Выбрать язык
Книги Ветхого Завета
Книги Нового Завета
с русским текстом1Давид гурезь йылысь ӧжытак лэзиськем бере тани солэн пумитаз шедиз Мемфивосфейлэн медоез Сӥва, солэн ишакъёсыз вылэ тыремын вал кык сю колды нянь, сю комок изюм, сю комок смоква, сепысэн вина.2Эксэй Сӥвалы шуиз: «Малы тон таосты люкад?» Сӥва шуиз: «Ишакъёс эксэй семьялы ветлон понна, нош нянь но емышъёс егит пиосты сюдыны, нош вина – кыр дуннеын катьтэммемъёсты сектаны».3Эксэй шуиз: «Кытын кузёедлэн пиез?» Эксэйлы ответ сётыса, Сӥва шуиз: «Тани, со Иерусалиме кылиз но шуиз: ”Табере Израиль выжы пересь атаелэсь эксэйлыксэ мыным берыктоз”».4Соку Давид эксэй Сӥвалы шуиз: «Тани, ваньмыз мар вал Мемфивосфейлэн, мон тыныд сётӥсько». Сӥва йыбырттыса шуиз: «Кузёе, эксэе, мыным гажан-жалянзэ мед возьматысал!»
5Давид эксэй Бахурим доры вуэм бере, тани, отысь потӥз Саул выжыысь адями, Гералэн Семей нимо пиез; со лек кылъёс вераса вамышъяз,6Давид вылэ, Давид эксэйлэн вань медоосыз вылэ изъёс зӥръяз; вань адямиос, вань кышкасьтэмъёс [эксэйлэн] бурпалаз но, паллян палаз но сылӥзы.7Лек кылъёс вераса, Семей тазьы шуиз: «Кошкы, кошкы, адями виись, законлы пумит улӥсь!8Саул интые тон эксэе пуксид, со понна Кузё-Инмар Саул выжылэсь кисьтэм вань вирзэ тон вылэ лэзе; Кузё-Инмар эксэйлыкез Авессалом пиедлэн киулаз сётӥз; табере тон шуге-леке сюрид, уго тон – вир юись».9Саруялэн Авесса пиез эксэйлы шуиз: «Малы чоньдэм айы пуны лек кылъёсын куаретэ кузёме, эксэез? Мыно, йырзэ ӵогыса кушто».10Соку эксэй шуиз: «Саруялэн пиосыз, тӥляд мон бордын мар ужды? [Эн йӧтылэ сое.] Мед ойдо куаретоз, Давидэз лек кылъёсын куаретыны солы Кузё-Инмар эрик сётӥз. Кин бен тазьы шуыны быгатоз: ”Малы тон тазьы лэсьтӥськод?”»11Авессалы но, вань медоосызлы но Давид шуиз: «Тани, мынам макес вискысьтым потэм пие мынэсьтым лулме быдтыны утча ке, соку Вениамин выжыысь потэм пи уката но золгес утчаны кулэ; эн йӧтылэ со борды, лек кылъёсын мед тышкаськоз, уго солы Кузё-Инмар тазьы лэсьтыны косӥз.12Оло нош сантэман улэ кылемме Кузё-Инмар адӟоз но туннэ нуналэ лек кылын куаретэмез понна Кузё-Инмар мыным ӟечлык сётоз».13Давид но, солэн вань адямиосыз но асьсэ сюрессы кузя мынӥзы, нош Семей гурезь дуртӥ, палэнтӥ мынӥз, лек кылъёс вераса мынӥз, со пала изэн зӥръяз, тузонэн пазяз.14Эксэй но, соин ӵош мынӥсь калык но жадьыса вуизы, отын шутэтскизы.
15Нош Авессалом, вань израиль калык Иерусалиме лыктӥзы, соос пӧлын ик Ахитофел но вал.16Давидлэн эшез Архи выжыысь Хусий, Авессалом доры вуэм бераз, Авессаломлы шуиз: «Мед улоз эксэй, мед улоз эксэй!»17Авессалом Хусийлы шуиз: «Эшед понна сыӵе тыршонэд! Малы нош тон эшеныд ӵош ӧд мыны?»18Соку Хусий Авессаломлы шуиз: «Уг, [мон мыно со бӧрсьы], кинэ Кузё-Инмар но, та калык но, быдэс Израиль но бырйизы, со муртэн ик мон ӵош луо, соин огазе кылё.19Кинлы соку ужалом-тыршом? Солэн пиезлы ӧвӧл-а? Кызьы тынад атаедлы ужай-тырши, табере тыныд но озьы ик ужало-тыршо».20Соку Авессалом Ахитофеллы шуиз: «Мар милемлы кароно, сётэ визь-кенеш».21Ахитофел Авессаломлы шуиз: «Юртсэ возьманы кельтэм атаедлэн ляльчи кышноосыз доры пыр; вань израиль калык кылоз, тон атаедлэн адӟемпотостэм муртэз луид шуыса, соку бордысьтыд вань адямиослэн киоссы юнмалозы».22Липет йылэ Авессаломлы тылыс пуктӥзы, вань израиль калыклэн син азяз Авессалом атаезлэн ляльчи кышноосыз доры пыриз.23Нош со виын Ахитофеллэн сётъям визь-кенешъёсыз Инмарлэсь визь-кенеш юам ӵотын вал. Давид понна но, Авессалом понна но сыӵеесь вал Ахитофеллэн вань визь-кенешъёсыз.
Глава 16