Выбрать язык
Книги Ветхого Завета
Книги Нового Завета
с русским текстом1Одӥгаз нуналэ Сауллэн пиез Ионафан ожмаськон арберизэ нуллӥсь медоезлы шуиз: «Лык, тупалан сылӥсь филистим ожгарчиос доры потом». Нош атаезлы та сярысь ӧз вера.2Нош Саул соку Гива карлэн пумаз, Мигронын, гранат писпу улын сылӥз; соин ӵош ог куать сю мурт вал.3Соос пӧлын ефод нуллӥсь Ахия но вал, со Кузё-Инмарлэн Сӥломысь священникезлэн Илийлэн Финеес пиезлэн Иохаведлэн Ахитув братэзлэн пиез вал. Нош калык ӧз тоды Ионафанлэсь отчы мынэмзэ.
4Выжонъёс вискын, кытӥ Ионафан филистим ожгарчиос доры потон утчаз, огпалтӥз йылсо изгурезь вал, мукет палтӥз но йылсо изгурезь вал: огезлэн нимыз Боцец, мукетызлэн – Сене.5Одӥгез изгурезь уйпаласен Михмас пала мычиськыса улӥз, мукетыз – лымшор палась Гива пала.6Ионафан ожмаськон арберизэ нуллӥсь медоезлы шуиз: «Ойдо, вандӥськымтэослэн отрядзы доры выжом; оло нош Кузё-Инмар асьмелы юрттоз, уго тросэз пыр но, ӧжытэз пыр но Кузё-Инмарлы калыкез секыт ӧвӧл утьыны».7Ожмаськон арберизэ нуллӥсь шуиз: «Мар сюлмыдлы кельше, сое ик лэсьты; мын, мон тонэн ӵош, мын, кытчы тыныд кулэ».8Ионафан шуиз: «Тани, асьмеос со адямиос доры потомы, соослы адӟиськон интые султомы.9Соос асьмелы тазьы шуизы ке: ”Ми тӥ доры вуытозьлы, дугдэ”, соку асьмеос со интыямы дугдомы, соос доры ум тубе.10Нош тазьы шуизы ке: ”Ми доры тубе”, соку асьмеос соос доры тубомы, уго Кузё-Инмар соосты асьме киулэ сётӥз; та асьмелы тодмет луоз».
11Филистим ожгарчиослы адӟиськон интые вуэм беразы филистим пиос шуизы: «Тӥни, ватӥськем интыосысьтызы, гурезь висъёсысь, еврейёс пото».12Ионафанлы но, солэн ожмаськон арбери нуллӥсезлы но филистим отрядысь адямиос черекъяны кутскизы: «Ми доры тубе, ми тӥледлы маке но вераломы». Соку Ионафан ожмаськон арбери нуллӥсезлы шуиз: «Мон бӧрсьы мын, уго Кузё-Инмар соосты Израильлэн киулаз сётӥз».13Киыныз, пыдыныз ӵабъяськыса, Ионафан вылӥе ӝутскыны кутскиз, со бӧрсьы ик ожмаськон арбери нуллӥсез но. Ионафан азе филистим ожгарчиос усьылӥзы, нош ожмаськон арбери нуллӥсь соосты виылӥз.
14Ионафан но солэн ожмаськон арбери нуллӥсез, ожмаськыны кутскыкузы ик, ог кызь муртэ погыртӥзы – бусылэн ӝыны люкетаз, кык ошен нунал ӵоже гырымон интые.15Туж шимес кышканы кутскиз бусыын сылӥсь филистим отряд, вань калык куалектӥз. Азьпалаз мынӥсь, музъемез тырттэм кельтӥсь отряд но кышканы-куалекъяны кутскиз, [ожмаськемзы ӧз ни поты]; быдэс музъем зурказ, Кузё-Инмар дорысь туж шимес кышкан вуиз.
16Вениамин музъемысь Гива карын сылӥсь Сауллэн возьмаськисьёсыз адӟизы, кызьы калык пазьгиське, отчы-татчы бызьыса кошке.17Асэныз ӵош сылӥсь калыклы Саул шуиз: «Эскере, тодэ: кин асьме пӧлысь потӥз». Ваньзэ учкизы-эскеризы но тодӥзы: пӧлазы Ионафан но солэн ожмаськон арбери нуллӥсез ӧвӧл.18Саул Ахиялы шуиз: «Инмарлэсь кивотсэ вай», уго Инмарлэн кивотэз со виын израиль пиос киын вал.19Саул священниклы эшшо вераз на, нош филистим ожгарчиос пӧлын бугыръяськон эшшо но эшшо золгес вӧлмыны кутскиз. Соку Саул священниклы шуиз: «Дугды, эн куты».
