Выбрать язык
Книги Ветхого Завета
Книги Нового Завета
с русским текстом1Ся шитнень сась Иоанн Кстиндайсь и пачфнесь куля Иудеянь шавмодаса*а:2«Шарфтода Шкайти, сяс мес маладсь Менелень Оцязорксшись*б».3Иоанн ульсь ся, конань колга корхтась Исаия пророксь:
«Серьгядить вайгялец кайги шавмодаса:
"Аноклада Азорти ки,
видептесть Тейнза китнень-яттнень"»*в.
4Иоаннонь щамоц ульсь ишимонь*г понаста, перьфксоц карксафоль шнань карксса. Ярхцамбялькс тейнза ульсть паксянь циледихне и вирень медсь.5Тейнза сашендсь пяк лама ломань Иерусалимста, сембе Иудеяста и Иордан ляйть перьфста.6Сон кстиндакшнезень ломаттнень Иордан ляйса, мзярда синь виденцякшнесть эсь пежесост.
7Сон ваны: кстиндама сашенды лама фарисейда*д и саддукейда*е, и мярьгсь тейст: «Пупай куень лефкст! Кие тонафтодязь тинь ворьгодемс Шкайть сай пингонь судонц эзда?8Эсь тевсонт няфтесть Шкайти шарфтомантень,9и тяда арьсе идемс прянтень валса: "Минь аляньке – Авраам". Корхтан тейнть: Шкайсь машты тиемс ня кефнень эзда Авраамонди итть.10Узерсь ащи ни шуфттнень юрснон ваксса: эрь шуфтть, кона аф канды цебярь имошт*ж, керсазь и ёрдасазь толти.
11Мон кстиндатядязь тинь ведьса Шкайти шарфтомантень няфтеманкса, но мельган Молись мондедон вии. Мон аф кондястян кандомс Сонь сандалиянцка. Сон кармай кстиндамонт тинь Иняру Ваймопожфса и толса.12Сонь кядьсонза каймоц, и Сон понжафтсы сёроть тинголангса*з. Тозерть кочкасы утому*и, а ювть*к плхтасы аф мадонды толса».
13Эста Иисус сась Галилеяста Иорданть трвас Иоаннонь кядьста прянц кстиндафтома.14Иоанн тяряфнесь лоткафтомс Сонь и мярьгсь: «Тя Тейть эряволь монь кстиндамс, а Тон сать тейне?»15Но Иисус каршезонза мярьгсь: «Катк тяни ули тяфта; тейнек эряви тиемс ся, мезе ёрай эздонк Шкайсь». Эста Иоанн тяфта и тись.
16Кстиндамда меле Иисус эстокиге лиссь ведьста, и панжевсь Тейнза менельсь, и няезе Шкаень Ваймопожфть, кона гуляня лаца валгсь Сонь лангозонза.17И менельста кулевсь вайгяль: «Тя Монь кельгома Цёразе, Монь кенярдема вастозе».
*а 3:1 шавмода – пустыня
*б 3:2 Менелень Оцязорксши – Небесное Царство
*в 3:3 Исаия 40:3
*г 3:4 ишим – верблюд
*д 3:7 фарисей – тонафнеф еврей, кона кемоста ащесь Моисеень коенц ванфтоманц-кирдеманц инкса
*е 3:7 саддукей – озксвятиень оцюнять юромста еврей, кона ашезь кема аф ваймопожфненди, аф ангелхненди, аф кулофста вельмамати
*ж 3:10 имож – плод
*з 3:12 тинге – гумно
*и 3:12 утом – амбар
*к 3:12 юв – шелуха от колосьев
Глава 3