Выбрать язык
Книги Ветхого Завета
Книги Нового Завета
с русским текстом1[Инмардылэн Кузё-Инмарлэн Иордан сьӧрысь тӥледлы сётэм музъем вылаз улыны выжиды ке], Инмаредлэсь Кузё-Инмарлэсь верам кылзэ тон санэ поныса улӥд ке, Солэсь вань курон-косонъёссэ, кудъёссэ мон туннэ тыныд верасько, быдэсъяса улӥд ке, соку Инмаред Кузё-Инмар тонэ музъем вылысь вань калыкъёслэсь вылӥе пуктоз;2тон вылэ вань та бакель каронъёс вуозы, тон вылын соос быдэсмозы, Инмаредлэсь Кузё-Инмарлэсь верам кылзэ кабыл басьтыса улӥд ке.
3Городын тон бакель каремын луод, бусыын но бакель каремын луод.
4Бакель каремын пушкысьтыд потэм емышед, музъем вылад будэм емышед, пудоедлэн вордосъёсыз – ошедлэсь-скалэдлэсь вордскем кунянъёс, ыжъёсыдлэсь вордскем ыжпиос.
5Бакель каремын тынад ю кеносъёсыд, сиён возён интыосыд.
6Коркад пырыкуд, тон бакель каремын, коркасьтыд потыкуд но, тон бакель каремын.
7Тон вылэ урдскись тушмонъёстэ Кузё-Инмар тон азе погыртоз; одӥг сюрес вылтӥ лыктыса, соос тон вылэ урдскозы, нош сизьым сюрес кузя тон дорысь пегӟыса кошкозы.
8Кузё-Инмар бакель каронзэ ыстоз ю кеносъёсыд вылэ, ас киыныд вань ужано ужъёсыд вылэ; Аслаз тыныд улыны сётэм музъем вылаз Инмаред Кузё-Инмар тонэ бакель кароз.9[Инмаред] Кузё-Инмар тонэ Аслаз святой калыкез кароз, кызьы Со тыныд но, [тынад атайёсыдлы но] кыл сётӥз, Инмаредлэсь Кузё-Инмарлэсь курон-косонъёссэ быдэсъяса улӥд ке, Солэн возьматэм сюресъёсыз кузя ветлӥд ке;10музъем вылысь вань калыкъёс адӟозы, [Инмаредлэн] Кузё-Инмарлэн нимыз тынад вылад возиське шуыса, соку соос тынэсьтыд кышкаса улозы.11Соку [Инмаред] Кузё-Инмар тыныд пачыл ваньбур сётоз: трос нылпиосыд вордскозы, трос пудо-животэд вордскоз, Кузё-Инмарлэн атайёсыд азьын тыныд сётыны сӥзем музъем вылысьтыд бусыос трос емыш, ю-нянь сётозы.12Кузё-Инмар ваньбур возён ӟеч шыкыссэ тыныд усьтоз, инэз усьтоз ас дыраз бусыосыдлы зор вуоссэ сётыны, киыныд ужано вань ужъёстэ бакель карыны: трос калыкъёслы пунэмен сётъялод, нош ачид пунэмен уд окты, [трос калыкъёсын кузёяськыса улод, нош соос тонэн кузёяськыса уз улэ].13[Инмаред] Кузё-Инмар тонэ йыр кароз, быж уз кары, вылӥын гинэ луод, улӥын уд луы, туннэ тыныд утьыны, быдэсъяны сётэм Инмаредлэн Кузё-Инмарлэн курон-косонъёсызлы тэрытскыса улӥд ке,14туннэ тӥледлы быдэсъяны косыса сётэм кылъёсылэсь бурпала но, паллян пала но ӧд ке кожылы, мурт инмаръёс бӧрсьы ӧд ке мыны, соослы йыбыртъяса ӧд ке улы.
15Нош Инмаредлэсь Кузё-Инмарлэсь верам кылъёссэ кабыл ӧд ке басьты, Солэсь вань курон-косонъёссэ, пуктон-косонъёссэ быдэсъяса улыны ӧд ке сюлмаськы, кудъёссэ мон туннэ тыныд верасько, соку вань та карганъёс, тон доры вуыса, тонэ котыртозы.
16Каргамын тон [луод] городын но, бусыын но.