20Соку Саул калыкен ӵош кесяськыса мынӥзы но ожмаськон интые вуизы. Отын ваньмызлэн мечез артэ сылӥсь муртэзлы пумит урдскемын вал. Туж зол бугыръяськон ӝутскемын вал.21Соку толон но, тӥзьнал но филистим калык пӧлын, соос бӧрсьы отӥ но, татӥ но ветлӥсь еврейёс израиль пиос пала кариськизы, Саулэн Ионафанэн ӵош ветлӥсь калык пала кариськизы.22Филистим ожгарчиос пегӟо шуыса, Ефрем гурезьын ватӥськыса улӥсь израиль калык кылӥз но соос ваньзы ожмаськись калыксы пала кариськизы.23Кузё-Инмар со нуналэ Израилез утиз; ожмаськон Беф-Авенозь вуиз. [Саулэн ӵош ог дас сюрс мурт вал, Ефрем гурезьысь городын быдэсказ ожмаськон мынӥз.]
24Израиль калык со нуналэ катьтэммемын вал; нош Саул [чик малпаськытэк] калыкез кыл сётытӥз: «Ӝытозь, тушмонъёсылы пунэм берыктытозям, кин ке нянь шӧмъяз ке, каргамын луоз». Калык пӧлысь нокин но ымаз сиён ӧз поны.25Вань калык нюлэскы мынӥз, нюлэс кушын чечы вал.26Калык тазьы шуыса нюлэскы пыриз: «Тани, чечы бызе». Но нокин но кизэ ым дораз ӧз вутты, малы ке шуоно калык сётэм кылзэ быдэстытэк кельтонлэсь кышказ.27Нош Ионафан атаезлэсь калыкез кыл сётытэмзэ ӧз кылы; киысьтыз боды йылзэ чечыен карасэ донгиз но ым дораз вайиз, синъёсыз югектӥзы.28Калык пӧлысь одӥгез солы тазьы шуиз: «Атаед тазьы вераса калыкез кыл сётытӥз: ”Кин ке туннэ сиён веръяз ке, каргамын луоз”; тазьы улыса, калык катьтэммиз».29Соку Ионафан шуиз: «Атае музъемлы ӟеч ӧз лэсьты; учкелэ ук – мынам синъёсы югектӥзы та чечыез ӧжытак оскалтэм берам.30Тушмонъёсызлэсь кылем сиён-юонзэс калык туннэ шедьтыса сиысал ке, филистим ожгарчиослэн ыштонзы бадӟымгес ӧй луысал-а?»
31Со нуналэ филистим ожгарчиосты Михмасысен кутскыса Аиалонозь виыса уськытъязы, соин ик калык туж катьтэммиз.32Соку калык талам ваньбур борды урдӥськиз: ыжъёсты, ошъёсты, кунянъёсты кутылыса музъем вылын вандылӥзы, вирен сӥлез калык сииз.33Сауллы таӵе ивор вуттӥзы: «Тани, калык Кузё-Инмар азьын сьӧлыка, вирен сӥль сие». Саул шуиз: «Тӥ сьӧлыкады. Мон доры бадӟым из бекмылляса вае».34Собере Саул шуиз: «Калык вискытӥ ортче но солы шуэ: ”Котькудӥз мед ваёз аслэсьтыз ошсэ, аслэсьтыз ыжзэ, татын вандэ но сие, Кузё-Инмар азьын эн сьӧлыкалэ, вирыныз сӥлез эн сие”». Калык пӧлысь котькудӥз ас киыныз уйин валтыса вайиз ошсэ, [ыжзэ], отын соосты вандылӥзы.35Кузё-Инмарлы Саул курбон сётон инты лэсьтӥз; со вал Кузё-Инмарлы нырысетӥ курбон сётон инты, кудзэ со лэсьтӥз.
