Выбрать язык
Книги Ветхого Завета
Книги Нового Завета
с русским текстом1Саул кулэм бере Давид, амалик калыкез вормыса бертэм бераз, Секелагын кык нунал улӥз.2Тани, куинетӥ нуналаз Сауллэн ожгарчиосыз пӧлысь одӥгез лыктэ; солэн дӥськутэз кесяськемын, йыр вылаз сюй пызьнамын. Давид доры лыктыса, музъем вылэ уськытскыса йыбырттӥз.3Давид солы шуиз: «Кытысь тон вуид?» Со мурт шуиз: «Мон израиль ожгарчиос пӧлысь пегӟи».4Давид солы шуиз: «Мар луиз? Вера мыным». Со пи шуиз: «Ож бусыысь калык пегӟиз, туж трос калык погыртэмын, виемын, Саул но, солэн Ионафан пиез но кулӥзы».
5Тае верась егит пилы Давид шуиз: «Кызьы тон тодӥськод, Саул но солэн Ионафан пиез кулэмын шуыса?»6Солы верась егит пи шуиз: «Озьы гинэ мон Гелвуй гурезе лыктӥ, но тани, Саул аслаз шибоды вылаз усиз, ожмаськон уробоос, вал вылын ожгарчиос со доры вуо вал ини.7Соку со берлане учкиз но, монэ адӟыса, дораз ӧтиз.8Мон шуи: ”Тани мон”. Со мыным шуиз: ”Кин тон?” Мон шуи: ”Мон – амалик пи”.9Соку со мыным шуиз: ”Лыкты матам, ви монэ, кулон монэ кекатэ ни, нош лулы ялан бордам на”.10Мон, со доры лыктыса, сое вии, уго мон тодӥ ни: усем бераз со улэп уз кыльы ни; йырысьтыз эксэй изьызэ басьтӥ, киысьтыз поскессэ кутӥ но татчы кузёелы вайи».
11Соку Давид дӥськутсэ кутӥз но сое ӵажак кесиз, соин ӵош ветлӥсь калык но [дӥськутсэс кесизы].12Викышъязы, бӧрдӥзы Саул понна, Ионафан пиез понна, Кузё-Инмарлэн калыкез понна, Израиль юрт понна но ӝытозь визязы, соос меч улэ погразы шуыса.
13Тае верась егит пилы Давид шуиз: «Кытысь тон?» Со пи шуиз: «Мон – Амалик музъемысь лыктэм муртлэн пиез».14Соку Давид солы шуиз: «Кызьы тон ӧд кышка Кузё-Инмарлэсь вӧйын зырӟыса пуктэмез вылэ кидэ ӝутыны но сое виыны?»15Давид одӥгзэ егит пиез ӧтьытӥз но солы шуиз: «Лыкты татчы, ви тае». Вииз, со кулӥз.16Давид солы шуиз вал: «Аслад вирыд йыр вылад луоз, уго аслад кылыд-ымыд тонэ янгыше уськытэ тазьы шуыкуд: ”Кузё-Инмарлэсь вӧйын зырӟемзэ мон вии”».
17Кырӟаса-бӧрдыса Давид Саулэз но солэсь Ионафан пизэ буре вайиз.18Давид косон сётӥз иудей пиосты пукыӵен ыбылӥськонлы дышетыны, кызьы Шонер улӥсьлэн книгаяз гожтэмын.
19Давид шуиз:
«Э, Израиль, тынад чеберлыкед гурезь йылъёсад уськытэмын!
Кызьы кужмоос погразы!
20Гефын эн вералэ, Аскалонлэн ульчаосаз эн ивортылэ –
филистим нылъёс медаз шумпотэ,
вандӥськымтэослэн нылъёссы шулдыръяськоно медаз луэ.
21Гелвуй гурезьёс! Тӥ вылэ лысву но, зор но медаз усе,
тӥ вылын юо-емышо бусыос медаз луэ,
уго отын кужмоослэн щитсы сэрпалтэмын вал –
Сауллэн щитэз вӧйын зырӟемын но ӧй вал кадь.
22Яраё каремъёслэн вирзытэк, кужмоослэн кӧйзытэк
Ионафанлэн пукыӵез берен ӧз берыктӥськылы,
Сауллэн но мечез огшоры гинэ уг берыктӥськылы вал.
23Саул но Ионафан – яратымонэсь, куспазы тупаса улэм муртъёс,
кулыкузы но ог-огзылэсь ӧз люкиське;
ӧрӟиослэсь шаплыесьгес, левъёслэсь но кужмоесьгес вал соос.
24Израиль нылъёс! Саул понна бӧрдэ,
со тӥледыз горд дарали дӥськутэн, чеберъянъёсын дӥсялляз,
дӥсянъёсты вылэ зарнилэсь лэсьтэм чеберъянъёс вайылӥз.
25Кызьы усизы ожын кужмоос! Гурезь йылъёсад
Ионафан погыртэмын.
26Ионафан братэ, тон понна кыӵе куректӥсько;
тон мыным туж дуно мурт вал;
тынад яратонэд кышномуртлэн яратонэзлэсь но вылӥынгес вал.
27Кужмоос погразы, ожмаськон тӥрлыксы но быриз!»
Глава 1