Выбрать язык
Книги Ветхого Завета
Книги Нового Завета
с русским текстом1«Кда кивок салай бука али уча, и печксы сонь али мисы, эста катк салайсь панды вете букат салаф букать инкса, и ниле учат – салаф учать инкса.
2Кда салайть сатсазь стенань шувомста, и эрьхтьсазь сяшкава, нльне ся кулы, эста шавиец аф мувору веронь валомаса.3Но кда тя лиссь шинь стямда меле, эста шавиец мувору веронь валомаса. Катк салайсь пандсы салафть питненц, а кда тейнза аш мезьса пандомс, эста катк мисазь сонцень и пандсазь салафонц питненц.4Кда ся, мезе сон салась: букась, ишимсь али учась муви кядьсонза живойста, эста салайсь катк панды кафтонь крда.
5Кда кивок нолдасыне эсь жуватанзон лиять паксязонза али виноградонь перезонза ярхцама, и жувататне тиихть тоса зиян, эста катк жувататнень кирдисна пандсы тя карьхцть эсь паксястонза сембода цебярь иможса али виноградонь перестонза сембода цебярь виноградса.
6Кда крьвязи тол и сон, ётамок сялги кусторкснень лангс, плхтасыне капатнень али апак нук сёропрятнень, али паксять, эста ся, кие крвястезе толть, катк тянкса панды питне.
7Кда фкясь макссы омбоцети ванфтомс эсь сиянь ярмаконц али лия паршинзон, но кие-бди саласыне синь ся ломанть кудстонза, эста, кда муви салайсь, катк сон кафтонь крда панды тянкса.8А кда салайсь аф муви, эста катк кудазорсь стяй Шкайть инголе и варай: сон ашезе сявонде маластонненц уликс-паронц.9Эрь пялькстомаса уликс-пароть колга – улеза тя бука, ишим, уча, щам али лия юмаф уликс, конань колга кивок мярьги: "Тя монне", кафцьке пялькстыхнень тевсна кандома Шкайть инголи. Кинь Шкайсь лувсы муворукс, ся кафтонь крда панды маластонь ломаненцты.
10Кда кивок аф лама пингонди кадсы мала ломаненцты эсь ишимонц али буканц, али учанц, али кодамовок лия жуватанц, а жуватась кулы али токави, али сонь саласазь, и кивок тянь аф няйсы, –11эста катк кафцьке варайхть Азорть инголе. Жуватать мельге ванысь катк варай: сон ашезе сявонде маластонь ломаненц уликсонц, а жуватать азороц катк кемай тя варамати и аф вешенди маластонненц кядьста питнень пандома.12А кда жуватать саласазь кядьстонза, эста тейнза эряви пандомс жуватать азоронцты.13Кда сязендьсы вирьбаксянь жувата, эста катк кемокстаманди няфтьсы сязентьф жуватать. Сязентьф жуватать инкса сон аф панды.
14Кда кивок сяви пандомда жувата маластонь ломаненц кядьста, и жуватась токави али кулы, мзярда азороц аф ули маласа, эста инксонза эряви пандомс.15А кда азороц ульсь вакссонза, эста аф эряви пандомс инксонза. Кда жуватась сявфоль ярмак лангс, эста катк ся карьхцть вельхтясы инксонза пантф ярмаксь».
16«Кда алясь васькафтсы од стирть, кона киндиге ашезь надияфне тумс рьвакс, и уды мархтонза, эста катк панды инксонза питне и сявсы сонь эстейнза рьвакс.17А кда стирть алянц аф ули мялец максомс стирть тейнза рьвакс, эста катк васькафтысь панды сняра сиянь ярмак, мзяра ладяф паннемс од стирьхнень инкса.
18Колдун аватнень тяйть кадонда шиса.
19Жувата мархта утцить макск куломас.
20Кие канни озксказнет лия шкайхненди фкя-тяка Азорда башка, ся эряви шавомс.
21Лия масторста сафть тяк люпшта и тяк обжа, сяс мес тинь тинць уледе ширде сафокс Египетонь масторса.
22Аф удавать, аф урозть*а тясть люпшта.23Кда тон кармат люпшнемост, эста, мзярда синь эняльдезь анайхть кядьстон лезкс, Мон афкукс кульса синь эняльдемаснон,24лаказеван лангозонт кяжса и шафтядязь тинь торса. Тяфта тинцень рьвянте арайхть удавакс, а иденте – урозкс.
25Кда максат пандомда ярмак ашути, кона Монь ломаньтналстон, эста тяк люпшта сонь и тяк касфне сявф ярмакть лувксонц.26Кда ярмакть вастс тон сявсак маластонь ломанцень ланга щамонц, эста шить валгоманц самс мрдафтк сонь тейнза.27Тя вдь сонь фкя-сяка вельхтердац, ронгонь кяшемац. Кода сон уды соньфтемонза? Тяфта, мзярда сон эняльгоды Тейне, Мон кульса сонь, сяс мес Мон кельгозь ужяльдиян.
28Тяк сялда Шкайть и тяк валонда рдазу валса ломаньтналцень оцюнянц.
29Пингонь апак тарксек каннек Тейне казнет васень шачф сёроцень эзда и люпштамань лотксот*б тапафть эзда. Макссек Тейне васень шачфть тонь цёратнень ёткста.30Сякоть тиентьк букацень и учацень мархта. Катк сисем шит синь ащихть тядяснон мархта, а кафксоце шиня максыть Тейне.31Уледа Тейне иняру ломаньтналкс. Тяда ярхца жуватать сивольденза, кда сонь сязендезе вирьбаксянь жувата. Тя сивольть ёрясть пинетненди».
*а 22:22 уроз – сирота
*б 22:29 рузкс: точило. Тя кафта аф оцю лоткт, конат тифольхть кевбандса. Фкяти кайсезь кенерьф виноградонь имошнень и пильгса люпшнезь синь. Виноградонь ведсь шудесь омба лоткти, и меле тянь эзда тиендсь виноградонь вина.
Глава 22