Выбрать язык
Книги Ветхого Завета
Книги Нового Завета
с русским текстом1Кузё-Инмар Илияез сильтӧл пушкын инме ӝутыны малпан вадесаз Илия Елисеен ӵош Галгалысь азьлане мынӥзы.
2Илия Елисейлы шуиз: «Тон татчы кыль, уго Кузё-Инмар монэ Вефиле ыстэ». Нош Елисей шуиз: «Улэп Кузё-Инмар, улэп тынад лулыд! Мон тонэ огнаддэ уг кельты». Соос ӵошен Вефиле вамыштӥзы.3Вефильысь пророк пиос Елисей доры потыса шуизы: «Тодӥськод-а, Кузё-Инмар туннэ кузёдэ тынад йыр йылад ӝутоз?» Со шуиз: «Мон но тодӥсько, но чус улэ».4Илия солы шуиз: «Елисей, тон татчы кыль, Кузё-Инмар монэ Иерихонэ ыстэ». Елисей шуиз: «Улэп Кузё-Инмар, улэп тынад лулыд! Мон тонэ огнаддэ уг кельты». Соос Иерихонэ вуизы.5Иерихонысь пророк пиос Елисей доры лыктыса шуизы: «Тодӥськод-а, Кузё-Инмар туннэ тынэсьтыд кузёдэ тон дорысь басьтоз но йыр йылад ӝутоз?» Елисей шуиз: «Мон но тодӥсько, но чус улэ».
6Илия солы шуиз: «Тон татчы кыль, монэ Кузё-Инмар Иордан дуре ыстэ». Елисей шуиз: «Улэп Кузё-Инмар, улэп тынад лулыд! Тонэ огнаддэ уг кельты». Кыкназы ик ӵош кошкизы.7Пророк пиос пӧлысь витьтон мурт мынӥзы но кыдёкысен ик соослэн ваче пумитазы султӥзы, нош соос кыкназы но Иордан дурын сылӥзы.8Илия выл дӥсьсэ басьтыса бинялтӥз но соин ву вылэ шуккиз, соку ву мыд-мыд пала вайяськыса кошкиз, соку соос кыкназы ик кӧс азьтӥ тупала выжизы.9Тупала выжем беразы Илия Елисейлы шуиз: «Юа, мар мон тыныд карыны кулэ, тон дорысь мон басьтӥськытозь». Елисей шуиз: «Тон пушкысь дух мон вылын кык полэс мед луоз».10Илия солы шуиз: «Секыт луисьсэ тон куриськод; тон дорысь монэ басьтэмез адӟид ке, соку озьы луоз, нош ӧд ке адӟы, уз луы».
11Сюрес кузя вераськыса мыныкузы, шӧдтэк шорысь тылын ӝуаса улӥсь ожмаськон уробо, тылын ӝуаса улӥсь валъёс адӟиськизы, соку соосты ог-огзылэсь люкизы но Илия сильтӧл пушкын инме ӝутскиз.12Нош Елисей учкыса сылӥз, со черетскыса шуиз: «Эй атае, атае! Израильлэн ожмаськон уробоез, солэн ожмаськон валъёсыз!» Берло-азьло сое ӧз ни адӟы. Аслэсьтыз дӥськутсэ кутӥз но сое шорияк кесиз.13Илиялэн вылысьтыз усьыса кылем выл дӥсьсэ ӝутӥз но берлань кошкиз, Иордан дуре султӥз.14Илиялэн вылысьтыз усьыса кылем выл дӥсьсэ кутӥз но ву вылэ соин шуккыса шуиз: «Кытын Кузё-Инмар, Илиялэн Инмарез, – Самой Со?» Соку со ву вылэ шуккиз но, ву мыд-мыд пала вайяськыса кошкиз, Елисей тупала выжиз.
15Иерихонысь пророк пиос сое кыдёкысен адӟыса шуизы: «Илиялэн духез Елисей вылэ интыяськиз». Елисейлэн пумитаз лыктӥзы но пыдесъяськыса музъем вылозь йыбырттӥзы.16Соос Елисейлы шуизы: «Тани ми пӧлын, тынад ляльчиосыд пӧлын, ог витьтон мурт кужмоесь адямиос; соос мыныса тынэсьтыд кузёдэ мед утчасалзы; оло нош сое Кузё-Инмарлэн Духез нуыса кудаз ке но огаз гурезе куштӥз яке кудаз ке но огаз нёжалэ». Нош Елисей шуиз: «Эн ыстэ».17Нош соос кема дыр ӵоже сое ёртыса возизы, сое акыляк поттӥзы но со шуиз: «Ыстэлэ». Соку соос витьтон муртэ ыстӥзы, соос куинь нунал ӵоже утчазы, нош соос сое ӧз шедьтэ.18Соос Елисей доры берен вуизы, со Иерихонын ик улӥз, соослы шуиз: «Ӧй вера вал-а мон тӥледлы: эн ветлэ?»
19Со городын улӥсьёс Елисейлы шуизы: «Та город умой азе интыяськемын, сое кузёе адӟе; вуэз гинэ умойтэм, музъемез удалтӥсьтэм».20Елисей шуиз: «Вае мыным выль тусьты, отчы сылал понэ». Солы сётӥзы.21Со ву потон доры потӥз но отчы сылал кисьтыса шуиз: «Тазьы шуэ Кузё-Инмар: ”Та вуэз Мон бурмытӥ, со бордысь азьланяз кулон уз ни поты, музъем но емыш сётытэк уз ни кыльы”».22Елисейлэн верам кылызъя та нуналозь но татысь ву дун-чылкыт возиське.
23Отысен со Вефиле мынӥз. Сюрес кузя мыныкуз, городысь пичи пиналъёс потыса, сое исамес карыса шуизы: «Мын, гольык йыр, мын, гольык йыр».24Со берзэ учкиз но соосты адӟиз, Кузё-Инмарлэн нимыныз соосты каргаз. Соку нюлэскысь кык мумы гондыръёс потӥзы но соос пӧлысь ньыльдон кыксэ пиналэз кесязы.25Татысен со Кармил гурезе мынӥз, нош отысен Самарияе берытскиз.
Глава 2