17Каргамын [луозы] тынад ю кеносъёсыд, сиён возён интыосыд.
18Каргамын [луоз] пушкысьтыд емышед, музъем вылад будэм емышед, ошъёсыдлэн-скалъёсыдлэн, ыжъёсыдлэн вордскем пиоссы.
19Каргамын [луод] тон коркад пырыкуд но, коркасьтыд потыкуд но.20Мар гинэ лэсьтыны уд кутскы, вань ужъёстэ быдэсъякуд, Кузё-Инмар тон вылэ карган, куалекъян, шугадӟонъёс лэзёз, озьы луоз тонэ быдтытозь, лек ужъёсыд понна, Мон бордысь палэнскемед понна тон ӝоген кулод-бырод.21Кузё-Инмар тон доры сьӧдчер лэзёз, киулад басьтыны мыноно музъем вылысь Со тонэ быдтытозь озьы луоз.22Кузё-Инмар тон вылэ куасьмыса висён, ӟырдаса, кезегъяса висёнъёс, воспаление лэзёз, кӧс аръёс, сутӥсь-ӵушкась тӧлъёс, сынэм висёнъёс*а лэзёз, кулытозяд-бырытозяд та черъёс-шугадӟонъёс тынад бӧрсяд ветлозы.23Йыр йылысьтыд инбам ыргонлы пӧрмоз, пыд улысьтыд сюй корт кадь чурыт луоз;24[тонэ быдтытозяз,] зор интые Кузё-Инмар музъем вылдэ тузонэн шобыртоз, инмысь тузон тынад вылад виялоз, кисьтӥськоз, музъем вылысь тонэ быдтытозь озьы луоз.
25Кузё-Инмар тонэ тушмонъёсыдлы погыртыны сётоз; одӥг сюрес кузя соослы пумит ожмаськыны мынод, нош сизьым сюрес кузя соос дорысь пегӟыса кошкод; музъем вылысь вань эксэйлыкъёсы пазьгиськыса улоно луод.26Шӧйёстэс вань ин тылобурдоос, кыр пӧйшуръёс сиёзы, соосты уллясь-кышкатӥсь уз луы.
27Кузё-Инмар тонэ Египетлэн гижло череныз погыртоз, лыдонэн курадӟод, мугор вылад пыктосъёс потылозы, гижлоё-яраё луод, та висёнъёслэсь эмъяськыны уд ни быгаты;28Кузё-Инмарлэн эрикезъя тон визьдэ ыштод, синтэм кылёд, сюлмыд путоз, –29нуназе шорын тон, пеймыт азьтӥ ветлӥсь синтэм мурт кадь, киыныд утчаськыса ветлод; улон сюрес вылад азинлыкез уз луы, котькуд нуналэ тонэ ӝикатыса, ултӥяса возёзы, нокин но тыныд уз дурбасьты.
30Кышно ваёд, нош соин мукет пиосмурт кӧлалоз; корка пуктод, нош отын уд улы; виноград мерттод, нош солэсь емышъёссэ уд бича.31Син азяд оштэ вандозы, солэсь сӥльзэ уд сиы; ишактэ гидысьтыд нуозы но тыныд уз ни берыктэ; ыжъёстэ тушмонъёсыдлы сётозы, нокин но тыныд уз дурбасьты.32Пиостэ, нылъёстэ мурт калыкъёс кие сётозы; соослэсь бертэмзэс возьмаса улод но нуналлы быдэ соосты витьыса синъёсыд катьтэммозы, киосад кужымез уз ни кыльы.33Музъемедлэсь емышъёссэ, вань ужам уждэ тодымтэ калыкед сиёз; нош тонэ нуналлы быдэ ӝикатыса, курадӟытыса возёзы.34Ваньзэ тае ас синмыныд адӟыса, визьтэммод.
