Выбрать язык
Книги Ветхого Завета
Книги Нового Завета
с русским текстом1Вань израиль пиос султӥзы – огкылысь, одӥг адями кадь, Дан музъемысен Вирсавияозь, Галаад музъемысь но потэмъёс огазе, Массифа каре, Кузё-Инмар азе люкаськизы.2[Кузё-Инмар азе] люкаськизы быдэс калыклэн кивалтӥсьёсыз, вань Израиль выжыос, Инмар калыклэн кенешаз люкаськизы, ньыль сю сюрс мурт пыдын ожмаськисьёс мечъёссэс кутӥзы.
3Вениамин пиос кылӥзы, израиль пиос Массифае лыктӥллям шуыса. Израиль пиос шуизы: «Вералэ, кызьы ортчиз та лек уж?»4Вием кышномуртлэн картэз, левит, ответ сётыса шуиз: «Ляльчи кышноеным мон Вениаминлэн Гива караз уйме ортчытыны пыри,5соку мон вылэ Гиваын улӥсьёс урдӥськизы, мыным луыса юртэз уйин котыртӥзы; малпало вал монэ виыны, ляльчи кышноме курадӟытӥзы, [мыскыллязы], ӧз чида, кулӥз.6Ляльчи кышноме мон люкетэн-люкетэн вандылӥ но вань Израиль выжыос доры лэзи, уго со муртъёс Израильын юрӟым, кырсь уж лэсьтӥзы.7Тани, тӥ ваньды, израиль пиос, учке-эскере та ужез но вералэ, мар кароно».
8Быдэс калык, ваньзы одӥгтэм ӝутскизы но шуизы: «Огмы но улон интыямы ум берытске, гуртамы ум мынэ.9Тани, табере мар каромы Гивалы: жеребе кутыса, со вылэ [мыномы];10вань Израиль выжыослэсь сю мурт пӧлысь дассэ, сюрс мурт пӧлысь сюзэ, дас сюрс мурт пӧлысь сюрс муртсэс бырйыса басьтомы; калыкез сюдыны сиён-юон мед ваёзы, соос мынозы Вениамин выжылэн Гива городэзлы пумит, Израильын юрӟым-кырсь ужъёс лэсьтэмзы понна соосты вӧсь карыны».
11Вань израиль калык огкылысь, одӥг адями кадь, Гива городлы пумит мыныны люкаськизы.12Израиль выжыос быдэс Вениамин выжылы вераны адямиоссэс ыстӥзы: «Кыӵе юрӟым-кырсь уж тӥ дорын лэсьтэмын!13Гиваын улӥсь юрӟым-кырсь ужъёсын ашкынэм адямиостэс ми кие сётэ, ми соосты виёмы, таӵе юрӟым ужез Израильысь выжытэм быдтомы». Нош Вениамин пиос агай-вынъёссылэсь, израиль пиослэсь верамзэс кылэм-адӟем ӧз каре.14Пӧртэм городъёсын улӥсь Вениамин пиос Гивае люкаськизы израиль пиослы пумит ожен мынон вылысь.15Со нуналэ пӧртэм городъёсысь, мечъёссэс кутыса, кызь куать сюрс Вениамин пиос вуизы; со сяна, Гиваысь сизьым сю йыг-йыгесь ожгарчиос быръемын вал.16Вань та калык пӧлын вал сизьым сю паллян киын ожмаськисьёс, ваньзы соос из зӥръянысьтызы изэз туж шонер зӥрто, йӧтытэк уг кылё вал.
17Вениамин пиосты лыдъятэк, израиль пиос пӧлысь меч кутэмъёссылэн лыдзы ньыль сю сюрс мурт вал; ваньзы соос ожмаськыны ярамонэсь.
18Израиль пиос султӥзы но Инмар корка мынӥзы, Инмарлэсь тэльмырыса юазы: «Ми пӧлысь кин нырысь ик Вениамин пиосын ожмаськыны мыноз?» Кузё-Инмар шуиз: «Нырысь радын [мынозы] Иуда пиос».
19Ӵукна вазь ик израиль пиос султӥзы но Гива вӧзы станэн интыяськизы.20Израиль пиос Вениамин пиосын ожмаськыны ӝутскизы, израиль пиос, ожмаськыны дась луыса, Гива вӧзы султӥзы,21Вениамин пиос Гиваысь потӥзы но со нуналэ кызь кык сюрс израиль пиосты погыртӥзы.
22Но израиль калыклэн мылкыдыз ӧз куашка, соос нош ик азьвыл сылэм интыязы радэн-радэн ожмаськыны интыяськизы.23Израиль пиос мынӥзы но ӝытозь Кузё-Инмар азьын бӧрдыса улӥзы, Кузё-Инмарлэсь тэльмырыса юазы: «Вениамин братэлэн пиосызлы пумит эшшо мыноно на-а ожмаськыны?» Кузё-Инмар шуиз: «Мынэлэ соин ожмаськыны».
24Кыкетӥ нуналаз израиль пиос Вениамин пиос доры вуизы.25Кыкетӥ нуналаз Вениамин соослы пумит Гиваысь потӥз, соку эшшо дас тямыс сюрс мечен сылӥсь израиль пиосты музъем вылэ погыртӥзы.
