Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди: «Архт фараонти и мярьк тейнза: "Тяфта корхтай Азорсь: Нолдак Монь ломаньтналозень, катк моли Тейне сюконяма.2А кда тон аф кулхцондсамак и аф нолдасак сонь, эста, ватт, Мон кучан сембе аймакцень лангс ватракшт.3Нилсь кармай кзмолдома ватракшса. Синь лисихть Нилста и сувайхть кудботмозт, кудбяльксозт, коса утцят, удома вастозт, покодихнень и ломаньтналцень кудозост, пянакудозт и кшинь ичема парезт.4Ватракшне кармайхть комотнема лангозт, ломаньтналцень и сембе покодихнень лангс"».5И Азорсь мярьгсь Моисеенди: «Мярьк Аарононди: "Венептьк кядцень и байдекцень ляйхнень, шудерькснень и эрьхкнень шири, лихтить ватракшнень Египетонь масторть лангс"».6Аарон венептезе кяденц Египетонь веттнень шири, и эздост лиссть ватракшт, конат вельхтязь Египетонь масторть лангонц.7Сякоть, эсь колдувамаснон вельде, тиезь колдуттневок, лихтезь ватракшнень Египетонь масторть лангс.
8Фараонць тердезень Моисеень и Аарононь и мярьгсь: «Озондода Азорти, катк Сон сявсыне ватракшнень эздон и ломаньтналозень эзда, и мон нолдаса Израилень ломаньтналть Азорти озксказнень кандома».9Моисей мярьгсь фараонти: «Тонць ладяк пингть, мзярда тейне озондома инксот, покодихнень инкса и ломаньтналцень инкса, и ся пингть ватракшне туйхть эздот, кудстот, и лядыхть аньцек Нилса».10Фараонць мярьгсь: «Ванды». Моисей мярьгсь каршезонза: «Ули тонь валцень коряс. Тянь вельде тон содасак: аш кивок минь Азор Шкаеньконь лаца.11Ватракшне туйхть эздот, куттнень эзда, покодихнень эзда и ломаньтналцень эздовок. Аньцек Нилса синь кадовихть».12Моисей и Аарон лиссть фараонть эзда, и Моисей эняльгодсь Азорти ватракшнень кувалма, конатнень Сон кучезень фараонть лангс.13Азорсь тись Моисеень валонц коряс, и ватракшне кулость куттнень, пирьфнень и паксятнень эса.14Синь кочказь оцю марга, и масторть келес кеподсь шине.15Но мзярда фараонць няезе: арась сяда тёждя, сон кевонзафтозе седиенц и ашезень кулхцонда Моисеень и Аарононь, кода и мярьгондсь Азорсь.
16Азорсь мярьгсь Моисеенди: «Мярьк Аарононди: "Венептьк байдекцень и калтатьк сонь модань пульть ланга, и модань пульсь тиеви карунякс Египетонь масторть келес"».17Синь тяфта и тисть: Аарон венептезе кяденц и байдекса калтадсь модапуль ланга, и эвондасть карунят ломаттнень и жувататнень лангса. Модань сембе пульсь тиевсь карунякс Египетонь масторть келес.18Колдуттневок эсь колдувамаснон вельде ёрасть тиемс карунят, но синь изь лисе. Карунятне ульсть ломаттнень и жувататнень лангса.19Эста колдуттне мярьгсть фараонти: «Тянь тиезе Шкайть кядец». Но фараонть седиец кевонзась, и сон ашезень кулхцонда синь, кода и мярьгондсь Азорсь.
20Тяда меле Азорсь мярьгсь Моисеенди: «Ванды стяк варьхмодемшовор и, мзярда фараонць моли ляйти, эвондак шаманц инголе, и азк тейнза: "Тяфта корхтай Азорсь: Нолдак Монь ломаньтналозень, катк сон моли Тейне сюконяма.21А кда аф нолдасак ломаньтналозень, эста, ватт, Мон кучан пуропт тонь лангозт, покодихнень и ломаньтналцень лангс, и кудботмозт. Египтяттнень кудсна и модась, конань лангса синь эряйхть, пяшкодихть пуромса.22Но ся шиня Мон ванфтса пуромда Гесем модать, коса эряй Монь ломаньтналозе, и тоса аф улихть пуропт. Тянь вельде тон содасак: Мон Азорсь масторлангса.23Мон явфтса Эсь ломаньтналозень тонь ломаньтналцень эзда. Тя дивань тяштькссь ули тиф ванды"».24Азорсь тяфта и тись: лийкстась пяк лама пуромда фараонть кудозонза, покодиензон кудозост и сембе Египетонь масторть лангс. Масторсь юмсесь-арсесь пуропнень эзда.25Эста фараонць тердезень Моисеень и Аарононь и мярьгсь: «Арда, кандода озксказне Шкаентенди, аньцек тиесть тянь тяса, Египетонь масторса».26Но Моисей мярьгсь: «Тейнек аш кода тянь тиемс, сяс мес Египетонь эряйхне туткодыхть озксказненьконь эзда, конань минь ёратама кандомс Азорти, Шкаеньконди. Кда минь канттама стама озксказне, конань эзда туткодыхть Египетонь ломаттне, дяряй эста синь аф шавсамазь минь кевса?27Тейнек эряви молемс шавмодав, колма шинь кис, и тоса кандомс Азорти, Шкаеньконди, озксказне стане, кода Сон мярьги тейнек».28Фараонць мярьгсь: «Мон нолдатядязь тинь озксказнень кандома Азорти, Шкаентенди, аньцек тяда тушенда ичкози. Озондода монь инксон».29Моисей мярьгсь: «Мзярда мон лисян ширдет, эста озондан Азорти, и ванды пуропне кадсазь фараонть, сонь покодиензон, сонь ломаньтналонцка. Аньцек катк фараонць лоткай васькафнемонк и катк аф шорси ломаньтналоньконди молемс Азорти озксказнень кандома».30Моисей лиссь фараонть эзда и озондсь Азорти.31Азорсь тись Моисеень валонц коряс, сявозень пуропнень фараонть эзда, сонь покодиензон и ломаньтналонц эзда: фкявок пуром ашезь ляда.32Но фараонць кевонзафтозе седиенц и тага ашезе нолда ломаньтналть.
Глава 8