35Пыдесъёсад, пыдъюмылъёсад туж лек гижло чер сётыса, Кузё-Инмар тонэ погыртоз, солэсь тон бурмыны уд ни быгаты, пыдтышкысен кутскыса йыр пыдесозяд гижло чер вӧлмоз.36Тонэ но, асэныд кивалтыны пуктэм эксэйдэ но Кузё-Инмар тыныд но, вашкала атайёсыдлы но тодмотэм калык доры келялоз, отын тон мурт инмаръёслы – пулэсь, излэсь лэсьтэм сульдэръёслы-идолъёслы – йыбыртъяса улод;37[Инмарлэн] Кузё-Инмарлэн тонэ келям вань калыкъёсыз дорын тон кышкатонлы, серекъян-веранлы, унь-мань каронлы пӧрмод.38Бусыяд кизьыны трос ю поттод, но ӧжыт ю кутсалод: кизем ю-няньдэ саранча сиёз.39Виноград бакчаос мерттод, утялтод соосты, нош соослэсь виназэс уд юы, мульыоссэс но уд бича: нумыр соосты сиёз.40Быдэс шаерад вӧйпуос будозы, нош вӧйын уд зыраськы: вӧйпу мульыосыд дырызлэсь вазь вияса-кисьтӥськыса бырозы.41Пиосыд, нылъёсыд вордӥськозы, но соос тон дорын уз улэ: соосты пленэ нуозы.42Вань писпуостэ, музъемад будэм емыштэ сынэм висён быдтоз.43Сьӧрлось лыктыса тон пӧлын улӥсь вылэгес но вылэгес ӝутскоз, нош тон солэсь улэгес но улэгес лэзиськод;44со тыныд пунэмен сётъялоз, нош тон солы пунэмен уд сётъя; со тыныд йыр луоз, нош тон солы – быж.
45Вань та карганъёс тон вылэ вуозы, тон бӧрсьы тынэсьтыд кыльытэк соос сьӧрад ветлозы, тонэ котыртозы, Инмаредлэсь Кузё-Инмарлэсь верам кылъёссэ санэ понымтэед понна тон быдтэмын луод, Солэсь тыныд быдэсъяны сётэм курон-косонъёссэ, пуктон-косонъёссэ утьымтэед-чакламтэед понна быдтэмын луод;46тон вылэ, тынад кидысэд-выжыед вылэ вуэм карганъёс, паймымон тодметъёс, кышкатонъёс пумтэм вапумъёс ӵоже улозы.
47Тынад котьмаид но пачыл ке но вал, тон Инмаредлы Кузё-Инмарлы сюлмыныд шумпотыса, капчи мылкыдын ӧд ужа-тыршы, соин ик48[Инмаредлэн] Кузё-Инмарлэн тон доры лэзем тушмонъёсыдлы ужаса-тыршыса улод, сютэм улыса, сюэд куасьмыса, гольык ветлыса, котьмарлы но ӟудыса-ёрмыса улод; тушмон чырты вылад корт сиес поноз, курадӟытыса калдэ быдтоз.49Кыдёкысь, музъемлэн пумысьтыз, калыкез Кузё-Инмар тон вылэ ыстоз: кинлэсь вераськон кылзэ уд валаськы, со калык тон вылэ ӧрӟи кадь урдӥськоз,50возьыттэм калык со: пересь муртэ гажаны уз быгаты, егит пияшез но уз жаля;51тонэ чылкак номыртэк кельтытозяз, пудоедлэсь вордскем пиоссэ, бусыяд будэтэм емыштэ сиыса со улоз, со нянь но, вина но, вӧй но, скалъёсыдлэсь кунянзэс но, ыжъёсыдлэсь ыжпиоссэ но тыныд уз кельты, – тонэ быдтытозяз со озьы лэсьтоз;52вань улоно интыосад со тонэ ӝикатыса-ёртыса возёз, улон музъем вылысьтыд тынэсьтыд оскиськыса улоно ӝужытэсь, юнэсь борддоръёстэ куашкатытозяз озьы лэсьтоз; вань улоно интыосад, Инмаредлэн Кузё-Инмарлэн тыныд улыны сётэм музъем вылаз тонэ ӝикатыса-ёртыса возёз.