36Саул шуиз: «Ваелэ уйин филистим ожгарчиос сьӧры уйиськыса мыноме, куазь сактытозь соосты номыртэк кельтомы, соослэсь одӥг адямизэс но улэп ум кельтэ». Солы шуизы: «Мар тыныд ярамон, ваньзэ лэсьты». Нош священник шуиз: «Татын Инмар доры кариськоме».37Саул Инмарлэсь юаз: «Филистим ожгарчиос сьӧры мыным уйиськыса мыноно-а, ӧвӧл-а? Израильлэн киулаз соосты сётод-а?» Но со нуналэ Кузё-Инмар ӧз вазьылы.
38Соку Саул шуиз: «Калыклэн вань кузёйыръёсыз татчы мед лыктозы но мед эскерозы-чаклалозы, тодозы, кин вылын туннэ сьӧлык?39Уго улэп Кузё-Инмар, Израилез утись, – Ионафан пие вылын ке но луиз, со но одно ик виемын луоз». Вань калык пӧлысь солы нокин ӧз вазиськы.
40Вань израиль калыклы Саул шуиз: «Ваньды тӥ огпалаз султэ, нош мон Ионафан пиеным мукет палаз султомы». Калык Сауллы ответ сётыса шуиз: «Лэсьты, мар тыныд ярамон».41Саул шуиз: «Кузё-Инмаре, Израильлэн Инмарез! [Малы Тон туннэ ляльчиедлы уд вазиськиськы? Мынам-а янгыше вань яке Ионафан пиелэн-а? Кузё-Инмаре, Израильлэн Инмарез!] сёт тодмет. [Израиль калыкед бордын ке янгыш, дун-шектэм кар сое]». Ионафанэн Сауллэн янгышъёссы шарае поттэмын вал, нош калык шонере потӥз.42Соку Саул шуиз: «Мон куспын, Ионафан пие куспын пус чӧлтэ, [кинэ Кузё-Инмар ялӥз ке, со ик мед кулоз». Калык Сауллы шуиз: «Озьы медаз луы!» Но Саул ас нырзэ кариз. Со куспын но Ионафан пиез куспын пус чӧлтӥзы], пус Ионафан вылэ усиз.
43Саул Ионафанлы шуиз: «Вера, мар тон лэсьтӥд?» Ионафан солы тазьы вераз: «Ас киысьтым боды йылын пичи гинэ чечы веръяй, тани, табере мон кулыны кулэ».44Соку Саул шуиз: «Инмар мыным сое но сое мед лэсьтоз, эшшо но тросгес мед лэсьтоз; тон, Ионафан, туннэ кулыны кулэ!»45Но калык Сауллы шуиз: «Израильлы сыӵе бадӟым утиськон ваем Ионафан-а кулыны кулэ? Озьы медаз луы! Улэп Кузё-Инмар, солэн йырысьтыз йырсиез но музъем вылэ уз усьы, уго солы туннэ Инмар юрттӥз». Калык Ионафанэз мозмытӥз, со ӧз кулы.46Филистим калык сьӧрын уйиськонысь Саул берытскиз; филистим калык ас интыяз кошкиз.
47Израилен кивалтонзэ Саул кужмоятӥз, котырысьтыз вань тушмон калыкъёсын ожмаськыса улӥз: Моавен но аммон калыкен, Едомен, [Вефорен но], Соваысь эксэйёсын но, филистим калыкен но, кинлы гинэ пумит ӧз мыны, азинлыкез вал.48Армия кылдытӥз, Амаликез погыртӥз, Израилез таласа возисьёс киулысь мозмытӥз.
49Сауллэн таӵе пиосыз вал: Ионафан, Иессуи, Мелхисуа; нош кык нылъёсызлэн таӵе нимъёссы: бадӟымезлэн – Мерова, покчиезлэн – Мелхола.50Сауллэн кышноезлэн нимыз – Ахиноам, со Ахимаацлэн нылыз вал; ожгарчиосын кивалтӥсезлэн нимыз – Авенир, со вал Сауллэн агаезлэн Нирлэн пиез.51Сауллэн атаез Кис но Авенирлэн атаез Нир Авииллэн пиосыз вал.
52Саул вакытэ филистим калыклы пумит ялан кужмо ожмаськон мынӥз. Кужмо, ожмаськыны быгатӥсь муртэ адӟе ке, сое Саул ас бордаз басьтэ вал.
Глава 14