Выбрать язык
Книги Ветхого Завета
Книги Нового Завета
с русским текстом1Давид шуиз: «Сауллэн семьяысьтыз кин ке кылиз на-а? Ионафан понна мон солы ӟеч уж лэсьтысал».2Сауллэн юртаз Сӥва нимо ляльчи улӥз; сое Давид доры ӧтизы но эксэй солы шуиз: «Тон-а со Сӥва?» Соиз шуиз: «Мон, тынад ляльчиед».3Эксэй солы шуиз: «Сауллэн юртысьтыз мукет нокин но ӧвӧл ни-а? Мон солы Инмарлэсь гажан-жалянзэ возьматысал». Соку Сӥва эксэйлы шуиз: «Вань Ионафанлэн пиез, чут маке».4Эксэй солы шуиз: «Кытын со?» Сӥва эксэйлы шуиз: «Тани, со Лодеварын, Аммииллэн Махир пиезлэн юртаз».5Давид эксэй адямиоссэ ыстӥз но, сое Лодеварысь Аммииллэн Махир пиезлэн юртысьтыз басьтӥзы.
6Соку Мемфивосфей, Сауллэн Ионафан пиезлэн пиез, Давид доры лыктӥз но ымныр вылаз уськытскиз, [эксэйлы] йыбырттӥз. Давид шуиз: «Мемфивосфей!» Соиз шуиз: «Тани тынад ляльчиед».7Давид солы шуиз: «Эн кышка; атаед, Ионафан, понна мон тыныд ӟеч уж лэсьто; Саул пересь атаедлэсь вань бусыоссэс тыныд берыкто, тон котьку но мынам ӝӧк сьӧрам сиськод».8[Мемфивосфей] солы йыбырттыса шуиз: «Малы тыныд мон кадь ляльчи кулэ, малы мон кадь кулэм айы пуны шоры тон учкид?»9Сауллэсь Сӥва ляльчизэ ӧтьыса эксэй шуиз: «Мар вал Саул киын, солэн семьяосыз киын, ваньзэ сое кузёедлэн пиезлы сётӥсько.10Озьыен, тон но, тынад пиосыд но, ляльчиосыд но со понна солэсь бусызэ утялтэ, емышсэ будэтэ, кузёедлэн пиезлэн кӧтсэ тырыны нянез мед луоз. Мемфивосфей, кузёедлэн пиез, котьку но мынам ӝӧк сьӧрам сиськоз». Сӥвалэн дас вить пиез но кызь ляльчиез вал.11Сӥва эксэйлы шуиз: «Кузёе ас ляльчиезлы кыӵе гинэ косон уг сёты, ляльчиед ваньзэ быдэстоз». Эксэйлэн огез пиез кадь Мемфивосфей [Давидлэн] ӝӧк сьӧраз сиськыса улӥз.
12Мемфивосфейлэн Миха нимо пичи пиез вал. Сӥвалэн юртаз вань улӥсьёс Мемфивосфейлэн ляльчиосыз вал.13Мемфивосфей Иерусалимын улӥз, уго со котьку но эксэй ӝӧк сьӧрын сиськыса улӥз. Солэн кыкез но пыдыз чутэ вал.
Глава 9