тон сярысь вераськыны кулэ ӧвӧл-а?”» Кышномурт шуиз: «Кулэ ӧвӧл, мон ас калыке пӧлын улӥсько».14Елисей шуиз: «Мар меда солы лэсьтоно?» Соку Гиезий шуиз: «Тани, солэн пиез ӧвӧл, нош кузпалыз пересь ини».15Елисей шуиз: «Сое ӧть татчы». Гиезий сое ӧтиз, кышномурт лыктыса ӧс выжые султӥз.16Елисей солы шуиз: «Ар ортчыса, ӵапак та дыре, тон кияд пи нуныдэ кутыса возёд». Кышномурт шуиз: «Эн, кузёе, Инмарлэн адямиез, ас ляльчидэ эн пӧя».17Собере кышномурт секытэн луиз, вуонояз аре пи нуны вайиз, кызьы вераз Елисей, ӵапак со дыре.
18Пинал будӥз, одӥгаз нуналэ со атаез доры, арасьёс пӧлы, мынӥз но19атаезлы шуиз: «Ой, йыры! Йыры мынам висе». Атаез медоезлы шуиз: «Анаез доры сое ну».20Со пияшез ӝутыса анаез доры вайиз. Нуназеозь анаезлэн алвылаз пукиз но отчы ик кулӥз.21Кышномурт мыныса сое Инмар адямилэн валес вылаз понӥз, ӧссэ ворсаз но, отысь потыса,22картсэ ӧтиз но солы шуиз: «Одӥгзэ медоез, одӥг ишакез мон доры ысты, мон Инмар адями доры ветлыса берто».23Картэз шуиз: «Малы тыныд со доры мыныны кулэ? Туннэ выль толэзь потон нунал, суббота но ӧвӧл». Но кышномурт шуиз: «Ярам».24Ишак вылаз энер понӥз но медоезлы шуиз: «Валтыса мын; вератозям, нокытчы но эн дугдылы».25Кышномурт азьлане вырӟиз но Кармил гурезе, Инмар адями доры, вуиз. Инмар адями кыдёкысен ик сое адӟем бераз Гиезий медоезлы шуиз: «Та Сонамысь кышномурт;26пумитаз бызьыса мын но юа: ”Кыӵе тазалыкед? Картэд уг висьы-а? Нуныды уг висьы-а?”» Кышномурт шуиз: «Ум висиське».27Нош гурезь йылэ, Инмар адями доры вуэм бераз, солэн пыд бордаз ӟыгырскиз. Гиезий лыктӥз сое палэнтон понна, но Инмар адями солы шуиз: «Эн йӧтылы сое, солэн лулыз куректэ, нош Кузё-Инмар мынэсьтым ватӥз, мыным ӧз иворты».28Кышномурт шуиз: «Кузёелэсь пи нуны мон кури-а? Мон тазьы ӧй вералля-а: монэ эн ӧрекча?»
29Инмар адями Гиезийлы шуиз: «Кустэ дум, бодыме кияд кут но мын. Кинэ ке пумитад ке, эн ӟечбуръяськы; кин ке тонэн ӟечбуръяськиз ке, эн вазьылы. Бодыме нунылэн ымныр вылаз пон».30Нунылэн анаез шуиз: «Улэп Кузё-Инмаре, улэп тынад лулыд! Тон дорысь уг кошкы». Елисей султӥз но кышномурт бӧрсьы мынӥз.31Гиезий соослэн азьпалазы мынӥз но бодыез нунылэн ымныр вылаз понӥз. Нокыӵе куара-ланга но, вазиськись но ӧй вал. Солэн пумитаз потыса ивортӥз: «Нуны уг сайка».
32Соку Елисей корка пыриз – кулэм нуны солэн валес вылаз кылле.33Корка пырем бераз ӧссэ тунгоназ но Кузё-Инмар азьын вӧсяськиз.34Султӥз но нунылэн вылӥяз выдӥз, ымзэ нунылэн ым вылаз понӥз, синъёссэ солэн син вылаз, кимышсэ кимыш вылаз понӥз но нунылэн мугор вылаз мыкырскиз, нунылэн мугорыз шунаны кутскиз.35Султӥз но комната кузя азьлань-берлань ветлӥз; собере нош ик нунылэн мугор вылаз мыкырскиз. Соку нуны сизьым пол кизьнӥз, синъёссэ усьтӥз.36Елисей Гиезиез ӧтьыса шуиз: «Сонам кышноез ӧть». Со сое ӧтиз. Кышномурт со доры лыктэм бере Елисей солы шуиз: «Пидэ басьты».37Лыктыса пыд выжыяз уськытскиз, музъем вылозь йыбырттӥз; пизэ кутыса кошкиз.
38Нош Елисей Галгалэ берытскиз. Со музъемын сютэм ар вал; пророк пиос со азьын пукизы. Медоезлы со шуиз: «Бадӟым пурты пукты, пророк пиослы шыд пӧзьты».39Соос пӧлысь одӥгез бусые сиён турын бичаны потӥз, ас эрказ биниськыса будӥсь кыр будосэз шедьтӥз, ал тросаз солэсь кыр емышсэ бичаз; лыктыса пуртыысь шыд пӧлы сое юдӥз, уго соос сое уг тодмало вал.40Соослы сиён ӝутӥзы. Но макем ӝог сиыны кутскизы, соку ик кесяськыса шуизы: «Инмар адями, пуртыын кулон!» Сиыны ӧз быгатэ.41Со шуиз: «Пызь вае». Пуртые пызьзэ кисьтыса, Елисей шуиз [Гиезийлы]: «Адямиослы шыд тыр, мед сиёзы». Пуртые сиыны ярантэмез ӧз ни кыльы.
42Ваал-Шалиша карысь кыӵе ке но адями лыктӥз но Инмар адямилы выль вуэм няньлэсь люкетсэ вайиз – йыдылэсь пыжем кызь уднянь но шорӟымтэ, куасьтымтэ ю. Елисей шуиз: «Адямиослы сётъя, мед сиёзы».43Солэн медоез шуиз: «Марзэ татысь сю муртлы сётом?» Со шуиз: «Адямиослы сётъя, мед сиёзы, уго тазьы шуэ Кузё-Инмар: ”Кӧтсы тыроз, эшшо кылёз на”».44Соослы сётъяз, ваньзылэн кӧтсы тыриз, эшшо кылиз на, кызьы вераз вал Кузё-Инмар.
Глава 4