Выбрать язык
Книги Ветхого Завета
Книги Нового Завета
с русским текстом1Со виын Кузё-Инмар мыным шуиз: «Нырысьёсызлы укшась кык изпулъёс аслыд вӧл но Мон доры гурезь йылэ туб, аслыд пу ковчег лэсьты;2азьвылаз тынад пыргытэм изпулъёсыд вылын мар гожтэмын вал, со кылъёсты ик таосыз вылэ но Мон гожто; соосты ковчег пушкы пон».3Сӥттимпулэсь мон ковчег лэсьтӥ, азьвылъёсызлы укшасесь кык изпулъёс вӧлӥ но гурезь йылэ тубыны вырӟи; та кык изпулъёс мынам киям вал.4Со изпулъёс вылэ азьвыл мар гожтэмын вал, со кылъёсты ик Со гожтӥз: Кузё-Инмар тӥледлы люкаськон нуналэ, гурезь йылысен, тыл пушкысен со дас курон-косонъёсты вераз, изпулъёсты Кузё-Инмар мыным сётӥз.5Соку мон берытски но гурезь улэ васьки, со изпулъёсты аслам лэсьтэм ковчег пушкам понӥ, кызьы Кузё-Инмар монэ соосты возьыны косӥз.
6Соку израиль пиос Беероф-Бене-Яаканысь Мозере кошкизы; отысен Аарон кулӥз, отчы сое ватӥзы, со интые священник луиз солэн Елеазар пиез.7Отысен Гудгодэ, Гудгодысен – Иотвафае, ошмесо-вуо музъеме, кошкизы.
8Со виын Кузё-Инмар Левийлэсь выжызэ Кузё-Инмарлэсь сӥзён-косонэн ковчегзэ нуллыны висъяз, Кузё-Инмар азьын сылыны, Солы ужаны-тыршыны [но вӧсяськыны] висъяз, Солэн нимыныз бакель карыны лэзиз, та нуналозь но тазьы лэсьтӥське.9Соин ик левитлэн агай-вынъёсыз пӧлын люкетэз, люкет музъемез ӧвӧл: Ачиз Кузё-Инмар солэн люкетэз луэ, кызьы Инмаред Кузё-Инмар солы вераз вал.10Азьвыл кадь ик гурезь йылын мон ньыльдон нунал но ньыльдон уй улӥ; та радаз но Кузё-Инмар мынэсьтым куронме санэ понӥз, Кузё-Инмарлэн тонэ быдтэмез ӧз ни поты;11соку Кузё-Инмар мыным шуиз: «Султы но [та] калыклэн азьпалтӥз мын, соос мед мынозы но Мынэсьтым атайёссылы сётыны сӥзем музъемез мед киултозы».
12Озьыен, Израиль, Инмаред Кузё-Инмар мар тынэсьтыд куре? Тае гинэ куре: Инмаредлэсь Кузё-Инмарлэсь кышканэн мед улод, Солэн вань сюресъёсыз кузя мед ветлод, Сое мед яратод, вань лулыныд, вань сюлмыныд Инмаредлы Кузё-Инмарлы ужаса-тыршыса мед улод,13[Инмаредлэсь] Кузё-Инмарлэсь курон-косонъёссэ быдэсъяса мед улод, Солэсь пуктон-косонъёссэ быдэсъяса мед улод, кудъёссэ мон туннэ тыныд верасько. Озьы улӥд ке, тыныд умой луоз.14Тани, Инмаредлэн Кузё-Инмарлэн киулаз ин но инъёслэн инъёссы, музъем но мар со вылын вань,15но Кузё-Инмар тӥлесьтыд атайёстэс гинэ кабыл басьтӥз, соосты яратӥз, соос бере тӥледыз, соослэсь кидыссэс, вань калыкъёс пӧлысь Аслыз бырйиз, кызьы тон али адӟиськод.16Озьыен, сюлэмдылэсь вогъяськон сямзэ уретыса куштэ, азьланяз чурыт сюлэмоесь эн ни луэ,17уго тӥляд Инмарды Кузё-Инмар – со инмаръёслэн Инмарзы*а, кузёослэн Кузё-Атайзы, быдӟым, кужмо, кышкыт Инмар, Со ымныр шоры уг учкы, кузьымъёс уг окты,18Со анайтэм-атайтэм нылпиослы, палкышноослы дурбасьтэ, сьӧрлось лыктэм муртэ яратэ, солы нянь, дӥськут сётэ.19Тӥ но сьӧрлось лыктэм муртъёсты яратэ, уго тӥ но Египет музъемын сьӧрлось лыктэм муртъёс вал.
20Инмаредлэсь Кузё-Инмарлэсь курда, Солы [гинэ] ужаса-тыршыса ул, Со борды лулыныд-сюлмыныд лякиськы, Солэн нимыныз кыл сёт:21Со тынад ушъяськонэд, Со тынад Инмаред, тон ас синмыныд адӟид, макем быдӟымесь но кышкытэсь ужъёс со тон понна лэсьтӥз.22Тынад атайёсыд сизьымдон [вить] ӵошен Египетэ лыктӥзы, нош та дырлы Инмаред Кузё-Инмар тонэ йылэтӥз, инмысь кизилиос мында луид.
*а 10:17 Инмар – дунне вылын одӥг гинэ Дунне Кутӥсь Быдӟым Кузё-Инмар вань. Язычникъёслэн ”инмар” шуонзы – со идолъёс, соос зэм Инмар ӧвӧл. Инмар Кузё-Инмар гинэ зэм Инмар. Таӵе пуштросэн валаны кулэ «Бог богов = инмаръёслэн Инмарзы» выражениез (Библиын со 6 пол пумиське)
Глава 10