53Тушмон тонэ ёртыса, котыртыса возьыку, ас пушкысьтыд потэм емыштэ сиёд, Инмаредлэсь Кузё-Инмарлэсь тыныд вордыны сётэм пиосыдлэсь, нылъёсыдлэсь мугорзэс сиёд.54Тӥ пӧлын туж бадӟым узырлыкен эркияськыса улэм пиосмурт агай-выныз шоры, аслаз кышноез, бордаз кылем нылпиосыз шоры лек синмын учкоз,55вань улоно интыостэ тушмон котыртыса, ӝикатыса-ёртыса возьыку, нокыӵе но мукет сиёнэз луымтэен сэрен нылпиосызлэсь мугорзэс сиыса улоз, нош мукетъёслы сиыны уз сёты.56Тон дорын эркияськыса, узырлык пӧлын улэм кышномурт, эрки, узыр улэмысьтыз музъем вылэ пыдыныз но лёгиськылымтэ мурт, аслаз кузпалыз шоры, пиез, нылыз шоры лек синмын учкоз,57нылпи вайыкуз пушкысьтыз усись макезэ но, ваем нунызэ но мукетъёслы сиыны уз сёты, сютэм улэмезлы чидатэк, ачиз лушкемен сиёз, – улоно интыостэ тушмон котыртыса, ӝикатыса возьыку, озьы луоз.
58Та книгае гожъям законлэсь вань кылъёссэ быдэсъяса улыны ӧд ке сюлмаськы, Инмаредлэн Кузё-Инмарлэн данлыко но кышкыт нимызлэсь кышкатэк улӥд ке,59соку Кузё-Инмар тонэ, тынэсьтыд нылпиостэ но чидантэм секыт курадӟонъёсын погыртоз, бырылӥсьтэм, туж бадӟым курадӟонъёсын, бырылӥсьтэм лек висёнъёсын погыртоз;60Египетысь вань [лек], туж секыт курадӟонъёсты, кудъёсызлэсь тон кышкаськод вал, Со тон вылэ лэзёз, со курадӟонъёс тон борды лякиськозы;61та законэн книгае [вань гожтэм но] гожтымтэ, котькыӵе но висёнъёсты, котькыӵе но курадӟонъёсты Кузё-Инмар тон вылэ лэзёз, – тонэ быдтытозь озьы лэсьтоз;62трос дыръяды тӥ инмысь кизилиос мында ке но вал, Инмаредлэсь Кузё-Инмарлэсь верам кылъёссэ пеляд понымтэед понна тӥ ӧжыт кузя гинэ кылёды.63Кызьы шумпотэ вал Кузё-Инмар тӥледлы ӟеч карыкуз, тӥледыз йылэтыкуз, таре тазьы ик шумпотоз Кузё-Инмар тӥледыз погыртыкуз, тӥледыз быдтыкуз; киулады басьтыны мыноно музъем вылысьтыды тӥ сэрпалтэмын луоды.
64[Инмаред] Кузё-Инмар тонэ музъемлэн пумысеныз музъемлэн пумозяз, вань калыкъёс пӧлы пазьгоз, отын тон пулэсь, излэсь лэсьтэм мурт инмаръёслы йыбыртъяса улод, соосты азьвыл тон но, тынад атайёсыд но уд тодӥське вал.65Но со калыкъёс пӧлын но уд буйгатскы, тынад пыдъёсыд отысь но каньыллык уз шедьтэ, отын улыкуд, Кузё-Инмар сюлэмдэ куалекъятоз, лулыд курадӟоз, синмыд урод адӟоз.
66Азьпал улонэдлы оскиськонэд ӧвӧл, уйин но, нуназе но куалекъяса улод, уд тоды – улэп кылёд на-а, уд ни-а;67дугдылытэк сюлмыд куалекъяса улэмен сэрен, ваньзэ таосты ас синмыныд адӟыса, амалтэк соку ӵукна шуод: «Э, ӝоггес ӝыт мед вуоз ни вал!», нош ӝытазе шуод: «Э, ӝоггес ӵукна мед вуоз ни вал!»68Кузё-Инмар бадӟым пыжъёсын тонэ Египетэ берыктоз мынам тыныд верам сюресэ кузя, кудӥз сярысь мон шуи вал: «Со сюресэз тон азьланяз ноку но уд ни адӟы»; отысен тӥ асьтэдыз асьтэос тушмонъёстылы ляльчи луонлы вузалоды, нош басьтӥсьёс уз сюре.
*а 28:22 сынэм висён – ржавчина – вож будосъёслэн, ю-няньлэн висёнзы, (кылдэмыны сыномыны ’ржаветь, стать ржавым’ кыл бордысь)
Глава 28