Выбрать язык
Книги Ветхого Завета
Книги Нового Завета
с русским текстом1Со виын филистим пиос Израилен ожмаськыны войско люказы. Анхус Давидлы шуиз: «Тод, монэн ӵош тон но аслад адямиосыныд ожмаськонэ мынод».2Давид Анхуслы шуиз: «Туннэ тон тодод, тынад ляльчиед мар лэсьтоз». Анхус Давидлы шуиз: «Со понна мон тонэ пырак ӵожелы йырме утись каро».
3Самуил кулэм бере быдэс израиль калык сое жаляса бӧрдӥз, сое ас городаз, Рамае, ватӥзы. Нош Саул пӧртмаськон уж лэсьтӥсьёсты, туно-пеллёосты кунысьтыз улляз.
4Филистим ожгарчиос огазе Сонаме люкаськизы; Саул вань израиль калыкез люказ, соос Гелвуе интыяськизы.5Саул филистим ожгарчиосты адӟыса кышкатскиз, сюлмыз солэн туж куалектӥз.6Саул Кузё-Инмарлэсь тэльмырыса куриз, нош Кузё-Инмар солы уйвӧт пыр но, урим пыр но, пророкъёс пыр но ответ ӧз сёты.7Соку Саул медоосызлы шуиз: «Шедьтэ мыным пӧртмаськон ужъёс лэсьтӥсь кышномуртэз, со доры мыныса, мон солэсь юало». Медоосыз солы шуизы: «Татын Аэндорын пӧртмаськон ужъёс лэсьтӥсь кышномурт вань».
8Саул вылысьтыз дӥськутсэ кылиз, мукетсэ дӥсяз, асэныз ӵош кык мурт мынӥзы, кышномурт доры уйин вуизы. Саул шуиз: «Курисько тонэ: туна, потты сое, кинэ мон тыныд верало».9Но кышномурт солы ответ сётӥз: «Тон тодӥськод, кызьы Саул кунысь пӧртмаськон ужъёс лэсьтӥсьёсты, туно-пеллёосты улляса лэзиз; малы тон мыным лулме быдтонлы сьӧлтэт пуктӥськод?»10Саул Кузё-Инмарлэн нимыныз кыл сётыса шуиз: «Улэп Кузё-Инмар! Та уж понна тон шугадӟон чидано уд луы».11Соку кышномурт юаз: «Кинэ бен тыныд поттоно?» Саул шуиз: «Самуилэз мыным потты».12Кышномурт Самуилэз адӟиз но бадӟымен черектӥськиз; кышномурт Саул пала берыктӥськыса шуиз: «Малы тон монэ пӧяд, тон – Саул ук».13Эксэй солы шуиз: «Эн кышка; [вера], мар тон адӟиськод?» Кышномурт ответ сётыса шуиз: «Музъемысь потӥсь инмарлы укшась макеез адӟисько».14«Кыӵе солэн тусбуез?» – Саул солэсь юаз. Кышномурт шуиз: «Музъемысь туж пересь мурт потэ, кузь дӥськутэн дӥсяськемын». Соку Саул тодӥз, со Самуил шуыса, но ымнырыныз музъем вылэ выдӥз, йыбырттӥз.
15Самуил Сауллы шуиз: «Мед потом шуыса, малы тон монэ сюлэмшугъяськытӥськод?» Саул ответ сётӥз: «Мыным туж секыт. Филистим калык мыным пумит ожмаське, нош Инмар мон дорысь палэнскиз, пророкъёс пыр но, уйвӧтын но, [адӟонъёс пыр но] мыным ответ уг сёты; соин ик мон тонэ ӧти, валэкты мыным, мар карыны мон кулэ».16Самуил солы шуиз: «Малы тон мынэсьтым юаськод, Кузё-Инмар тон дорысь палэнскиз но тыныд тушмон луиз бере?17Кузё-Инмар мар мон пыр вераз, сое ик лэсьтоз: Кузё-Инмар тынад киулысьтыд эксэйлыкез талалоз но тынад матысь муртэдлы, Давидлы, сётоз.18Кузё-Инмарлэсь верамзэ ӧд кылзы бере, Солэсь Амалик вылэ вожпотонзэ ӧд быдэсты бере, соин ик али Кузё-Инмар тыныд тае лэсьтэ.19Тонэн ӵош израиль калыкез Кузё-Инмар филистим калыклэн киулаз сётоз: ӵуказе тон, пиосыд но, монэн ӵош луоды, израиль ожгарчиосты Кузё-Инмар филистим ожгарчиос киулэ сётоз».
20Соку малпамтэ шорысь Саул быдэс мугорыныз музъем вылэ выдӥз, уго Самуиллэн кылъёсызлэсь со укыр кышказ; эшшо ке, кужымез но быриз, уго со быдэс нунал, быдэс уй но ӧз сиськы.21Со кышномурт Саул доры лыктыса адӟиз: пиосмурт туж кышкатскемын. Собере со шуиз: «Тани, ляльчи кышномуртэд тынэсьтыд верамдэ кылзӥз но, тынэсьтыд косондэ быдэстыса, аслэсьтыз улонзэ кышкытлыке вуттӥз.22Табере курисько: тон но ляльчи кышномуртэдлэсь верамзэ кылзы: мон тыныд шорем нянь сёто, си, сюрес вылэ потон азяд со тонэ юнматоз».23Нош со пумит луиз, шуиз: «Уг сиы». Медоосыз либатыны выризы, со кышномурт но; со верамзэс санэ понӥз но, музъем вылысь султыса, валесаз пуксиз.24Со кышномуртлэн гуртаз куайытэм кунянэз вал, сое вандыны дыртӥз, пызь басьтыса сое котӥз но чырсатытэк юмал нянь пыжиз.25Сауллы но солэн медоосызлы ӵектӥз; соос сиизы но со уе ик султыса кошкизы.
Глава 28