Выбрать язык
Книги Ветхого Завета
Книги Нового Завета
с русским текстом1Кириаф-Иаримын улӥсьёс лыктӥзы но Кузё-Инмарлэсь ковчегзэ басьтӥзы, сое вырйылысь Аминадавлэн юртаз вайизы, нош солэсь Елеазар пизэ Кузё-Инмарлэсь ковчегзэ утисе пуктӥзы.2Ковчегез Кириаф-Иариме интыям бере трос дыр ортчиз, ог кызь аръёс. Вань израиль калык Кузё-Инмар пала берытскиз.
3Вань израиль калыклы Самуил таӵе кылъёс вераз: «Вань сюлмыныды Кузё-Инмар пала берытскиськоды ке, соку асьтэ пӧлысь мурт калыкъёслэсь инмаръёссэс, астартаосты палэнтэ, сюлэмдэс Кузё-Инмарлы усьтэ, одӥг Солы гинэ ужаса-тыршыса улэ, соку Со тӥледыз филистим калыклэн киулысьтыз мозмытоз».4Соку израиль пиос асьсэ пӧлысь ваалъёсты, астартаосты палэнтӥзы но одӥг Кузё-Инмарлы ужаса-тыршыса улыны кутскизы.5Самуил шуиз: «Вань израиль калыкез Массифае люкалэ, соку мон тӥ понна Кузё-Инмарлы вӧсясько».6Массифае люкаськизы, ву омыръязы, Кузё-Инмар азе киськазы, со нуналэ визяса улӥзы но тазьы шуизы: «Кузё-Инмар азьын ми сьӧлыкамы». Самуил израиль пиослэсь ужъёссэс Массифаын тупатъяз-радъяз.
7Филистим калык израиль пиос Массифае люкаськиллям шуыса кылэм бераз филистим калыклэн кивалтӥсьёсыз Израиль вылэ урдскизы. Та сярысь кылэмзы бере израиль пиос филистим калыклэсь кышкатскизы.8Израиль пиос Самуиллы шуизы: «Инмармылы Кузё-Инмарлы ми понна вӧсяськемысь эн дугды, Со милемыз мед утёз филистим калыклэн киулаз сюронлэсь». [Соку Самуил шуиз: «Инмарелэсь Кузё-Инмарлэсь ноку но медам палэнскы, тӥ понна вӧсяськытэк ноку но медам улы!»]9Соку Самуил нонӥсь ыжпиез кутӥз но [вань калыкен ӵош] Кузё-Инмарлы тылын сутӥськись курбон сётӥз; Израиль понна Самуил вӧсяськыса Кузё-Инмарлэсь куриз но, Кузё-Инмар солэсь куриськемзэ кабыл басьтӥз.10Тылын сутӥськись курбонзэ Самуил сётыку, филистим калык Израилен ожмаськыны лыктӥз. Но со нуналэ филистим калыклэн йыр йылаз Кузё-Инмар кужмо гудыртӥз но соосты туж кышкатӥз, Израиль азьын соос погыртэмын вал.11Израиль пиос, Массифаысь потыса, филистим калык бӧрсьы уйиськыса мынӥзы, соосты погыртӥзы, Вефхорлэн матаз вуизы.
12Самуил одӥг изэз кияз кутӥз но Массифаен Сен вискы пуктӥз, сое Авен-Езер*а шуыса нимаз. Со шуиз: «Та дорозь Кузё-Инмар асьмелы юрттӥз».13Тазьы филистим калык чусомытэмын вал, та бере Израиль улос вылэ ӧз ни чуртнаськылэ; Самуил улон нуналъёсы Кузё-Инмарлэн киыз филистим калыкез зӥбыса возиз.14Аккаронысен Гефозь филистим калыклэн Израильлэсь талам городъёсыз Израильлы берыктэмын вал, филистим калыклэн киулысьтыз та улосъёсты Израиль мозмытӥз. Израиль калык аморрейёсын тупаса улӥз.
15Вань улытозяз Самуил Израильлэн судьяез вал:16Арысь аре Вефиль пыр, Галгал пыр, Массифа пыр со ветлылӥз но вань интыосын израиль калыклэсь улон-вылонзэ тупатъяз-радъяз.17Собере со Рама каре берытскылӥз, уго отын солэн дорез вал. Отысен но со израиль калыкез нодъяз, отчы Кузё-Инмарлы курбон сётон инты пуктӥз.
*а 7:12 Авен-Езер – «юрттонлэн изэз» шуэм луэ
Глава 7