26Соку вань израиль пиос, вань калык Инмар корка мынӥзы, отын пукизы, Кузё-Инмар азьын бӧрдыса улӥзы; со нуналэ ӝытозь визяса улӥзы, Кузё-Инмар азьын тылын сутӥськись курбонъёс, тупаса улонлы сӥзем курбонъёс сётӥзы.27Израиль пиос тэльмырыса Кузё-Инмарлэсь юазы (со дыре Инмарлэн сӥзён-косонэныз ковчег отын вал,28Ааронлэн Елеазар пиезлэн Финеес пиез со азьын сылӥз): «Потоно на-а мыным эшшо Вениамин братэлэн пиосыныз ожмаськыны, яке кулэ ӧвӧл ни-а?» Кузё-Инмар шуиз: «Потэлэ; ӵуказе сое тӥляд киулады сёто».
29Гива котыре израиль ожгарчиоссэ ватӥськытӥз.30Куинетӥ нуналаз израиль пиос Вениамин пиослы пумит ожмаськыны мынӥзы, Гива доры вуыса, азьвыл кадь ик радэн-радэн султӥзы.31Вениамин пиос израиль калык вылэ урдскизы, городлэсь палэнэ кариськизы но азьло кадь ик израиль пиосты сюресъёс вылысен виылыны кутскизы; соос пӧлысь огез сюрес Вефиле, мукетыз бусы кузя Гивае мынэ; ог куамын израиль пиосты виизы.32Вениамин пиос шуизы: «Соос азьло кадь ик асьме азе пограло». Нош израиль пиос шуизы: «Ваелэ соос дорысь бызьыса кошкоме но соосты городлэн палэназ, сюресъёс вылэ, поттоме». [Озьы ик каризы].
33Вань израиль пиос интыысьтызы султӥзы но Ваал-Фамаре огазе, радэн-радэн султӥзы. Ватӥськыса улӥсь израиль ожгарчиос ас интыысьтызы, Гивалэн шундыпуксён паласеныз, потыса азьлане вырӟизы.34Гива азе быдэс Израильысь быръем дас сюрс ожгарчиос вуизы, туж кужмо ожмаськон кутскиз; Вениамин пиос ӧз тодэ, соосты шугадӟон вите шуыса.35Кузё-Инмар Вениаминэз израиль пиос азе погыртӥз; со нуналэ израиль ожгарчиос кызь вить сюрс сю меч кутэм Вениамин пиосты погыртӥзы.
36Вениамин пиос асьсэлэсь пограмзэс адӟемзы бере израиль пиос интызэс Вениамин пиослы сётӥзы, уго соос оскиськизы Гива вӧзын ватӥськыса улӥсь ожгарчиоссылы.37Ватӥськыса улӥсь ожгарчиос Гива вылэ урдскыны дыртӥзы, город пушкы пыризы но вань улӥсьёссэ меченызы погыртӥзы.38Израиль пиос ватӥськыса улӥсь ожгарчиослы веразы, ожмаськыны кутсконо шуыса тодмет мед сётозы – городысь ӵын ӝутӥськыны мед кутскоз.39Израиль пиос ожмаськон интыысь берлане чигнамзы бере Вениамин пиос израиль калыклэсь куамын муртсэ погыртыны вуизы, соку соос шуизы: «Азьло ожмаськонъёс дыръя кадь ик таосыз асьме азе усьыло».40Со виын городысь юбо кадь ӵын ӝутскыны кутскиз. Вениамин пиос мышказы учкизы но адӟизы: быдэс городысь ӵын инме ӝутске.41Израиль пиос берытскизы, нош Вениамин куалектӥз – адӟиз уго, со доры шугадӟон вуиз шуыса.42Израиль пиослэсь кышкаса, соос сюрес кузя кыр дуннее пегӟыны ӧдъязы, но тӥр-пурт соосты сутӥз, городъёсысь потэмъёс соосты отчы виылӥзы.
43Вениаминэз котыртӥзы, Менухаозь уйыса мынӥзы, Гивалэн самой шундыӝужан палозяз соосты погыръязы.44Вениамин выжылэн дас тямыс сюрс кужмо пиосыз виемын вал.
45[Кылемез] берыктӥськыса кыр дуннеысь Риммон изгурезь доры бызьыны кутскиз, нош сюрес вылысен эшшо вить сюрс муртсы виемын на вал; Гидомозь соосты уйыса мынӥзы, эшшо кык сюрс муртсэс виизы.46Со нуналэ Вениаминлэн меч кутэм кызь вить сюрс пиосыз быризы, ваньзы соос кужмоесь пиосмуртъёс вал.
47[Кылем люкетэз], куать сю мурт, берыктӥськыса кыр дуннеысь Риммон гурезе пегӟизы, Риммон изгурезьын соос ньыль толэзь ӵоже улӥзы.48Израиль пиос нош ик Вениамин пиослы пумит ожен мынӥзы но мечъёсын соосты коразы – городысь адямиосты но, пудо-животэз но, – ваньзэ, мар соослэн пумитазы сюриз [вань городъёсын тазьы каризы], городэ мынон сюрес вылын мар шедиз, ваньзэ тылын сутӥзы.
Глава 20